緊急!緊急!17歲女朋友有咗

女朋友17歲有左,合法做愛嘅,但係有左,有左1至2星期到,本身係想係家計會藥物終止懷孕,但係想知佢依個年齡17歲藥物終止係唔係一定要屋企人簽紙??因為佢真係唔想比家人知!同埋想知道個流程係點!唔該!:pray:t2:

Hello 首先想多謝你信任我地同我地講你嘅憂慮。
都想了解返,女朋友已經驗咗孕知道咗懷孕結果?定係你地而家未肯定係咪真係有懷孕?

關於家計會呢方面,無論咩年齡嘅人去家計會求診,家計會都唔會喺未經當事人同意之下通知家長/監護人嘅。而如果進行終止懷孕嘅話,即時未夠18歲,如果醫護人員覺得當事人有能力可以為自己嘅身體做決定嘅話,都可以當事人自己簽紙嘅。不過家計會會鼓勵當事人告知家長/監護人嘅,一嚟家人有機會可以提供更加多嘅支援;二嚟,終止懷孕始終係醫療程序,有機會有風險,如果有緊急醫療決定需要做嘅話,法律上只有佢家長/監護人先可以做有效嘅決定。所以如果屋企人知情,喺醫療程序方面會係更加安全嘅。 :blush:

要注意嘅係,家計會診所只會處理懷孕週數10週或以下嘅個案;而且如果當事人本身有其他身體狀況,例如心臟病/哮喘/高血壓/免疫系統問題等,家計會都唔會處理,不過佢地會提供轉介服務,寫轉介信俾公立/私家醫院。所以如果你地肯定咗有懷孕,而且有共識想終止懷孕,咁都要盡快預約佢地嘅服務,以免排期等待時間過長,過咗懷孕10週。你可以打去方便你嘅青少年保健中心預約(灣仔:2575 4799,旺角:2770 4994,葵芳:2442 2772),或者進行網上預約,可以去家計會網站進行網上預約:

流程方面:
你預約咗服務之後就要去青少年保健中心進行第一次到診見醫護人員同埋輔導員。醫護人員會檢查你嘅基本身體狀況、詢問病史、進行驗孕同評估懷孕週數,同埋都會話俾當事人知面對懷孕可以有咩選擇,令佢能夠做出知情選擇。而輔導員會進行情緒疏導,幫助當事人了解自己嘅意願同選擇。第一次見面嘅時候會約埋覆診時間。
去到第二次到診,如果你地決定要喺家計會進行終止懷孕,就會進行醫療程序,同時都會有心理輔導嘅。至於係進行藥物終止懷孕定係手術終止懷孕都要視乎女朋友嘅身體狀況同埋醫生嘅建議。
而第三次到診,係術後覆診,都係會有醫療同輔導兩方面。

兩次到診之間都會相隔一段時間,所以你地要盡快預約呀。 :relaxed:

如果你需要我地轉介/其他服務,或者想同我地深入啲咁傾嘅話,你可以通過Whatsapp/Signal再聯絡返我地,電話:6903 4682。

同埋都想話俾你知,有其他機構都有提供意外懷孕嘅支援服務,你可以去了解下佢地嘅服務,睇下邊間更加適合你地。

青躍:Teen's Key
電話:2302 0068/6166 9674(whatsapp)

母親的抉擇:https://www.motherschoice.org/
電話:2313 5678/5633 5678(whatsapp)

好明白你哋而家會有好多緊張、憂慮、擔心嘅情緒。希望你地知道,其實有好多人同埋機構可以幫助到你地,唔好因為年齡呢個問題或者因為擔心被發現所以唔去尋求幫助,或者延誤咗求助嘅時間。意外懷孕只係一個意外,係可以解決嘅問題,如果你地唔想獨自面對嘅話,其實會有人願意同你地一齊面對,我地糖不甩會一直陪伴著你地嘅! :sparkling_heart: