擔心懷孕一問

我已經食左yasmin3個月,每日都有準時食藥,食到第6日既時候男朋友外射,但可能有射咗d精液起毛毛,請問懷孕機會高唔高?

你好呀 @Natashasha :wave:

都想知道你講嘅食咗6日意思係食第一盒藥嘅時候你食咗6日就發生性行為,定係食到第三盒藥你食咗6日? :thinking:

如果係食緊第一盒藥,都會有懷孕嘅風險嘅,因為藥物仲未喺身體裏面建立到功效,所以一般我哋都會建議係啱啱開始食嘅頭七日用額外嘅安全措施,例如安全套。 :grin:

如果你已經食到第三盒藥,咁基本上唔使擔心嘅,因為藥物已經係身體建立咗藥效,懷孕嘅風險係非常低嘅。

而你食咗避孕藥之後,其實體外或者體內射精懷孕嘅風險都無太大分別嘅,因為身體裡面已經有藥效架啦。 :laughing:

另外都想話你知,體外射精並唔係一個有效嘅避孕方法,因為陰莖興奮勃起嘅時候,會有一啲透明液體流出,果啲叫尿道球腺液,裏面可能會含有少量嘅精子,導致懷孕只需要一粒精子同埋卵子結合,因此體外射精並唔係一個有效嘅避孕方法。 :grin:

多謝你解答吖,我係第三盒藥既第六日,咁應該無問題的!但係再想問,除咗第一盒藥既頭七日要額外保護措施,之後即使食完21日,停藥七日後(開始第二盒)時都唔需要用套?

如果你食緊嘅藥嘅服食方法係每食完一包(21粒)就停藥七日再開新藥的話,咁即使係你開第二合藥嘅時候頭七日都冇需要額外做其他安全措施。除非係上個月之內你有試過漏食藥或者出現過其他特別情況,例如嚴重屙嘔以致影響你食藥嘅習慣,否則其實經過咗一個月每日準時食藥,藥效都會喺身體內穩定咁建立咗。當然,如果你都擔心衛生嘅問題或者想減低感染可以經由性行為傳播嘅疾病嘅機會,或者想進一步提高避孕功效,都係可以喺性行為期間使用埋安全套~