關於性工作者口交一事

因為女朋友在外地讀書,不是經常回來的關係,我前2日搵過1個只做幫客人用手自慰的性工作者,因為我見到她有刷牙,口腔應該乾淨,所以允許她幫我口交,但沒有射出,過程大約5-10分鐘左右,之前轉回幫我用手自慰,那位性工作者告訴我平時都有幫客人口交幾下,而且沒有做開性病檢測,事後十分後悔,覺得對女朋友唔住,好驚感染性病,甚至有如果得了性病就自殺的想法,我想問下我以上事情感染性病機會大嗎,現在真的十分後悔,以後再都唔去那些地方了,希望能解答我問題,謝謝你們

PS:我射完出黎都有即刻去沖涼,用沖涼液洗乾淨,而且睇完冇傷口先走

Hello
首先想同你解釋返,當高風險體液,例如精液、尿道球腺液、陰道分泌物、腸液同血液,直接接觸到性器官、比較脆弱嘅黏膜組織(例如口腔、肛門、陰道、尿道口),特別係當上面有開放性傷口(正在流血)先會有比較大機會可以造成性病傳播。所以你嗰日嘅性行為如果只有手交同口交嘅話,感染性病嘅風險係相對比較低嘅。但係的確有啲性病係有機會經口交傳播,例如梅毒、衣原體、淋病同疱疹,如果對方感染咗呢啲病菌,而且有病徵,口交都會係相對有風險嘅性接觸。如果你真係好擔心嘅,你都可以去進行性病測試。社會衛生科有免費嘅測試,不過要等性行為後3個月「空窗期」後先會有相對準確嘅結果。而一啲私家診所會提供「空窗期」較短,較快出化驗報告嘅測試,你可以根據需要去了解下。不過要提返你,因為唔同性病都有各自嘅「空窗期」同「潛伏期」,亦有好多性病係感染後係毫無病徵。即使測試結果真係陽性,都唔代表係因為今次嘅性接觸導致感染,因為就算有單一嘅性伴侶,都有可能感染性病嘅。明白你好擔憂,但係你而家仲未知自己嘅感染狀況,同埋即使感染咗性病都唔係一件解決唔到嘅事。而家大部份性病都可以喺藥物治療下痊癒,只有HIV病毒同部份HPV病毒暫時係無法根治,但係可以喺藥物治療下受控,只要及早發現之後盡快治療,係唔會影響到日常生活嘅。而HIV同HPV都係要通過高風險嘅性接觸先會感染到,通過手交同口交感染嘅機會係好低嘅。所以建議你可以嘗試放鬆下心情,唔好因為你假想嘅健康狀況去諗輕生呀。同埋如果你發生過性行為,尤其係如果發生過冇使用安全套嘅插入式性行為,都建議你可以去進行測試,了解返自己嘅身體情況,亦係對伴侶嘅一份保障。 :blush:

而你會覺得去搵性工作者就會感染性病,其實係受到社會文化中對性工作者嘅歧視同污名化,將佢地同「污糟」、「性病」連結。但其實好多性工作者為咗生計同埋自己嘅安全同埋健康,係會恆常去做檢查,同埋會使用安全套保障安全。但係有時有啲客會拒絕使用安全套,甚至性行為中途除套,加大性工作者感染嘅風險。雖然你話你接觸嘅性工作者係「沒有做開性病檢測」,但都唔代表佢一定有感染性病。而如果佢本身唔會進行陰道交,淨係會幫客人手交或者口交嘅話,感染性病嘅風險其實都相對比較低。同埋其實無論係口交定係陰莖陰道插入式嘅性行為,你都可以主動要求使用安全套,對自己同對方都係一份保障,如果你嘅陰莖有病菌嘅話,使用安全套會避免對方口腔感染到細菌。性工作都係工作,性工作者都值得被尊重。

即使係日後同伴侶發生性行為,都要記得用安全套進行插入食嘅性行為,同埋口交嘅時候都可以用口交套/口交膜/安全套,可以降低懷孕同埋感染嘅風險。即時唔係性病,其實有其他感染都有機會通過性行為傳播,例如尿道炎、陰道炎、念珠菌感染,使用安全套就可以避免因為性行為而有感染啦。 :wink:

同埋今次嘅經歷可能都令你更加了解同女朋友嘅關係。遠距離關係都可以有唔同解決性需要嘅方法,例如使用一啲特別嘅性玩具。最緊要係同伴侶溝通,搵到最適合你地嘅方法。 :relaxed:

好多謝你地啊,令我心情有所放鬆,我以後都唔會再去咖啦。感激感激

1個讚

你好啊,我又黎煩你地啦,尋日沖涼發現身體多左2粒紅點,好驚係戈味野,我真係好後悔,又諗番起戈日既事:sob:,我想知我中性病(愛滋,梅毒)既機會係有,但好低,求下你地幫下我:sob:

Hello
首先都想了解下,你所講嘅「2粒紅點」生喺邊度?係性器官定係其他身體部位?有冇痕癢或者痛?紅點係咩樣?係咪只有2粒? :thinking:

生長紅點唔等於係感染咗性病,出現紅點都可能有好多唔同原因導致,例如皮膚敏感、蚊叮蟲咬、油脂分泌、轉咗沖涼產品、天氣熱焗住皮膚、清潔不足或者過度清潔。尤其是如果你肯定只有2粒紅點,其實並唔符合任何性病感染嘅症狀。 :relaxed:

建議你觀察下紅點嘅狀況,有無增多或者逐漸消退。如果你都係好擔心,你可以睇下醫生檢查下啲紅點。或者好似之前所講,你可以去做一次全面嘅性病測試,了解下自己嘅身體情況。你可以比較下「空窗期」、出報告所需時間同埋價錢,決定去社會衛生科定係私家診所進行測試。同埋之前都有同你解釋過,多數性病係可以喺藥物同治療下痊癒,HIV同HPV會喺藥物影響下受到控制,而你當日嘅性接觸感染HIV嘅機會係好低嘅。所以就算有任何病,無論係性病定係其他皮膚問題,都係唔需要太過於擔心嘅。好明白你嘅擔憂同埋緊張,可能做完檢查,你親眼見到化驗結果,你都會放心啲,唔會再將任何身體狀況都聯想到性病感染啦。 :blush: