停左避孕藥急問😢

我食左大半年yaz事前避孕藥,係上次完月經之後停左食,宜家停左大半個月左右,我有mark低月經期尼既時間,大約係7日之後。
1)呢次係停藥之後尼m,請問係咪有機會唔準時尼or遲尼架?:pray:t2:
2)我係今個月1-6號尼m,照計平時食藥28日應該14號係排卵期,但係我20號冇用安全措施🥲想問風險大唔大?:cry:
唔該哂:pray:t2:

:sob::sob:

你食緊避孕藥嘅時候其實係靠人做荷爾蒙去抑制咗排卵,所以食緊避孕藥嘅時候並唔會有「排卵期」,因為身體係唔會排卵嘅。而食緊避孕藥都有「月經」出現,其實係靠Yaz當中4粒冇活性成分嘅白色藥丸造成身體荷爾蒙水平下降,令子宮內膜就會脫落,模擬天然月經嘅出現嘅情況,令使用者感覺自己係有如常嚟經,亦係無懷孕嘅指標。 :nerd_face:

而停咗藥之後,因為身體需要啲時間去適應同埋要自己分泌返荷爾蒙,尤其你已經食咗藥大半年,身體未必會即刻回復返食完藥之前嘅狀態。所以係有機會頭幾個月嘅月經週期比較浮動嘅,變相亦更加難去預計月經嘅日子。食藥時嘅28日一個週期亦唔能夠再應用返喺而家你嘅身體入面。而即使過咗一段時間身體適應咗,其實每次月經週期嘅長度都有可能唔同,因為月經會受好多唔同因素影響,例如荷爾蒙分泌、飲食、壓力、藥物等等。而「排卵」同月經一樣,都會受到好多唔同因素影響,而且排卵日係等月經出現之後推算返邊一日係排卵日,所以我地唔可以好準確咁預計到究竟邊一日排卵。再加上你啱啱停藥,排卵同月經週期都可能會比較浮動嘅。 :persevere:

停咗藥之後身體已經無咗避孕嘅功效,亦唔會係好似食藥期間必定係28日一個週期,所以如果發生性行為嘅話係需要用返安全套呢啲安全措施嘅。所以20號嘅性行為都有一定嘅懷孕風險。如果你擔心嘅,你可以盡快去見醫生進行緊急避孕,緊急避孕藥要喺唔安全性行為後72小時或120小時內服用。現時家計會診所、急症室、母嬰健康院、部分私家診所都有呢個服務嘅,有需要你就去預約啦。如果你決定唔食藥而你又擔心嘅,你可以考慮自行驗孕。喺性行為7日後驗孕可以得到初步結果,而11日後驗孕會得到比較準確嘅結果。 :blush: