唔知係排卵出血定早咗嚟m?

上次月經係4月17號,之後4月30至5月2號有三日出血,初頭以為係排卵期出血,但一直到而家都仲未嚟m(周期第34日),好擔心唔知係咩事。。想問出血嗰日(周期第14日)係咪排卵日,正常應該14日後(即係5月14日)就嚟M?嗰次出血會唔會唔係排卵期出血,而係提早嚟M?

另外今個月有同男朋友做過幾次,每次都有戴套,包括安全期期間,懷孕機會應該唔高嗎?

Hello
首先都想了解多啲你所講4月30號至5月2號嘅出血情況,嗰三日嘅流血量多唔多?你而家係咪仲未嚟m所以有呢個擔憂?你平時嘅月經週期大概係幾多日?你之前有冇出現過排卵期出血? :face_with_monocle:

有啲人有時會經歷排卵期出血,係因為體內荷爾蒙發生變化,導致有少量子宮內膜脫落。所以會有啡色/帶血嘅分泌物,不過個流血量相比起平時月經會比較少(通常血量係用護墊都已經可以),而流血日數都會比較短。有啲人排卵期出血係排卵嗰日出現,而有啲人會排卵前後幾日都有出血。如果你所講嘅嗰3日相比起你平時月經,血量係好少嘅,咁就比較大機會係排卵期出血。同埋的確有人會喺壓力/身體狀況/藥物嘅影響下,出現排卵期出血嘅情況。你都可以繼續留心觀察你嘅分泌物,如果之後都時常出現非經期陰道出血,同埋血量都比較多,咁都可以睇下醫生檢查下有冇一啲病理性嘅原因(例如荷爾蒙水平問題,子宮頸問題)導致呢個情況出現。如果有需要,你可以去家計會診所/母嬰健康院/專科診所預約睇醫生嘅。 :man_health_worker:t2: :woman_health_worker:t2:

而排卵同埋月經係會受好多唔同因素影響嘅,例如荷爾蒙分泌、飲食、作息、壓力、藥物等等。所以未必每個人每次都會係28日一個週期嘅,有啲人嘅週期短啲、有啲人會長啲,每次月經週期嘅長度未必一樣,係好正常嘅現象。同埋排卵日其實係要等月經出現之後先可以推算返排卵日係幾時,除非每日都用排卵試紙去測試,否則我地可能準確咁知道究竟邊一日會排卵。而推算係由月經第一日向前數14日為排卵,並唔係用月經第一日加14日。 :nerd_face:
如果你係因為擔心自己月經遲過28日,或者遲過平時,你可以回想下自己呢排係咪休息得比較少?壓力會唔會比較大?呢啲因素都會影響月經嘅。

如果你地每次發生性行為都有全程正確使用安全套,咁你地嘅懷孕風險係好低嘅。而「安全期」期間都係需要使用安全措施嘅,因為正如之前所講,排卵會受好多因素影響,如果冇使用安全措施發生咗性行為,而喺所謂嘅「安全期」有排卵嘅話,就會有懷孕風險。所以唔建議使用「安全期」作為避孕方法。

如果你依然好擔心嘅,你都可以去驗孕嘅,喺發生性行為嘅7日後驗孕會得到初步結果,而11日之後會得到相對準確嘅結果。可能見到親眼驗孕結果你就會安心啲。放鬆下心情,月經會出現嘅。 :sparkling_heart:

出血量比平時少,平時月經平均31日,但近呢一年都試過兩次34-37日。

因為今日已經係出血後嘅第21日,假如出血當日就係排卵日,咁我應該一星期前(即出血後第14日)就嚟咗m,但到今日,周期第35日都未嚟,所以好擔心。

正如 @Ching_StickyRiceLove 所提及過咁,

所以開始出血當天,都有機會係排卵前嘅日子,不一定係排卵日 :relaxed:。 如果該次出血量係比較少,而之前都曾經試過月經週期34-37日的話,都可以再耐心等候幾日先。

亦正如之前提及過咁,如果整個性行為過程,都有戴好安全套,咁懷孕嘅風險係好低。撇除懷孕嘅因素,月經來遲嘅原因亦包括生活作息唔定時、情緒有起伏、壓力過大、飲食唔均衡、生病有服過藥(例如抗生素)等嘅情況。最近一個月身體有無經歷過類似嘅狀況 :smiling_face_with_three_hearts:

已經嚟m了,多謝你解答:smiley::pray:

1個讚