絲20 發現意外懷孕幾日 我book左去青少年保健中心
我上網搵過見到啲人話唔夠一個月 或者孕囊唔夠大 係咪一定要用藥流
因為都有啲擔心 見好多人都話 藥流唔係想像中咁好
hello 你好啊 
首先感謝你同我地分享身體上嘅煩惱，都想了解下你book 咗青少年保健中心之後，已經見過醫生定只喺book咗日子？另外，如果以往病史記錄都需要同醫生講番~
因為醫生會根據番不同病人嘅身體狀況嚟建議最終喺使用**「藥流」定喺「手術」終止懷孕。兩者嘅安全程度都相約。藥流嘅原理喺「用藥物嚟刺激子宮收縮同排出胚胎組織」；手術嘅原理喺「經子宮頸放入吸管，用真空將胚胎組織吸走」**。無論喺「藥流」同「手術」都喺懷孕期12週或之內可以進行嘅終止懷孕嘅方法。所以回應翻問題：「唔夠一個月 孕囊唔夠大 喺咪一定要用藥流」，答案並非只喺可以用藥流。兩者都有利有弊 
，如果仍然有困擾嘅話可以問問醫生嘅專業意見。
你都可參考一下家計會終止懷孕嘅資料～ 希望可以幫到你啦～ 
我聽日去檢查啊 我都無問清楚其實我連佢個個檢查點收費都唔清楚 因為我見佢有分幾種 但係佢就話聽日要890$ 檢查費用
hello 你好啊
如果喺咁嘅話，都可以預先諗定d 問題聽日直接醫生，例如：
→ 身體狀況適合做藥物終止懷孕定喺手術終止懷孕
→ 兩種手術嘅分別
→ 以往病史記錄有無影響
→ 收費問題
另外，都可以參考家計會嘅收費項目：
如果聽日睇咗醫生之後需要支援又或者有其他問題嘅話，都可以搵番我地～希望可以幫到你啦～ 
仲有個問題想問小編你地
人工流產係咪都要坐小月？
我睇到有啲人都話做完個一個月都要調理好身體
因為每個人嘅身體狀況唔一樣啦，到時你見醫生嘅時候都可以問一問醫生嘅。同埋你懷孕咗幾日就決定去做手術，其實算係比較早嘅，咁越早做對身體嘅負荷係比較細嘅，因為嗰個胚胎仲未發展到好大，相對上手術嘅流程都比較快啲。
始終都係一個手術啦，對身體影響就好視乎體質嘅，如果以往身體比較弱啲，有可能反應就會比較大啲；相反如果你係比較健壯嘅，做完手術嘅復原情況就會好啲，而且對身體嘅負荷都會比較細啲，到時都可以問下醫生建議架。 
同埋睇下你會相信中醫或者西醫比較多啦，如果中醫就會有啲食療、針灸等等去幫你做啲術後嘅調理嘅，但西醫就比較少，可能都係均衡飲食，好好休息咁。不過醫生都會同你講返做完手術之後要幾耐之後先可以有性行為，或者有食開避孕藥嘅人幾時先可以食返藥等等嘅。有可能醫生做手術嘅時候都會問下你會唔會想放埋避孕環入去，做一個長期嘅避孕措施，或者都會同你傾下之後嘅避孕安排，你都可以係心裡面諗定先架。 
另外我地之前有啲人都有類似嘅情況，都會視乎返宗教背景去做唔同嘅善終處理嘅啦。如果係天主教基督教可能就會祈禱認罪，希望靈魂可以主懷安息；如果佛教嘅話都會超渡同埋點佛燈49日啦；如果道教就會搵法師作法等等啦，不過都係一啲額外嘅資訊，睇下你完成手術之後再諗吓會唔會做啦。 
知道你要面對呢件事你都好焦慮，處理嘅過程中都會好辛苦，不過糖不甩嘅大家會一齊陪你面對架，隨時再搵我地都OK架！加油呀！ 
1個讚