月經後中出

平時嚟M有7日,週期28天,係第八日中出安全嗎?

Hello
首先想了解返你所講嘅「安全」係指啲咩?係關於意外懷孕風險?定係關於性病感染嘅風險? :face_with_monocle:

如果你係擔心意外懷孕嘅,其實你今次嘅性行為都有一定嘅懷孕風險。即使你平時嘅月經週期都好規律,但排卵同月經係好容易受其他因素影響嘅,例如飲食、作息、壓力、藥物,所以唔建議用所謂嘅「安全期」作為一種有效嘅避孕方法。即使上個月嘅月經週期係28日,都唔代表下一個都必然係28日。而且要等月經出現先可以計算到過往呢個月週期嘅數字係幾長,再去大概估算幾時係排卵日,從而去估計所謂「安全期」或者「危險期」嘅日子。即使我哋知道週期係幾長,其實都唔可以單憑日子去準確判斷確定到底係邊一日排咗卵。而且有啲人甚至會係月經期間就已經排卵,所以即使係月經期間都唔代表係完全無懷孕嘅風險。另一方面,坊間常講嘅安全期(呢個計算方法係假設每個月週期都係一定28日,而且都一定係第14日排卵嘅時候先適用)都係指月經前7日同月經開始起計7日(所謂嘅前7後7),而你哋係第8日發生內射嘅性行為其實當日都已經超出咗所謂嘅「安全期」。再加上精子進入體外之後喺適宜嘅環境下可以生存2至3日,如果呢段時間內排卵嘅話,就會有機會懷孕。 :confounded:

如果你擔心嘅,你可以喺性行為發生後嘅72小時或120小時內進行緊急避孕(緊急避孕藥或者子宮環),呢兩種方法都要由醫生處方/置入體內嘅。現時急症室、家計會診所、母嬰健康院、部分私家診所都有緊急避孕服務提供嘅,有需要就盡快預約啦。 :blush:

如果你衡量完風險,決定唔進行緊急避孕,咁你都可以考慮自行驗孕。喺性行為7日後驗孕會得到初步結果,11日後驗孕會得到比較準確嘅結果。

至於性病感染,無套性行為係高風險嘅性行為,因為性器官同體液有直接接觸。如果對方感染咗性病嘅話,呢次性行為都會有相對比較大嘅風險。如果你唔清楚對方嘅身體狀況,你擔心嘅,你都可以預約進行性病測試,預約嘅時候要問清楚「空窗期」要等幾耐。社會衛生科會建議喺性行為後3個月進行測試,會有比較準確嘅梅毒/HIV嘅抗體測試結果;而部分私家醫療機構會有所需「空窗期」比較短嘅測試提供。如果有需要就去詢問下。 :relaxed:

建議你再發生性行為嘅時候,要記得全程正確使用安全套,咁就可以更加安心咁去進行性行為啦。關於正確使用安全套嘅資訊,可以參考:https://www.instagram.com/p/B4EX0FVFLUf/?utm_source=ig_web_copy_link

感謝回覆:bowing_woman:t2:
因上網睇過,啲意見都係一半一半,
有啲就話係安全期,有啲就話係經後第一日內射就中獎,所以都好疑惑

所謂安全期內發生性行為嘅懷孕風險會比較低嘅原因,係因為避開左受孕嘅日子 。不過正正因為每個女性每個月嘅週期數字都可以有變化,所以都唔能夠準確知道排卵日係幾時,同埋幾時係安全期:pleading_face:

所以都要提醒番安全期避孕法失敗率係好高嘅。正如 @Ching_StickyRiceLove 在上文提及過,月經週期有好多原因可以導致出現變化 ,例如最近呢個月有生病服過藥、飲食唔均衡、生活唔定時、情緒有起伏、壓力過大等原因,都會令黎月經週期變長/變短,令我地難以準確預測「安全期 / 危險期」。再加上精子能夠在體內存活2-3日,所以即使係月經期間或來經後發生唔安全嘅性行為,都會有懷孕嘅風險 :persevere:

因此,我地都唔建議盡信或者依賴月經週期計算器/安全期計算法,推測「排卵期/安全期」,去發生唔安全嘅性行為:pleading_face:

如果有其他嘅疑問,或者對於緊急避孕方面有其他嘅顧慮,都好歡迎你繼續同我地糖不甩分享啊 :relaxed: