食左Yaz優悅幾個月，一直都好準時咁黎m。
正常食完第4粒白色之後果日就會黎m，之後就開一排新的。如果食完第4粒白色的第二日都未黎m，應該直接開一排新的定等黎左m先食新果排？
感謝 
Hello
首先想了解返你食藥之前有冇睇咗醫生先㗎？雖然避孕藥好容易自己買到，但市面上有好多唔同種類嘅避孕藥，而唔同款有唔同嘅人造荷爾蒙成份同劑量；而且唔係每個人都適合食避孕藥嘅，例如有心臟／肝功能／免疫系統問題嘅人就未必可以服用避孕藥。所以我地建議第一次食藥之前要睇醫生，等醫生詳細檢查下身體係咪適合食避孕藥同埋適合邊款避孕藥。而服用一段時間後，即使身體冇乜特別反應，我地都建議每年去見一次醫生，睇下仲適唔適合繼續食呢款藥。
如果你之前未睇醫生就食，咁就可以盡快去睇下醫生先。現時家計會診所／母嬰健康院／部分私家診所都有呢個服務嘅，有需要就去預約啦。 
現時市面上常見嘅避孕藥係通過服用人造荷爾蒙（雌激素加黃體素），抑制人體產生荷爾蒙同埋抑制排卵；同時都會改變子宮內膜嘅環境。而Yaz避孕藥入面含有極低劑量嘅雌激素（暫時係市面上最低劑量），用最少嘅劑量去達到抑制人體荷爾蒙分泌嘅效果，好處係減低咗雌激素帶嚟嘅副作用，例如水腫、乳房不適；但低劑量嘅雌激素有機會令到子宮內膜增生不足，所以有機會出現月經血量好少／甚至冇月經出現呢啲狀況。 
正常情況下，Yaz避孕藥係食完28粒之後唔需要等，即使月經未完／未出現，都要食新嘅一排。所以回應你問題所講嘅情況，食完四粒白色之後嗰日冇嚟月經都應該繼續開新嘅一包服用嘅。 
但如果呢個現象都會令你覺得擔心，都可以約見醫生檢查一下再作決定。如果暫時未約到睇醫生你想停藥先都係可以嘅，不過記得停藥後就無咗避孕功效，同埋再食返藥月經週期都係有可能受到影響嘅。