關於女仔自慰、男女性行為/自慰後清潔下體同埋潤滑劑既問題

Hello,我係女,想問一問關於性行為/自慰清潔下體同埋潤滑劑既問題:

1)即使雙方係互相信任的伴侶,性行為後雙方是否都一定要清潔下體? 因為有時性行為後太攰可能唔想沖洗下體。咁女仔完事後清潔係咪只係需要洗外陰而唔需要洗陰道裡面?

2)我自慰會用手指,唔會用入陰道既玩具因為驚污糟,就算用洗好左既震蛋都唔夠膽將佢直接掂下體表面,要隔住內褲咁用。有時想插入陰道時會擔心手指會污糟,要加埋condom隔住先安心d… 我擔心女仔自慰手指污糟既問題,驚手指成日掂到物件上的病菌,會帶到去下體,如果菌入咗陰道更加係洗唔到。我就算已經用洗手液洗咗手抹乾咗,都唔敢將手指插入陰道,因為覺得陰道既結構係凹入去萬一有菌都洗唔到,因為聽講無論咩時候女仔都唔可以灌洗陰道。係咪女性陰道本身都有好菌,會自行對抗外來的壞菌?但都有機會消滅唔到d壞菌?

但其實係咪唔洗咁注意乾淨?因為有時有mood就唔想理咁多呢d細節… 有時我甚至擔心到覺得隔住內褲都覺得唔夠保護性會加埋護墊先肯掂自己,但隔咁多層就冇咩feel :dizzy_face:
其實係咪有剪指甲、用洗手液洗好咗手抹乾手之後,就可以將手指插入陰道? 咁女仔自慰完係咪都只需要洗外陰唔洗洗陰道? 同樣地其實如果有時真係攰得制自慰完想訓唔想沖洗下身,會唔會有咩感染? [上網真係冇咩女仔自慰衛生問題既資料…]

3)係咪真係無論咩時候女仔都唔可以自行灌洗陰道?

4)水性潤滑劑是否適用於市面上絕大部分的condom?因為有時唔肯定d condom係咩質地成份既時候,用水性潤滑劑就穩陣? 同埋潤滑劑是否可以殘留體內,塗完係身體上/陰道內都唔洗沖走?

————————————————————————————————
Sorry問咗咁多,我成日擔心性行為/自慰會令自己感染到病菌,希望糖不甩人員幫手解答,感激不盡 :innocent:

Hello~ 首先多謝你信任我地,同我地分享你對於性嘅疑問:thought_balloon:

1)的確性行為前後都建議雙方要沖涼,因為喺性行為期間有機會將細菌帶左入陰道,所以如果性行為後無沖涼嘅話,就有機會造成細菌感染,引發陰道炎。明白性行為後的確會好攰,所以都可以先同伴侶休息一陣先再去沖涼:blush:

另外,其實無論係性行為後定係日常嘅清潔,都唔需要亦都唔建議灌洗陰道,因為陰道本身係有好菌去平衡悪菌嘅,而如果灌洗陰道會影響左陰道嘅生態,令細菌有機可乘。所以清潔陰部時只需要用溫水溫和咁清潔外陰就足夠架啦~

2)的確陰道係有自我清潔嘅功能嘅,所以唔需要經由灌洗去保持清潔。至於使用玩具會唔會造成細菌感染方面,其實只要喺使用前有先清潔玩具,同埋用後有妥善保存玩具係可以有效避免細菌感染嘅風險嘅:relaxed: 清洗方面,只需要用溫和嘅梘液或者玩具專用清潔劑清洗就足夠,切忌使用含有火酒嘅消毒用品,而用完清潔好之後可以使用小型索袋或者密實袋保存玩具。

至於以手指自慰方面,同樣地,只要自慰前先清潔雙手,包括手指甲嘅位置,就可以有效避免細菌感染架啦:relaxed:

3)無錯阿~ 其實只要我地保持健康嘅生活習慣,陰道就有足夠嘅防禦能力去抵擋細菌,所以唔需要太擔心阿:smiling_face_with_three_hearts:

而如果陰道不適嘅話,都建議去睇醫生了解返身體狀況,而唔係自行灌洗陰道,因為有機會會令情況加劇。

4)係阿,水性潤滑液係可以同所有質料嘅安全套一齊使用嘅,另外其實矽性嘅潤滑液都可以配合安全套使用,只係因為佢唔易被人體吸收,所以會相對黏膩,不過潤滑嘅持久度亦都相對水性高。唯獨係油性嘅潤滑液係唔可以同乳膠安全套一齊使用嘅,因為佢會破壞安全套嘅表面,影響安全套嘅成效。

水性潤滑液本身容易被皮膚吸收,所以都唔需要太擔心殘留喺體內會影響陰道健康,如果真係好擔心嘅話,可以選擇標明係免沖洗,或者成份相對天然嘅潤滑液,不過本身性行為後都建議清洗陰部,所以都可以順便清洗埋外陰嘅潤滑液阿~