停事前藥後月經未到

3月18號最後一次同Ex搞嘢
之後過幾日分咗手
2019年6月開始食事前藥
4月5號停咗事前藥
4月3號有月經,7號就完咗
今日5月1號未有月經
第一次遲嚟所以有少少擔心
唔知係咪同停咗事前藥有影響
希望有過類似經驗嘅各位俾啲意見我
感謝

補充返資料,ex嗰日(3月18號)冇帶套,有內射,我自己一向月經量都唔算多,5日左右完,4月嗰次月經前(29號定唔記得係31號)買棒驗過一次,冇事,藥都有盡量準時食,5月1號有經痛感覺(我本身非常少有經痛,一年只有一次左右),平時經前會大腿痹,下腹脹同少少胸脹,依啲情況依幾日都有出現。

Hello @Qpalzm :relaxed: :wave:t2: 因為一般受精卵著床需要6-9日,所以性行為7日後驗孕就可以得到初步驗孕結果,而性行為11日後進行驗孕結果就會較準確及可靠。如果3月18號發生性行為後,3月29號(性行為11日後) / 3月31號曾進行驗孕,都無顯示懷孕,咁都可以放心並無懷孕啦 :smiling_face_with_three_hearts:

而月經週期方面,一般避孕藥停藥後1至2個月內就會回復自然嘅排卵及月經週期,月經週期以及經血量會回復番未服用避孕藥之前嘅情況,停藥後初期月經週期亦會比較唔準確 :blush:。如果4月5號停藥,而依家亦有出現過往來經前都曾經/會出現的經前徵兆(腹痛、腹脹、乳房脹痛等)的話,現階段可以耐心等候一下先 :relaxed:

見你有提及到平時來經前都會出現大腿痺嘅情況,想了解一下呢個情況係服用避孕藥後先開始,還是服用避孕藥之前都已經有? :blush: 而大腿覺得痺嘅感覺/情況係點樣嘅?

如果係服用避孕藥後先有出現大腿痺嘅感覺,咁有機會係之前服用嘅避孕藥嘅影響,可能當時的避孕藥都未必好適合你。既然依家已經停藥,咁大腿痺嘅情況應該慢慢就會好轉~ :relaxed:

如果係一直以來都有,即係服用避孕藥之前都有出現來經前大腿痺的情況,而情況唔係好嚴重的話,無需太擔心,有機會係因為肌肉收緊,所以有啲怨怨地嘅感覺或者整個人都好攰。 :wink: 不過如果覺得大腿痺嘅情況都有影響到生活或者都擔心的話,之後都不妨睇醫生檢查一下身體。

最後,一般我地會建議每食一年避孕藥,都應該去睇醫生做番個詳細檢查,了解番健康狀況,以及評估一下有無需要因應年齡、患病、個人習慣等嘅改變,而轉用其他較合適嘅避孕藥/避孕方法。而你依家食咗兩年期間,想知道你中間有無睇過醫生進行翻個檢查? :relaxed: 如果中間都無搵醫生做過詳細檢查的話,都可以考慮一下今次停藥時順便搵醫生檢查下啊。 :smiling_face_with_three_hearts:

感謝你哋嘅回覆,今日5月3號再買棒驗咗一次,陰性結果,不過由於月經仍然未到,所以我每星期為保安全都會再買棒驗一驗直到月經到。依家下腹依然有脹同唔太舒服嘅現象,感覺有好似月經到但又其實未到,想問咁樣個咪正常現象?大腿痺喺食藥前嘅月經就已經會有,我仲係學生(已成年)所以冇睇醫生。

同埋,已經斷斷續續咁頭痛咗一個星期,想問係咪停事前藥後嘅正常現象?

Hello
正如Sze所講,喺性行為11日後驗孕已經可以得到準確嘅結果啦。5月3號距離你3月18號發生嘅性行為已經過咗一個幾月,驗孕結果已經好準確,係唔需要再繼續驗孕㗎啦。如果你真係好擔心嘅,你可以聽日再最後驗多一次,但你要設立一個目標被自己,呢一次係最後一次啦,如果結果依然係陰性嘅,咁就要嘗試相信呢個結果。 :relaxed:

而Sze都有同你解釋,停止服用避孕藥之後,身體需要一段時間先會恢復自然分泌荷爾蒙同埋排卵嘅狀態,所以停藥之後嘅頭幾個月經週期都會相對唔穩定,係好正常嘅現象。
因為你由2019年6月食藥到2021年4月,呢段時間身體已經適應咗藥物中嘅人造荷爾蒙,唔會再分泌荷爾蒙或者排卵。你服藥期間嘅「月經」其實係「撤退性出血」/「藥性月經」只係受藥物影響而出現嘅子宮內膜脫落,所以會跟返你嘅食藥週期,每次都好「準時」。但係你而家停咗藥,身體都要慢慢建立返荷爾蒙系統。所以你要有心理準備今次月經同埋之後幾次嘅月經都會比較唔穩定。 :confounded:
再加上月經本身就好容易受到其他因素影響,例如飲食、作息、壓力等等。所以冇咗避孕藥控制,你之後就算身體建立咗穩定嘅荷爾蒙分泌,都係有機會每次月經週期嘅長度有啲唔同。
所以都係建議你耐心等待下,放鬆心情,月經會出現嘅。 :wink:

至於下腹唔舒服係常見嘅經前不適,不過都有機會因為其他嘢造成(例如消化系統問題導致下腹不適)經前不適嘅症狀喺嚟m前兩星期至幾日前都有可能出現嘅,隨著月經出現就會消退嘅,不過有經前症狀唔代表可以推算到月經究竟會幾時出現。
大髀痺嘅情況如果你食藥之前、食緊藥嘅時候都一直有呢個情況,而且而家冇特別嚴重咗嘅話,其實都唔使太擔心,可能坐得多/姿勢唔好呢啲原因都可能會影響嘅。但係如果你擔心嘅,或者你麻痺嘅情況都相對比較嚴重,或者持續嘅時間比較長,其實不妨去睇下醫生,檢查下有冇一啲例如神經方面嘅問題,求個安心。 :man_health_worker:t2: :woman_health_worker:t2:
而頭痛就可以有好多唔同原因導致嘅,例如休息得唔好、壓力大、或者呢幾日溫差大落雨冷親,不過就應該同停藥無乜關係。如果情況持續或者更加嚴重嘅話,都係要盡快去睇醫生呀。

如果你未夠26歲,其實有任何關於月經、避孕藥唔舒服嘅情況,你想睇醫生嘅話,係可以考慮去家計會嘅青少年保健中心去見醫生嘅,可以打電話或者網上預約。服務種類同收費諮詢你可以睇下佢地嘅網站:青少年保健 - 香港家庭計劃指導會
如果今後有需要就可以去預約啦。

依邊到咗今日依然未有月經,星期二會再驗一次,下腹依然係脹起,左邊乳頭比較敏感同㩒落去會唔舒服,想問係咪停事前藥後其中一個正常現象嚟?

正如之前提及過,一般避孕藥停藥後1至2個月內就會回復自然嘅排卵及月經週期。當回復自然排卵時,身體荷爾蒙會慢慢適應返自然排卵,並出現變化,導致出現暫時性嘅副作用(例如乳房脹痛、經血量增多、體重改變等) :blush:。所以係屬正常嘅停藥後現象,無需太擔心,短時間內會情況會慢慢變好。透過熱敷、x按摩等方法,都能幫助舒緩乳房脹痛嘅不適感覺。不過如果情況變得嚴重,例如乳房/腹部出現明顯疼痛、嘔吐、頭暈等情況,建議去睇睇醫生,了解出現不適症狀嘅原因。

乳房脹痛亦有機會係之前提及過嘅經前徵兆。如果過往服藥前都曾出現經前徵兆(例如乳房脹痛、腹脹等),停藥後亦會回復番。

參考: