急!兩個月無嚟!

兩個月冇黎,期間驗過五次,其中一次用電子驗孕棒,都係冇BB,會唔會早得滯驗唔到?

Hello
都想了解多少少資料先。你平時月經週期大概幾多日?之前嘅月經週期係咪都比較穩定?你上一次月經之後邊啲日子發生過性行為?有冇使用安全措施?你係幾時驗孕㗎? :face_with_monocle:

首先如果你發生嘅性行為有正確使用安全措施嘅話,懷孕風險係好低嘅。而如果你冇使用安全措施,或者避孕失效,咁就要考慮下懷孕風險。
發生性行為嘅7日後驗孕已經可以得到初步結果,而11日後進行驗孕就會得到比較準確嘅結果。如果你驗孕嘅日期距離你最後一次性行為已經過咗11日,咁你驗孕嘅陰性結果就已經好準確,即係話你冇懷孕。如果你都係好擔心嘅,你可以聽日進行最後一次驗孕,如果結果依然係陰性,咁你就要嘗試相信呢個結果。 :blush:
如果你驗孕嘅日期距離最後一次性行為唔夠11日,咁你可以耐心等多幾日再進行驗孕。

都想同你解釋返,月經係由身體幾個繁複嘅系統互相配合而形成嘅,所以好容易受到其他因素影響。例如荷爾蒙分泌、飲食、作息、壓力、藥物等等。你最近會唔會休息得比較少?或者你呢排會唔會情緒比較緊張?你有冇食過咩藥物?呢啲因素都會影響月經嘅。其實每一個月經週期都係一個新嘅週期,長度唔一定同之前嘅週期相同嘅。 :relaxed:

建議你睇返驗孕嘅日期同發生性行為嘅日期,如果可以排除咗懷孕嘅可能性,同埋如果你之前都有出現過月經週期比較長嘅情況,咁就可以嘗試放鬆下心情,等月經出現。但如果你之前嘅月經週期都相對比較規律,你都可以去睇下醫生可以安心啲,醫生會幫你驗孕同埋檢查下你嘅身體狀況,如果係因為荷爾蒙水平失調導致你月經遲咗,醫生通常根據你嘅身體情況睇下需唔需要俾一啲催經嘅藥物你;而如果係因為子宮/卵巢嘅問題,就可能需要進一步嘅治療。而如果你覺得唔需要睇醫生,你都可以留意下自己之後嘅月經狀況,如果連續幾次月經嘅週期長度/流血量/流血日數/經痛情況等出現咗比較大嘅變化,你都可以睇下醫生,檢查下有冇一啲病理性嘅原因(例如荷爾蒙水平/子宮/卵巢問題)導致你出現呢啲狀況。家計會診所、母嬰健康院、專科診所都有呢個服務嘅,如果你有需要就去預約啦! :woman_health_worker:t2: :man_health_worker:t2:

我大約一個星期前開始用在同驗孕棒驗。。。。平均週期係36日。。。。

其實呢兩個月本身壓力都大。。。。。有呢個情況壓力仲更大。。。瞓唔到咁滯。。。。會約去照一照子宮會唔會有其他問題。。。

平均週期係36日的話,咁過往有無都曾經試過好似今次咁,大概兩個月尚未來經?

正如 @Ching_StickyRiceLove 所講,壓力過大、生活作息唔定時,都係有機會導致月經來遲嘅原因 :blush: 現階段透過約見醫生,都有助你了解多D依家身體嘅狀況,減低憂慮。當心情放鬆D,作息定時D,都有助月經黎得比較穩定 :smiling_face_with_three_hearts:

而驗孕方面,如果最近嘅驗孕日期,距離最後一次性行為已經夠11日,而結果都係顯示無懷孕,咁都無需太擔心。我地可以一齊耐心等待來經嘅日子,以及醫生檢查過後,睇下呢段時間身體經歷緊咩嘅狀況先 :blush:

感謝你哋呀:relaxed:

都試過好耐之前成三個月無嚟