男朋友情緒病

同男朋友已經兩年,第一年拍咗第九個月嘅時候佢就話對生活冇任何動力我覺得我唔係佢Soul mate , 突然間分開咗。
搵佢佢就話過咗佢嘅底線,喺街度跑。之後知道佢有財政嘅困難我就去幫咗佢,我哋之後一齊返佢話同我會有將來會去保護我同照顧我,亦承認佢分開個陣多年既情緒病返發,(識佢嗰陣係唔知)
到第二年10月嗰陣時知道佢開始加碼投資,每個禮拜諗住關心佢情況,但係佢就會喺街嗰度跑,喺房嗰度掉嘢,喺床上大叫,訓個陣成日覺得有鬼,要開燈。但我都係一直陪伴佢,都真係輸咗好多錢嘅時候,佢就話唔愛我,話我唔明白佢,內心有個石頭一定要打開, 話要捐窿,話要settle 好多野,跟住又同我講分開, 話唔愛我,甚至佢跪喺我同佢阿爸面前話對我唔好,照顧唔到我,佢話同我一齊其實係我會更加唔開心佢覺得我會搵到一個比較好嘅人,我感覺到佢情緒病嚴重咗好多但係佢有繼續去投資。
我自己都好擔心亦都覺得我有情緒病,依家佢係辭咗職甚至搬咗出去住我又打唔到俾佢你可以教我點做嗎?

我知道佢有情緒病但我呢一刻又好想去搵佢。都知情緒病嘅人好需要空間你可以教我點做嗎?

Hello 好多謝你信任我地同我地分享。 :sparkling_heart:

都好明白近來男朋友發生嘅呢啲事可能都對你做成好大困擾。你好關心同埋擔心佢,尤其嘅情緒狀況有好大變化,而呢啲變化會令你不知所措好緊張。 :confounded:
都想了解返多少少,你介唔介意講下男朋友係有咩情緒病,暫時係咩狀態,係相對輕微定係比較嚴重?

另外見你講到話好擔心佢投資嘅呢種行為。其實會唔會係佢之前嘗試緊用投資呢種方式去舒緩同應對佢嘅情緒問題,而依家可能投資情況唔太理想,令佢更加有情緒壓力。所以可能佢情緒壓力嘅來源未必係同你嘅關係,而係其他因素,而佢嘅情緒壓力影響咗佢點樣去應對你地嘅關係。

同埋都想了解下男朋友身邊嘅人,例如朋友/家人/同事知唔知佢嘅情況?同埋佢有冇接受緊一啲跟進,例如見臨床心理學家或者精神科?可能呢一刻男朋友最需要嘅係一啲專業嘅幫助。如果佢之前有接受緊治療嘅,都可以建議返佢繼續治療嘅。 :relaxed:

都好明白你好擔心佢好想盡快揾佢,但呢個時候不妨俾自己冷靜下。暫時最緊要嘅唔一定係你哋呢段關係,而係佢嘅狀況。可能佢需要嘅係陪伴同支持,但佢未必想處理親密關係。咁你會唔會想以朋友嘅身份去陪伴佢幫助佢,暫時唔去處理「女朋友」呢個身份住?你會唔會可以接受到咁樣?

同埋因為都牽涉到情緒病,我地網上嘅文字交流未必可以好清晰,可能一啲專業嘅知識可以更加幫助到你地。你都可以嘗試搵一啲專門做情緒病嘅機構或者服務,可能佢地可以俾到更加適切嘅幫助。你可以參考下呢啲資料:

https://www.jctourheart.org/contactUs

同埋你同埋男朋友都要了解,情緒病其實好普遍。雖然未必可以完全消除,但經過一啲嘅治療同埋輔導,生活都可以得到好大嘅改善嘅。所以如果一種治療/應對方式唔得,唔代表要放棄嘅,總會搵到適宜嘅方式令到日常生活去到比較舒適嘅狀態嘅,只要願意去嘗試搵幫助。 :blush:

至於情緒病需要空間呢樣嘢,其實都好視乎唔同嘅情況,而「空間」嘅定義都可以好唔同。有時情緒病人其實更加需要身邊人嘅支持、陪伴同埋理解。但如果男朋友未準備好想見到你,或者未準備好要處理你地之間嘅關係,或者佢呢一刻未必想要你嘅陪伴,又或者佢現階段會更加想自己一個嘅,咁你都要尊重返佢嘅決定嘅。

如果你冷靜咁整理完自己嘅諗法,都係想以朋友嘅身份去搵佢陪佢,你都可以再嘗試聯絡佢嘅。如果佢未必準備好要傾電話嘅話,你都可以用文字同佢講,你想以朋友嘅身份去陪伴佢,同佢去尋求專業嘅幫助。睇下佢會唔會回覆你同埋接受你嘅幫助。如果佢依然唔回覆,或者唔想要你嘅幫助嘅話,都係要尊重返佢嘅決定嘅。

如果你覺得自己情緒壓力都比較大,記得多啲搵下信任嘅人傾下偈放鬆下。有負面情緒好正常,但有時積聚得太多負面情緒都唔係一件好事,所以我地都要去照顧下自己同埋自己嘅情緒。你都可以嘗試搵下輔導員呢啲專業人士幫你,可能佢地幫你疏離完你嘅情緒之後,你會更加識得點樣去處理呢件事。 :smiling_face_with_three_hearts: