正常我應該27號嚟m，但係到今日都未嚟。
但係依幾日都有流啡色分泌物，好擔心
29號驗過一次係冇懷孕
好擔心到底發生啲咩，淨係流啡，仲要時有時冇
首先想同你解釋返，每一個月經週期嘅長度、流血量、日期都可能唔同嘅。因為月經係由身體中幾個繁複嘅系統互相配合而形成嘅，所以會好容易受到其他因素影響。例如：荷爾蒙分泌、飲食、作息、壓力、藥物等等。你呢排會唔會休息得比較少？有冇情緒比較緊張？或者有冇食過咩藥物？呢啲因素都可能會影響你嘅月經週期㗎。而有時一啲手機app嘅記錄只係一個大概嘅參考，唔能夠好準確咁預測到邊一日一定會嚟m嘅。 
但如果你持續幾次月經週期長度都浮動得比較大，或者突然喺血量／經痛程度／月經日數／血塊情況呢啲方面有好大嘅變化，咁都會建議去睇下醫生，檢查下有冇一啲病理性嘅原因（例如子宮／卵巢方面嘅問題，或者荷爾蒙水平嘅問題）令你出現呢啲明顯嘅變化。 
如果今個月經週期發生性行為嘅時候有正確使用安全措施，其實懷孕風險好低嘅。
性行為7日後驗孕會得到初步結果，而11日後驗孕就會得到比較準確嘅結果。所以你4月29號嘅驗孕結果可以比較準確咁肯定4月18號或之前嘅性行為冇導致懷孕，同埋初步驗到月4月19號至22號或之前嘅性行為冇導致懷孕。如果你想得到比較準確嘅結果，或者你喺4月22號之後發生過性行為，咁就要再等待多幾日再進行驗孕。 
出現啡色或者帶血絲嘅分泌物係比較常見嘅經前症狀，因為月經期間子宮內膜會脫落，而有啲人有啲週期可能會喺月經之前幾日有少量子宮內膜脫離，所以會有啡色／有血絲嘅分泌物。隨著月經出現，流啡就會停止啦。但如果之後發現自己經常經期之間，尤其唔係經期前都有流啡或者陰道出血嘅狀況，咁就建議去睇下醫生，檢查下身體有冇出現啲咩狀況（例如子宮頸嘅問題）導致出血。
總括而言，如果你今個月經週期發生過嘅性行為都有正確使用安全措施嘅話，懷孕風險都好低嘅。放鬆下心情，耐心等待，月經應該好快會出現嘅。 
可能真係因為最近趕FYP 睡眠時間個啲改變左同埋壓力大
最後一次性行為係24號 我今日都用咗晨尿驗左一次係冇懷孕 過多幾日會再confirm
我依家放鬆心情等經期到
1個讚
驗孕方面，正如 @Ching_StickyRiceLove 提及過咁，
如果最後一次性行為係4月24號，咁5月1號（性行為7日後）可以得到初步驗孕結果，以及5月5號（性行為11日後）就可以得到較準確的驗孕結果啦