事前避孕藥可以中途停藥嗎?

女朋友第一次食Yaz,我地喺第十幾日左右中出過,到依家20日左右因為身體不適(說明書寫嘅副作用齊哂)想停藥。如果依家突然停藥會唔會有咩問題?抑或一定要食哂一盒?

Hello
首先想了解返女朋友食藥之前有冇睇過醫生先㗎?雖然避孕藥好容易自己買到,但市面上有好多唔同種類(唔同款有唔同嘅人造荷爾蒙成份同劑量),而且唔係每個人都適合食避孕藥嘅(例如有心臟/肝功能/免疫系統問題嘅人就未必可以服用避孕藥)。所以我地建議第一次食藥之前要睇醫生,等醫生詳細檢查下身體係咪適合同埋適合邊款避孕藥。而服用一段時間後,即使身體冇乜特別反應,我地都建議每年去見一次醫生,睇下仲適唔適合繼續食呢款藥。 :woman_health_worker:t2: :man_health_worker:t2:
如果女朋友未睇醫生就食,咁就要盡快去睇下醫生先。現時家計會診所/母嬰健康院/部分私家診所都有呢個服務嘅,有需要就去預約啦。

其實服用避孕藥出現副作用(例如頭暈、作嘔作悶、情緒波動大、胸脹等)係好常見嘅,因為身體需要一段時間去適應人造荷爾蒙,同埋建立藥效。不過每人身體狀況唔同,出現邊啲副作用、副作用嘅感覺有幾明顯都會因人而異。通常一至三個月之後就會慢慢適應,副作用會消退;但亦有啲人需要比較長嘅時間去適應,可能要6個月先會完全適應到。不過有啲人嘅副作用情況相對比較嚴重,需要同醫生商量轉食另一款避孕藥,甚至有啲人要嘗試幾款唔同嘅避孕藥先搵到最適合自己身體狀況嘅藥。 :grimacing:

因為唔清楚女朋友嘅身體狀況,所以都係建議盡快諮詢下醫生建議。如果突然自行停藥嘅話,有機會影響身體嘅荷爾蒙分泌。但如果女朋友有呼吸困難/昏迷呢啲比較嚴重嘅副作用嘅話,就要考慮即刻停藥並盡快睇醫生。或者如果你未必聽日約到醫生,想停咗藥先,其實都係可以嘅。不過要提返你,停咗藥之後就唔會再有避孕功效,如果要發生性行為,記得要用安全套。同埋因為身體荷爾蒙受到影響,要有心理準備嚟緊月經會受到影響,唔可以再根據以往嘅月經週期/藥物週期去推斷月經會幾時嚟啦。 :nerd_face:

如果佢有正確服用藥物,喺月經週期頭7日內開始服藥(月經出現嘅嗰日係月經週期嘅第一日),中間冇漏食/冇肚瀉、嘔吐呢啲狀況,咁你地第十幾日嘅性行為懷孕風險係好低嘅唔使擔心。 :wink: