第一次好驚

我本身12號黎m 但12號都未黎 係同一日同男朋友做完 冇帶套外射 依家分泌物出現啡色同少少血 個胸好痛好似就黎黎m 會唔會有左架?

你好

因為你地無使用任何嘅避孕措施,所以會有懷孕嘅風險。陰莖係勃起嘅時候,會分泌一種透明嘅液體,叫尿道球腺液,裡面會含有少量精子,都會有導致懷孕嘅風險,所以體外射精並唔係一個有效嘅避孕方法嚟架:bangbang:

另外,我地自己憑日子去預計經期係唔係好準確嘅,好似你今次預計自己12號會嚟,但係都未嚟嘅,因為月經週期有好多原因可以導致出現變化 ,例如最近呢個月有生病服過藥、飲食唔均衡、生活唔定時、情緒有起伏、壓力過大等原因,都會令黎月經週期變長/變短。 :smiley:

知道有好多人都會用呢啲日子去推斷安全期或者危險期,但係安全期唔係一個有效嘅避孕措施嚟架,因為一個月經週期係計第一日嚟月經去到下一次嚟月經之前果一日,所以一日未嚟月經,我地都唔能夠知道你嘅月經週期有幾長,變相都唔可以話知道你嘅安全期或者危險期係幾時架。而且唔係每個人嘅週期日子都係好似啲app或者網上嘅計算器咁係28日,甚至未必每個月都一模一樣,所以計算安全期並唔係一個科學嘅避孕方法。同埋就算嚟緊M都唔代表唔會懷孕嘅,因為有啲週期比較唔穩定嘅人就算係嚟緊M期間都會排卵,甚至係嚟完M之後就已經排卵,而卵子排出後係身體都可以生存到2-3日,如果接觸到精子都會懷孕嘅。 :wink:

你可以聽日買驗孕棒去驗孕嘅,因為聽日已經係發生性行為後11日,驗孕嘅結果都非常可信架啦,可以睇下自己係咪真係懷孕嘅,不過記住要跟說明書上面嘅方法去做,同埋係指定嘅時間內睇結果呀。 :bangbang:

另外你都有講到流啡嘅情況,可能你上網會search到「著床性出血」或者「假M」咁樣,但係著床性出血都係著床嘅時候先會出現嘅,姐係性行為後6-9日呢段時間,但係呢件事都唔係咁常見嘅。不過你原本預計12號會嚟月經,但係果日無嚟到而你又有發生性行為,都有可能果日係排卵日嚟嘅,所以你聽日最好都去驗孕先呀。 :smiling_face_with_three_hearts:

雖然胸痛或者有分泌物都有可能係嚟月經前嘅症狀,但係因為有好多因素影響到呢個情況會出現,所以都唔能夠判斷係咪嚟月經或者懷孕。 :nerd_face:

如果無計劃生育嘅話,下次記得用避孕措施啦~ :innocent: