我2月食事前 第一個月食完第二日黎m 跟住到而家第二個月嘅月經期4日無黎！係咪會遲黎？會唔會有左？每日都有食藥
Hello @bobon 
首先，想了解一下你係服用邊一款避孕藥？你所講嘅月經期，係咪指服用非活性成分嘅藥丸期間果四日？而到今日為止，距離月經期已經遲左幾多日未黎月經？
同埋之前有無發生過唔安全嘅性行為，有的話係大概幾時發生？
見你有提及到2月開始服用避孕藥，依家大概服用左兩個月時間。服用避孕藥初期，由於身體需要時間適應荷爾蒙嘅轉變，所以依家月經週期係會相對唔穩定嘅，亦有機會係食完最後一粒非活性成份藥丸後先出現月經 
，係正常嘅情況。
而月經來遲嘅原因，如果無發生過唔安全嘅性行為，而且只係遲左幾日月經未黎，暫時都無需太擔心啊 。想了解下你呢個月有無咩特別嘅情況出現過？例如服用過其他藥物、情緒有起伏、壓力過大、生活作息唔定時⋯⋯等等有機會影響荷爾蒙嘅情況？ 因為以上情況，都有機會導致月經來遲嘅原因。
最後，都想了解番你服用呢款避孕藥之前，有無到家計會／婦科診所諮詢過醫生嘅建議？ 
因為每個牌子／款式嘅避孕藥內含有嘅荷爾蒙類型同埋劑量都會有唔同，有機會某部分避孕藥唔適合你嘅體質，係有機會引致嚴重嘅副作用。而且避孕藥亦並非每個人都適合服用，一般常見唔適合食藥嘅情況，例如有心血管疾病、不規律陰道出血、體重過高等。所以一般都會建議服用避孕藥之前，必須諮詢醫生嘅意見，等醫生評估你嘅體質／生活習慣，係咪適合服用避孕藥，或者適合服用邊一個牌子／款式嘅避孕藥。
所以，如果服用避孕藥之前，未諮詢過醫生意見的話，其實都會建議搵醫生諮詢一下先，咁樣之後繼續服用都會比較放心 而睇醫生嘅時候，都可以同醫生講你宜家服用緊邊一款避孕藥，睇睇醫生覺得係咪適合繼續服用，或者有其他牌子／款式嘅避孕藥比較適合你 。