未試過遲咁多…

月經已遲左十日,在遲了7 日驗孕negative ,很明顯只一條線,到今早用晨尿都係negative , 但真係冇跡象想來m⋯⋯亦已過晒對上一次性行為11日了,唔知係味有左:sweat:

我已42歲,唔知會唔會開始周期亂,所以延長左?

Hello~ 首先想了解多少少你依個月經週期內嘅性行為有無使用安全措施?如果有嘅話,懷孕嘅機會唔大嘅,唔需要太擔心:blush: 見你提到有喺月經遲嚟嘅第7日進行驗孕,亦都已經係上一次性行為嘅11日後,所以嗰次驗孕嘅結果係好準確嘅,結果係陰性就應該係無懷孕架啦:relaxed:

至於月經遲嚟方面,其實經期係會受好多唔同嘅因素影響嘅,例如生活習慣改變、心理壓力大、生病服食過藥物等等,所以月經遲嚟都唔一定係懷孕嘅,而如果以往未試過月經延長咁多日嘅話,建議你去睇醫生了解返身體狀況:woman_health_worker:t2::man_health_worker:t2:

前段很少時間冇帶,大部分時間有帶:pray:t2:

你意思係一時有戴,一時無戴?定係無全程戴安全套呀? :thinking:

如果你已經係性行為後11日驗孕,結果其實已經好準確架啦,唔洗擔心嘅。 :wink:

如果真係好擔心,可以試下用電子驗孕棒,結果會更加清楚之餘,真係懷孕的話仲會顯示埋懷孕嘅週數,咁樣就可以清楚知道結果。 :smile:

不過提提你,如果無計劃懷孕同埋想預防疾病透過性行為傳染嘅話,真係每一次都要使用安全套,而且係全程使用,因為就算插一下都好,陰莖勃起時流出嘅尿道球腺液都有機會含有少量精子,都會有導致懷孕嘅風險架。又或者考慮用荷爾蒙方式,例如事前避孕藥或者避孕針,去避孕,但就唔可以預防到疾病嘅傳播嘅。 :relaxed:

Thank you. 但遲咁多很令我擔心,又唔知身體咩事:pensive:

我見你都係性行為後11日又係預計月經遲咗7日嘅時間驗孕,其實個結果都非常準確架啦,都可以排除咗懷孕嘅可能性架啦。 :wink:

好似之前咁講啦,月經都係受到好多嘢影響嘅,你都可以回想下自己過往呢個月會唔會食緊藥、病咗、會唔會壓力好大、情緒會唔會好波動、有好擔心嘅情緒等等,呢啲都有可能係影響月經嘅因素嚟架。 :laughing:

其實隨住年紀嘅增長,荷爾蒙都會有變動嘅,如果你發現最近嘅月經都比較唔穩定,都可以去搵醫生檢查嘅,但未必一定係更年期嘅。同埋你都有有穩定性生活嘅話,都建議每年都做一啲婦科檢查嘅。 :wink:

我最終今日有見紅,已經係遲左27日,但一天都只係見紅,抹時有少少,好似m 尾聲咁,究竟係咩事呢?(我早兩日又再唔信邪,驗過孕都係negative)好擔心有咩事

Hello
我地之前都有同你解釋過,如果呢段時間你冇發生過性行為,你驗孕嘅時間距離你對上一次發生性行為超過11日,其實你嘅驗孕結果已經好準確,可以相信呢個結果,你係冇懷孕嘅。

而正如之前所講,有好多因素會影響月經嘅,例如荷爾蒙分泌、飲食、作息、壓力、藥物同生活習慣改變等等,加上年齡增長都可能會導致荷爾蒙分泌變化,從而影響月經。但暫時我地都好難單憑你嘅描述幫你搵到確實嘅原因。所以,既然你月經已經相比起之前嘅週期遲咗27日,而呢件事都令你好困擾,與其估估下同埋擔心自己身體,不如真係盡快去睇下醫生,了解下自己嘅身體情況,知道今次月經情況突然有比較大嘅轉變係咩原因。你可以考慮去家計會診所,醫生會根據你嘅身體狀況睇下需唔需要俾一啲荷爾蒙藥物你進行催經,定係要再耐心等待下月經出現,或者睇下需唔需要做進一步嘅檢查去了解下荷爾蒙分泌/子宮/卵巢嘅狀況。你可以盡快打電話或者去網站預約,預約電話同網上預約系統都可以喺呢個網站到搵到。 :blush:

或者你都可以考慮去母嬰健康院(有針對月經問題嘅服務,不過需要留意開放時間同埋登記時間,有需要可以提前打電話詢問或者預約,相關資訊可以喺呢個網站搵到:家庭健康服務 - {page_title} )或者一啲專科診所睇醫生,記得盡快預約啦。 :woman_health_worker:t2: :man_health_worker:t2:

見到之前你都問過幾次,而我地都有建議你去睇下醫生,而你都冇去到,會唔會有啲咩原因令到你對求醫有疑慮或者擔憂?如果你唔介意嘅話都可以同我地講,我地會盡力解答你嘅問題㗎。見你月經都遲過平時比較多,同埋你冇一啲特別嘅身體狀況(例如患病/服藥),我地都擔心嘅,所以都希望你盡快求醫,了解清楚自己嘅身體狀況呀! :wink: