要唔要食。。

hi你好啊 想問第一次 冇套(知衰)嘗試插入 但痛得滯最尾stop咗 男仔冇射但應該有尿道球腺液,想知意外懷孕率高唔高?係咪要食事後

你好呀 @Mmmmml :wave:t2: :wave:t2: :wave:t2:

都想知道你哋嘗試插入嘅情況係點樣嘅,係入咗少少定係只係頂住陰道口?只係頂係陰道嘅話,懷孕嘅風險都比較低嘅。但係如果情況係已經有(即使只係少少)陰莖嘅部分進入咗陰道裡面,就會有懷孕嘅風險啦。第幾次發生性行為同會唔會有懷孕風險係冇關係嘅,重點係性器官之間有冇直接接觸到。當然,對比起喺體內射精,你哋今次嘅情況懷孕風險都會低啲,但要造成懷孕只係需要一精子,所以只要性器官之間有直接接觸到都係有風險架。事後丸係要喺發生咗性行為之後嘅120小時或者72小時內服用嘅,事後丸喺香港嚟講都係需要經由醫生處方先至可以攞到,醫生會幫你評估身體嘅狀況建議你食啱你嘅避孕丸,如果有需要嘅話都可以去家計會搵醫生幫你檢查及開藥嘅,另外某啲私家診所都會有提供相關嘅藥物。 :grimacing:

如果你有評估過之後覺得冇需要食事後丸,可以喺對發生性行為後7日用驗孕棒驗孕,到時會得到初步結果,而去到11日後或者預計月經嚟嘅日子再驗結果就會更加可信。 :grinning:

入到自己feel到好大痛楚嘅位置就stop咗,唔知算係頂住定入咗

其實「頂住」應該係指陰莖前端(龜頭位置)接觸到陰道口,而「入咗」就係陰莖已經進入陰道。都好明白初初嘗試發生陰道插入式性行為嘅時候,陰道口會因為神經分佈相對比較多,再加上唔習慣有嘢進入陰道,同埋可能個人又會有啲緊張,所以好容易感到痛楚,陰莖未必可以繼續進入陰道。而係呢個情況下,你都未必可以分得好清楚,究竟有冇插入。但正如Kaleo之前所講,你嗰次性行為有一定嘅懷孕風險,但相對比較低。 :blush:

如果你決定要進行緊急避孕,咁就要喺發生性行為後72或者120小時內去睇醫生(時間上嘅分別係因為現時有兩款緊急避孕藥,服藥時效分別為性行為後72小時同120小時,不過都係建議要盡快服用),進行緊急避孕(如果睇完醫生,醫生覺得你嘅身體狀況唔適合食緊急避孕藥,咁都可以考慮用子宮環呢一種方式去做緊急避孕嘅)。

而如果你衡量完風險,覺得唔需要食藥嘅,而你又想安心啲,你都好似Kaleo咁講,進行驗孕嘅。

你可以睇下邊一種方法最能夠令你安心,最適合你,然後再做決定。 :wink:

下次再發生性接觸嘅時候,你可以考慮使用安全套。即使唔係發生插入式嘅性行為,有安全套嘅保護就可以令你更加安心咁去享受啦 :smiling_face_with_three_hearts:。 關於正確使用安全套嘅資訊,可以參考:https://www.stickyricelove.com/post/__安全套

Thxx

1個讚