會唔會懷孕..

上次黎m係3月9號, 中間都冇同男朋友有性行為, 但3月26有用手. 想問咁樣會唔會懷孕, 因為個日咁啱好似係排卵日, 男朋友好似係摸咗自己先再擺入去, 中間應該都隔咗幾分鐘, 我有啲驚佢隻手指到會有前列腺液…

同埋由琴日好似個下腹有啲谷住谷住咁, feel 到有啲熱

Hello 你嘅懷孕風險係好低嘅,唔使擔心~ :blush:

陰莖喺受到刺激嘅時候會分泌透明嘅尿道球腺液,當中有機會含有少量精子。但精子暴露咗喺空氣中存活率會好低,因為精子需要精液/尿道球腺液呢啲媒介提供養份先生存到,喺空氣入邊呢啲液體會好快乾,所以精子好快就會死亡。如果好似你咁講,伴侶接觸完陰莖隔咗幾分鐘之後再接觸你嘅陰道,懷孕風險係好低嘅。 :relaxed:

同埋都想同你解釋返,排卵同月經係由身體幾個系統配合而形成嘅。呢啲生理現象好容易受到其他因素影響,例如荷爾蒙分泌、飲食、作息、壓力、藥物等等,所以可能每一個月經週期都會有所唔同。而且「排卵期」係要等月經出現咗之後(月經第一日係新一個月經週期嘅第一日),先可以推算出上一週期嘅排卵期。因此除非每一日都用排卵試紙去測試,否則我地好難準確知道究竟邊日係「排卵日」,一啲手機app嘅紀錄只係大概嘅估計,唔能夠好確實咁知道「排卵日」嘅日期嘅。 :nerd_face:

至於你話覺得腹部脹,覺得身體比較熱,呢啲都係比較常見嘅經前症狀,隨著月經出現就會消退;或者呢啲狀況係由其他原因導致,例如飲食/消化問題都可能導致腹部唔舒服,呢幾日轉天氣你會感覺到好悶熱。所以我地好難單憑呢啲症狀去判斷自己係咪懷孕嘅。 :grimacing:

下次同伴侶再發生性接觸嘅時候,可以用埋口交膜/指套呢啲阻隔性嘅安全措施(詳情可以參考:https://www.instagram.com/p/B57ZtvGlckR/?utm_source=ig_web_copy_link ),喺接觸對方性器官之前清潔好雙手;或者即時唔係發生陰道陰莖插入式嘅性行為,都可以使用安全套(關於正確使用安全套嘅資訊,可以參考:https://www.instagram.com/p/B4EX0FVFLUf/?utm_source=ig_web_copy_link )。咁樣就可以避免陰莖分泌物接觸到陰道口或者進入陰道導致懷孕風險,你地就可以更加安心咁享受啦。 :sparkling_heart: