首次服用YAZ

我今個月第一日嚟M嘅時候開始食第一粒(24+4)
正常嚟講我應該仲有大約11日先嚟M
但我由琴晚開始就有血(鮮血顏色),同平時第三四日嘅流量差唔多
我呢幾日應該係排卵期,所以會有可能係排卵期出血定係月經提早咗呀?
咁樣嘅話係咪指呢隻藥唔岩我?我要即刻停藥嗎?

Hello
首先想問下你,第一次食Yaz之前你有冇諮詢過醫生意見呀?雖然避孕藥好容易買到,但係並唔係每個人都適合服用避孕藥,例如有心臟/肝臟/免疫系統問題嘅人就未必可以服用避孕藥。而且市面上有好多款唔同嘅避孕藥,每款嘅荷爾蒙成份同劑量都唔同。所以我地建議第一次食藥之前,要見下醫生,等醫生評估下你係咪適合服用/適合邊一款避孕藥。如果你之前未問過醫生,咁都可以盡快去睇下醫生,同埋要話比佢知你而家食緊Yaz嘅。現時家計會診所/母嬰健康院/部分私家診所都有呢個服務嘅,有需要就盡快去預約啦。 :man_health_worker:t2: :woman_health_worker:t2:

Yaz係通過低劑量嘅人造荷爾蒙(24粒粉紅色藥丸),抑制人體自己嘅荷爾蒙分泌,從而抑制排卵,達致避孕嘅效果。所以如果由月經週期第一日開始服用緊避孕藥,係唔會再出現「排卵」呢個現象,亦都因此唔會有所謂「排卵期」嘅。而你服用緊Yaz都會有月經係因為服用冇活性成份嘅藥丸(4粒白色藥),令體內荷爾蒙水平下降,子宮內膜因此會脫落。呢種「月經」其實係「藥性月經」或者「撤退性出血」,通過藥物模擬平時嘅月經現象。 :relaxed:

至於點解你會有少量出血,其實係一個初時食避孕藥常見嘅副作用。因為身體適應緊藥物,有機會有少量子宮內膜脫落。每個人身體狀況唔同,適應荷爾蒙藥物所需嘅時間亦唔同,通常1-3個月就會穩定咁適應到藥物,但都有啲人可能要6個月時間去適應。而都有啲人要轉幾款藥先搵到最適合自己嘅避孕藥。如果你冇出現好嚴重嘅副作用(例如呼吸困難/心跳加速),暫時都唔需要停藥嘅。不過建議你都係要盡快去睇醫生先,如果醫生認為你可以繼續服用呢款藥,咁就要俾身體一啲時間去適應呢隻藥啦。 :blush: