事後丸會抑制排卵期🤔?

事源3月14號同男朋友發生性行為 因為危險期有帶套 佢抆出黎射個時見到套爆左 然後事後驚所以即刻食事後 3月16又有一次 帶套無穿個次唔擔心
跟住今日3月22號又去左發生性行為 個胸開始有漲奶感覺應該參唔多黎m 所以放肆左無帶套一陣🥲 之後都有帶返 我知道係唔啱 不過情到濃時無理咁多
用網上啲排卵預算係話我3月14至到19號係危險期 但係呢 我知食完事後會抑制排卵 咁我排卵期會延遲幾多左右 會唔會呢個禮拜先排卵:fearful: 越諗越淆 但一定無可能一個週期食兩次事後咁嘛…

補充返先
呢兩三日都多左好多白帶 同埋今日有啲頭暈
呢啲徵狀都係我經期前會有所以我係咪就黎要黎m…
電話預測我下星期會到 但係食完事後會有機會推前經期架呵:pleading_face::bowing_woman:t2:

首先想了解返,你係喺邊度買事後藥食㗎 :face_with_monocle:?喺香港,緊急避孕藥係處方藥物,必須要由醫生處方先可以得到。所以要去急症室/家計會診所/母嬰健康院/部分私家診所或醫療中心睇過醫生,確認你嘅身體狀況適合先可以食。通常如果去家計會,醫生仲會提醒你食藥後直到月經出現都唔建議再發生性行為。而坊間藥房出售嘅「事後藥」有機會係成分不明嘅藥物 :persevere:

緊急避孕藥係通過高劑量嘅荷爾蒙抑制排卵;如果已經身體已經排卵嘅情況下,高劑量嘅荷爾蒙會干擾受精過程,因此達致緊急避孕嘅效果。

一個月經週期係由嚟月經果日起計直到下次嚟經前一日,所以「排卵期」其實要等月經出現之後,先可以推算出剛過去呢個週期係幾時排卵。因此一啲電話app嘅記錄同計算之後一個大概嘅參考,唔可以準確咁知道究竟邊日係「排卵日」。再加上排卵同月經呢啲生理現象好容易受到其他因素影響,例如荷爾蒙分泌、飲食、作息、壓力、藥物等等,唔係每個月都一定會一模一樣。所以,除非每日都用排卵試紙去測試,否則我地唔能夠好準確咁知道究竟邊一日排卵。我地亦唔建議用「計算排卵期」呢個方法作為避孕方法。 :blush:
再加上你食咗緊急避孕藥,排卵有機會受到影響。而且服用緊急避孕嘅其中一種副作用係影響月經週期,月經嘅日期、長度、血量等都有機會出現變化,甚至同平時好唔同。而且食過事後丸之後並無話一定會令月經提早定係延遲,只能夠講好大機會同預計嘅有差距。通常一至兩個週期之後就會穩定返,情況因人而異。所以你今次嘅月經更加唔能夠用平時嘅記錄參考,去推斷大概幾時會月經。 :relaxed:
雖然胸部脹、頭暈、白帶增多係常見嘅經前症狀,但呢啲症狀亦有機會由其他原因造成(例如飲食),所以唔可以單憑呢啲症狀去肯定月經即將嚟 :confounded:

雖然你3月22號嘅性行為冇使用安全套並冇體內射精,但陰莖喺受到刺激嘅時候會有透明嘅尿道球腺分泌物,當中有機會含有少量精子。所以嗰次性行為都係有一定嘅懷孕風險。而因為你呢一個月經週期已經服用過緊急避孕藥,所以唔可以再食。

如果你擔心嘅話,你可以考慮喺120小時內,使用子宮環作為另一種緊急避孕嘅方法。子宮環要由醫生評估完你嘅身體狀況適合使用之後,放置入你嘅子宮入面。而因為可以放置入體內幾年,子宮環都可以作為長期嘅避孕方法(但子宮環並唔能夠防止性病傳播/其他因為性行為造成嘅感染,安全套先可以)。現時家計會/母嬰健康院/部分私家診所或醫療中心都有提供呢個服務,你有需要就要盡快去預約。 :man_health_worker:t2: :woman_health_worker:t2:

如果你衡量完風險,覺得可以唔需要緊急避孕,而你又擔心嘅話,你可以考慮自行驗孕。喺性行為7日後驗孕,可以得到初步結果;11日後驗,會得到比較準確嘅結果。 :wink:

見你話之前安全套有破裂嘅情況,其中一個可能出現嘅原因係佩戴嘅時候冇擠走儲精囊入面嘅空氣,摩擦而導致安全套破裂。關於正確使用安全套嘅資訊,可以參考:
https://www.stickyricelove.com/post/__安全套
另外一個可能導致安全套破裂嘅原因係因為潤滑不足,你可以考慮下次用安全套嘅時候配合埋潤滑劑一齊使用。建議使用水性/矽性/水矽混合型嘅潤滑劑,唔建議使用油性潤滑劑,因為油性成分有機會令乳膠安全套破裂,亦會破壞陰道嘅酸鹼平衡,影響陰道健康。更多關於潤滑劑嘅資訊,可以參考:
https://www.stickyricelove.com/post/__潤滑劑