應該點做好🥲

其實之前試過同男朋友做 好彩都冇事
但每次做完都好驚會有事 明明已經盡量避晒啲排卵期 黎m前幾日先做 冇內射 個套又冇穿 但係都好驚會有左右 之後開始決定唔搞 但淨係用手同口解決又覺得唔夠 應該點做好:pensive:
利申未夠16

Hello
首先想同你解釋返一啲法例方面嘅嘢。喺香港合法發生性行為嘅年紀係16歲,與16歲以下女童性交有機會被判監禁5年,而與13歲以下女童性交有機會被判終身監禁。希望你同男朋友了解完呢啲法律風險,做出知情選擇。

回應返你嘅問題,其實安全套喺正常使用(typical use)嘅情況之下有82%避孕成功率,而喺完美使用(perfect use)嘅情況下有98%避孕成功率,而只要性行為全程都有有正確使用安全套,有足夠嘅潤滑,安全套冇過期冇破損或者漏嘅話,其實避孕成效係好高嘅。而且其實係唔需要喺有用安全套嘅情況下體外射精,因為射精比較難控制,如果要喺射精前抽出陰莖反而有機會增加咗安全套脫落嘅風險。關於安全套嘅更加多資訊,你可以參考: :nerd_face:

安全套正確佩戴方法:https://www.instagram.com/p/B4EX0FVFLUf/?utm_source=ig_web_copy_link

令安全套失效嘅原因:https://www.instagram.com/p/CM4ereiDmIl/?utm_source=ig_web_copy_link

見你有講到關於排卵期呢樣嘢,都想同你解釋返,其實月經同排卵係會受好多因素影響嘅,例如荷爾蒙分泌、飲食、作息、壓力、藥物等等。而且排卵期係要等月經出現之後再推算返排卵期係幾時。所以除非每日都用排卵試紙去測試,否則我地都好難好準確咁知道究竟幾時排卵。一啲手機app嘅紀錄只係一個大概嘅估算,未必準確嘅,因為每個月經週期你嘅身體狀況都有機會唔同,尤其你依家青春期,荷爾蒙分泌可能比較容易唔穩定。

見你其實都有好大嘅擔心,每次發生完性行為都會好緊張。其實都係一個好好嘅機會去睇下自己係咪真係準備好去發生性行為?如果你目前即使有用安全套嘅情況下都係會好擔心懷孕風險嘅,其實都可以做一啲低風險嘅性行為,等你心理上真係準備好,再去進行下一步都係可以嘅。而你有講到淨係口交手交會覺得唔夠,都會想了解多少少你所講嘅唔夠係邊方面?係你自己覺得性歡愉性刺激唔夠?定係你覺得同男朋友之間嘅關係係要有插入式嘅性行為先夠?其實性行為係冇標準嘅,最緊要你同伴侶溝通之後有共識,而你係覺得呢啲決定係令你舒服嘅,咁先係最適合你地嘅。你可以同男朋友一齊探索下你地鐘意點樣嘅刺激,其實口交手交一樣可以帶嚟好多歡愉,或者你地都可以考慮使用情趣用品去增加刺激嘅感覺。 :blush:

而如果你依然想進行插入式性行為,而你又想有更加高嘅避孕成功率,你可以考慮食避孕藥,配合埋安全套一齊使用。建議第一次食藥之前要諮詢醫生意見,你可以去家計會青少年保健中心/母嬰健康院預約嘅。避孕藥唔係16歲以上先可以使用嘅,因為佢同時有調節月經嘅功效,所以有好多年紀較細嘅人都會食用,唔使擔心自己未夠16歲會唔會唔可以買或者食藥。 :wink:

最後,雖然香港法例合法陰道交年齡係16歲,但假如日後你同伴侶係性行為過後發現安全措施失效,例如安全套意外爛咗,需要進行緊急避孕的話,家計會嘅青少年保健診所係有提供相關服務,亦唔會係無你同意之下同意其他人(例如家長或者警察)。所以,如果日後真係有意外發生咗,都要記住其實可以幫到你哋嘅人同機構有好多。我地糖不甩亦會可以陪伴你哋去面對唔同嘅事。唔好因為擔心年齡嘅問題而延誤咗向外求助嘅時間,越早尋求協助,可以選擇嘅方案就會越多~ :smiling_face_with_three_hearts: