第一次發文，如有不妥請跟我說
想請問一下各位又月經遲來，但驗孕驗不到懷孕的經驗嗎？
我在13號左右的時候sex的，原本月經的預定日子是14號左右（上個月是14來的）
但係到現在也沒有來…我在25號的時候（月經遲來第八天）用早上的第一個小便尿液驗的，結果是一條線。
29號中午驗了也是一條線
請問我該怎麼辦
要繼續驗還是看醫生比較好呢？
另外我月經一直也是不太穩定的（平均遲4天左右），不知道有沒有關係…
謝謝看到這裡的你們，我真的好害怕…
Hello 歡迎你問我地任何同性相關嘅問題呀，我地會盡力解答你嘅，唔會有任何「不妥」㗎！ 
首先想同你解釋返，月經係由身體幾個系統配合而形成嘅。呢啲生理現象好容易受到其他因素影響，例如荷爾蒙分泌、飲食、作息、壓力、藥物等等。每一個月經（由月經嘅第一日到下一次月經出現嘅前一日係一個週期，長度由21日至35日不等）都係一個全新嘅週期，唔一定會同之前嘅週期嘅長度、流血日數、流血量等相同㗎。 
你自己都有發現自己嘅月經週期未必次次一樣，都想問返你多少少詳細資料。你所講嘅「平均遲4日」係以咩為標準？ 
係你自己月經週期嘅平均值？定係網絡上所講嘅平均值28日？ 
如果你係以所謂「28日平均值」去計算，而你多數月經週期都係比28日多4日，咁其實你平均嘅月經週期係（28+4=）32日，呢個都係好正常嘅月經週期長度。但如果你有用app去記錄低你嘅月經，計咗平均數而你又平均會「遲4日」，咁可能都係相對比較大嘅浮動。如果有連續幾個週期都有好大嘅變化，咁就可能要諮詢下醫生睇下有冇一啲病理性嘅原因。 
喺發生性行為後7日驗孕已經可以得到初步結果，而11日後就會得到比較準確嘅結果。你3月25號同29號嘅驗孕結果已經可以確定3月13號發生嘅性行為冇導致懷孕。所以今次月經未出現並唔係因為懷孕。你會唔會呢排瞓得比較少？或者有冇服用過藥？呢啲因素都可能影響月經㗎。可能你擔心自己懷孕嘅呢一種緊張情緒，都影響咗月經。 
建議你嘗試放鬆下心情，月經會出現嘅！ 
下次再發生性行為嘅時候，記得要做好安全措施，咁就可以更加安心咁享受性歡愉啦。安全套既可以避孕，又可以防止性病同其他感染嘅風險。只要性行為全程都正確使用安全套，風險係好低嘅（安全套喺完美使用嘅情況下避孕成功率有98%，而一般使用嘅情況下有82%），關於正確使用安全套嘅資訊，可以參考：https://www.instagram.com/p/B4EX0FVFLUf/?utm_source=ig_web_copy_link
至於你有講到你月經唔穩定，首先要再睇下你計算月經週期嘅方法係咪正確，同埋要了解清楚你係以咩為標準先。網路上流傳嘅「28日」唔係統一嘅標準，未必個個都係呢一個週期長度，你要睇返你自己嘅月經情況。如果你了解完計算方法，發現自己每個週期差距真係比較大，咁就可能要睇下醫生，檢查下你嘅荷爾蒙分泌係咪正常，或者有冇一啲子宮／卵巢方面嘅狀況。 
但如果每個週期有幾日偏差，其實都係正常，通常係因為我上面提及過嘅嗰啲原因導致。
如果檢查完你嘅月經狀況係冇病理原因嘅影響，而月經唔穩定呢樣嘢對你造成困擾，你想月經更加穩定，你都可以考慮需唔需要服用避孕藥。避孕藥有避孕嘅功效（正確服用嘅情況下，避孕成功率有99%；但如果想防止性病傳播，就要配合安全套一齊使用），同時因為當中嘅人造荷爾蒙成份，都有穩定月經嘅作用。雖然避孕藥好容易購買到，但我地建議第一次食藥之前要睇醫生，等醫生評估下你嘅身體狀況係咪適合服用，同埋適合邊一款避孕藥。現時家計會診所、母嬰健康院、部分私家診所或醫療中心都有呢個服務嘅，有需要你就去諮詢下啦。
1個讚
多謝你回覆真係好迷惘，坊間既資訊好混亂…雖然想睇醫生，但都唔知係隨便搵一間醫生就得。
而且性呢一樣嘢好難同父母開口，尤其是冇黎m呢啲可能係懷孕既問題。驗孕都係自己偷偷地驗。
如你所講，月經週期應該係32日左右，但其實都不準確，12月既時候我預定黎m既日子係12月23左右，但最後1月16日才來。我也不太清楚正不正常了
害怕的我今早再驗了一次也是沒有懷孕。應該可以放心一下（希望自己不是特殊案例，陰性懷孕甚麼的。
謝謝你的回覆
辛苦你了，我會努力找醫生的
另外講下，家教會個個排期真的好慢
我上年3月的時候也嘗試食避孕藥，係家教會個到配既，叫安易避。食左三個月，個人肥左3公斤仲要日日都好嬲好唔舒服，所以最尾就停左，即刻瘦翻
避孕藥對唔同人都會有唔同嘅副作用，你可以試下同醫生講你有咁嘅情況，睇下醫生會唔會幫你轉第二隻藥，令你情緒無咁波動同埋減緩體重增加嘅情況。 
唔同人對同一隻避孕藥嘅反應都唔同嘅，所以有好多人都要試第二次甚至試多幾次先會知邊隻藥啱自己嘅，如果你都希望繼續用避孕藥作為一個避孕措施嘅話，都可以帶埋你食緊嘅藥去家計會俾醫生幫你睇下，會唔會轉第二隻藥會好啲。 
另外，你無食藥之後，身體已經恢復返生育能力架啦，如果無計劃懷孕，係性行為嘅成個過程就要用其他安全措施啦。 