上個月21號同男朋友磨，其實當時見到有啲透明液體係佢龜頭度，但我哋都冇理繼續磨（我地都冇著底褲）然後佢自己打飛機。上個月3號黎，今日都未黎好驚有左，上個禮拜又肚屙，好驚唔知關唔關事。但又有啲黎m前嘅感覺，前幾日開始乳頭痛痛地（因為之前黎m前都係咁）但都好驚因為已經遲咗一日黎
真係唔可以有左
Hello
你所講嘅透明液體係尿道球腺液，陰莖喺受到刺激嘅時候會有尿道球腺分泌，當中有機會含有少量精子。所以如果尿道球腺液同你嘅陰道口有直接接觸，都會有一定嘅風險，不過相對插入式嘅接觸風險係比較低嘅。 
而月經係由身體幾個繁複嘅系統互相配合而形成嘅，所以好容易受到其他因素影響，例如荷爾蒙分泌、飲食、作息、壓力、藥物等等。所以有機會每個月經週期嘅長度都會唔同，一啲手機app或者日曆記錄只係一個大概嘅估算，唔可以好準確咁肯定究竟邊日一定會嚟m。你會唔會最近情緒壓力比較大？或者休息得比較少？或者你肚屙嗰陣有冇食藥？呢啲因素都有機會影響月經嘅。 
至於乳頭痛係常見嘅經前症狀，但都有機會係因為其他因素造成，例如衣物摩擦。
見你都好擔心，其實不妨去驗下孕。喺發生性行為嘅7日後驗孕會得到初步結果，而11日後就會得到相對準確嘅結果。而家距離4月21號已經過咗11日，如果你驗孕嘅話已經可以得到好準確嘅結果啦。可能你親眼見到驗孕結果之後都會安心啲嘅。 
建議你下次同男朋友再發生性行為嘅時候，即使唔係進行陰道陰莖插入式嘅性行為，都可以考慮使用安全套，或者至少隔住衣物，咁就可以避免陰部接觸到尿道球腺液或者精液，可以更加安心啦！關於正確使用安全套嘅資訊，可以參考：https://www.instagram.com/p/B4EX0FVFLUf/?utm_source=ig_web_copy_link