我女朋友上個月27號黎m，今個月照計應該係30號黎但而家都未黎遲左3日。12，19，26號號都有發生性行為，但無套外射，19號有帶套。女朋友而家都未有黎m既感覺，而家好憂慮
你好呀 @Watermelon 
因為你無使用安全套，都會有懷孕嘅風險嘅。雖然你有體外射精，但係陰莖興奮勃起嘅時候，會有一啲透明液體流出，果啲叫尿道球腺液，裏面可能會含有少量嘅精子，而導致懷孕只需要一粒精子同埋卵子結合，因此體外射精並唔係一個有效嘅避孕方法。
你可以同女朋友係今日去驗孕，已經可以準確咁知道12同19號果次性行為有無懷孕架啦。而26號果次就要等你多兩日驗先有初步結果，都可以係11日後驗孕得到更加準確嘅結果架。
影響月經週期嘅因素有好多架，例如最近係咪瞓得唔夠、會唔會食緊啲乜嘢藥物、情緒會唔會好大嘅波動、會唔會係病咗、生活習慣會唔會有好大嘅改變等等，都會有可能令月經週期改變，而月經遲到呢件事係好平常嘅，好多人都會經歷，所以唔洗太擔心住先，可以觀察多幾日。
同埋如果你地無計劃準備有BB嘅話，係需要每次性行為都要使用安全措施以避免懷孕嘅。
今日驗左無懷孕，但都仲未黎m，有冇方法可以令佢快啲黎？
Hello
你地今日嘅驗孕結果，可以準確咁肯定3月12同19號嘅性行為冇導致懷孕，同時都係3月26日嗰日性行為嘅初步結果。 
正如Kaleo所講，月經會受好多其他因素影響嘅，月經週期發生變化係好正常好常見嘅事。現時暫時都冇乜特別可以做到，放鬆心情，月經應該會好快出現嘅。
見你想女朋友盡快嚟m，都想了解多啲點解你會想佢月經快啲出現？ 
係依然擔心緊佢有機會懷孕，要見到月經出現先放心？ 
既然而家驗孕結果係冇懷孕，咁就要嘗試相信個結果，令到自己放鬆啲。如果你地真係仲好擔心，可以聽日驗多次。但係要設立個目標比自己，如果見到驗孕結果係陰性，咁就要去相信個結果，唔好再咁擔憂。
定係女朋友有經前症狀，有類似「谷m」嘅感覺所以想快啲嚟？ 經前症狀都係好常見嘅，隨著月經出現就會消退。所以耐性等待下啦。
同埋都想提返你地，唔建議自己隨便用一啲「偏方」去催經，例如飲涼茶／薑茶呢啲 
。因為未知身體狀況嘅情況下，用咗呢啲方法反而有機會有反效果或者對身體造成其他負面嘅影響。如果你真係好擔心，或者女朋友平時月經週期都會比較浮動，你地都可以考慮去睇下醫生檢查下。婦科診所或者家計會診所都有呢啲服務嘅。有時醫生睇完身體狀況之後，會俾一啲荷爾蒙藥物達到催經效果，不過呢啲情況通常都要係月經比平時週期遲至少兩三個星期、同埋要醫生檢查完覺得真係有需要先會俾藥嘅。
所以暫時都係放鬆啲，月經自然會出現嘅。
記得下次再發生性行為嘅時候要全程正確使用安全套，咁就可以更加安心咁享受啦～ 
用咗曼秀倫敦嗰支驗孕棒，應該都準？但無係朝早驗應該都準？因為用app計既話已經遲左7日啦，佢而家個肚有d脹咁，唔知係咪谷m?雖然知驗孕棒顯示係冇懷孕但佢而家都未黎有d憂慮
如果擔心只用一個牌子嘅驗孕棒驗孕結果唔準確嘅話，可以買另一個牌子再驗多次，如果結果都係陰性就係無懷孕架啦 每個牌子嘅驗孕棒嘅使用方法都唔一樣，所以最緊要係按照說明書嘅指示進行驗孕，如果說明書列明喺預計黎經嘅日子驗孕，可以喺當日嘅仼何時段驗孕嘅話，咁即使唔係用晨尿驗都唔會影響結果嘅準確性
明白出現左黎經前嘅症狀但又遲遲未黎經一定會覺得好擔心
建議你地好似ching咁講考慮下去睇醫生了解返身體狀況，咁就唔洗估估下咁憂慮啦
尋晚買左另一個牌子驗都係陰性，今日都係未黎我女朋友好擔心，之前佢d經期都算準，最多都係差一兩日，上年有試過遲左7日，但今次仲耐
係咪應該去睇醫生？睇既話係咪去普通家庭醫生都得？定要去一d專科？中醫係咪都得？
唔一定要去專科嘅。坊間就比較少中醫有驗孕嘅服務，建議你都係搵返西醫或者家計會比較好。如果驗咗嘅話，因為係性行為後11日驗同埋嘅時間都接近你月經嘅時間，其實個結果已經非常可信架啦，唔洗擔心嘅。不過如果你都係擔心嘅話，都可以去搵診所幫你驗血嘅，驗血已經係最準確嘅方法，要留意唔係間間診所都可以提供驗血嘅服務，可能要打電話去問下先知道有無，同埋驗血報告都需要一段耐啲時間先知道嘅，未必係咁快可以知道嘅，亦有啲人會選擇照超聲波嘅，比較即時但係價錢就相對貴啲。
同埋你依家驗孕之後，都確定咗唔係懷孕，但係都擔心月經遲嚟嘅情況，都可以去婦產科或者診所見醫生嘅，醫生都會視乎情況或者開啲催經嘅藥物俾你嘅。