著床性出血?驚有bb

本身我上一次嚟m係 20/4 , 用app 計係話下一次係23/5
我18/5, 22/5 都分別進行咗冇保護措施嘅性行為,
我22/5 發現有啲分泌物係粉紅色嘅但只係好少,得1,2滴咁, 到到24/5 又係有啲淺粉啡色嘅分泌物,但就多少少嘅有3,4滴,我以為係差唔多嚟m 嘅徵兆,但到宜家今日都仲未嚟,呢2日已經飲咗好多涼嘢,廿四味個啲。

上網睇啲人話得咁少嘅出血,應該係著床出血, 我好擔心。諗住今日用驗孕棒睇吓係咩結果,但我唔知如果今日驗個結果準唔準同埋係咪一定要用晨尿去驗?

如果結果顯示係positive, 我就想盡快解決佢, 始終啱啱出嚟做嘢未有能力住。上網睇過係可以去家計會嘅,但宜家疫情關係我唔知家計會仲會唔會做呢類型嘅case? 如果去家計會做係咪都要搵2個註冊醫生拎紙先可以再做?呢樣嘢係家計會安排定要自己搵?

你好呀 @mai :wave:t2: :wave:t2: :wave:t2:

因為你地無使用任何保護措施,所以都會有懷孕嘅風險架。 :pleading_face: :pleading_face:

首先22/5果一次,只係性行為之後有少量粉紅色分泌物,好可能係性行為嘅時候比較激烈,導致有少少撕裂嘅情況,因此有少少血,唔係著床性出血嚟架。:x:

至於24/5有少少流啡嘅情況,就比較擔心啦,因為果次已經距離你18/5果次性行為6日,咁就有兩種情況:一種係你所講嘅著床性出血,一種就係嚟月經前會有嘅流啡。:drop_of_blood:

著床出血係指當受精卵着床喺子宮壁嘅時候有機會造成嘅少量出血,通常只會有幾滴或者最多一塊護墊可以承載到嘅血量,而且係一次性,唔會持續地出血幾日,血嘅顏色亦會同月經嘅唔一樣。一般由受精到着床大概係性行為後六至九日就會發生。而着床性出血並唔係一個常見嘅現象,即使真係因為懷孕都係只有少部分女性會出現嘅情況。 :grinning:

建議你先用驗孕棒驗孕,因為今日(28/5)都係超過咗性行為後7日,可以得出18/5同22/5性行為嘅初步結果,你可以係29/5同埋2/6再驗一次,就可以得出18/5同埋22/5呢兩次性行為比較準確嘅驗孕結果。:ok_man:

當中說明書有機會建議你使用晨尿去檢驗,因為晨尿含有嘅hCG值濃度會係最高 (當受精卵喺子宮著床之後,人體會分泌hCG呢一種荷爾蒙,驗孕棒嘅作用就係去檢測身體中有冇hCG,從而檢驗有冇懷孕),亦會比較容易取得準確嘅驗孕結果。但如果說明書有寫明呢項步驟,就算唔使用晨尿,結果都會喺可信嘅~ :relaxed:

如果真係發現咗意外懷孕,唔洗擔心,你都可以去家計會搵佢地幫手,佢地唔會因為疫情而唔做嘅。如果你係已婚或者26歲以上,就可以直接去家計會節育指導服務診所,唔洗特登預約嘅,不過都建議你最好要打個電話俾佢哋,睇下佢哋當天會唔會好full。如果係26歲以下就要打去青少年保健服務度預約啦。 :wink:

家計會護士會系首次接見就診者嘅時候,會先問你個人病歷、進行尿液驗孕,同埋向你提供有關終止懷孕的基本資料及輔導。由於家計會認為終止懷孕係一個重要嘅決定,所以會建議就診者於初診後重新慎重考慮係咪要進行終止懷孕。 :innocent:

假如就診者決定終止懷孕,家計會護士將安排就診者再次約見醫生,商議及評估終止懷孕風險,同埋進行身體及盆腔檢查,以確定就診者是否適合系家計會進行終止懷孕。

其他詳情你都可以係家計會網站睇返架:

同埋家計會係有日間醫療中心嘅,會有註冊醫生幫你施行手術,唔洗擔心嘅。

另外都好欣賞你會用apps去留意自己嘅月經週期,但係月經週期嘅長短受到好多因素嘅影響,例如會唔會最近食緊藥、病咗、會唔會壓力好大、情緒會唔會好波動、有好擔心嘅情緒等等,其實都會影響月經週期嘅長短嘅。每個人每個月嘅月經週期都唔一定一樣嘅,所以有時網上嘅月經計算器或者App都只可以用嚟參考,就算你18/5同埋23/5無發生性行為,都唔一定會係23/5嚟月經嘅,所以未必可以盡信架。 :kissing:

同埋見你都有話飲涼茶,但係我地都唔建議係無醫生嘅建議下咁樣飲涼茶嘅,因為每個人體質唔一樣,唔係所有人食生冷嘢就會快啲嚟月經嘅,如果你本來體質比較寒涼,你再飲比較涼嘅嘢,就有機會會令月經更遲嚟。而且本身涼茶或者中藥都係會影響月經嘅因素,所以真係唔建議呀。真係相信中醫嘅話,都可以搵返合資格嘅中醫幫你開一啲啱你體質催經嘅中藥,咁就唔會發生飲咗唔適合嘅涼茶而發生嚟月經嘅時候有血崩或者嚟得好辛苦嘅情況。:drop_of_blood:

如果真係暫時無計劃懷孕嘅話,就要好好考慮使用邊一種安全措施啦,例如安全套,或者事前避孕措施,例如事前避孕藥或者避孕環,你可以去家計會見醫生,醫生會幫你檢查下身體嘅狀況會適合用邊一種方式或者藥,而且係家計會買藥都係比藥房平嘅,真係有咩事出現都可以搵返醫生檢查。不過用邊一種方式,都可以同伴侶傾下先嘅,睇下邊種方式大家會比較舒服呀。 :hugs:

明白,唔該晒你。想問清楚驗孕棒個part, 如果我係27/5 夜晚驗,用2支唔同牌子驗,結果都係negative。假陰性嘅機會大唔大? 如果我28朝早用晨尿驗,個結果係咪會準啲?

同埋想問吓,假設我2/6 驗咗係negative, 個結果係咪都有機會唔一定準確?會唔會有可能受身體狀況影響到體內hGC值冇咁高而測到假陰性?

Hello
關於驗孕時間嘅問題,其實Kaleo之前同你解釋過,因為卵子受精著床需要6-10日時間,所以喺發生性行為嘅7日後驗孕會得到初步結果,而11日之後驗孕就會得到比較準確嘅結果。而你最後一次發生性行為係5月22號,正如Kaleo所講,你喺5月29號驗孕會得到初步結果,如果想得到較為準確嘅結果,就要耐心等到6月2號再進行驗孕。所以你5月27號嘅驗孕結果,可以好準確咁肯定5月18號發生嘅性行為冇造成懷孕,而5月22號發生嘅性行為,就需要之後再進行驗孕先可以肯定到。 :blush:

現時市面上嘅驗孕棒都有好高嘅靈敏度(sensitivity)同特異性(specificity),除非包裝/說明書明確要求,否則即使唔係用晨尿進行驗孕,結果都會有好高準確性,出現「假陰性」嘅可能性極低。同埋好多時候,驗孕結果準唔準除咗同驗孕日子相關之外,都同你有冇完全跟足唔同牌子嘅驗孕棒嘅指引有關。如果你擔心嘅,你可以用幾個唔同牌子嘅驗孕棒進行驗孕,或者使用電子驗孕棒。同埋建議你如果要用唔同牌子驗孕,唔好相隔太短時間排尿,你可以喺唔同時段去驗孕,或者將一次嘅尿液擺係個器皿到然後同時用唔同牌子嘅驗孕棒進行檢驗。如果你6月2號嘅驗孕結果依然係陰性,你就要嘗試相信呢個結果,話俾自己知「我冇懷孕」。 :relaxed:

明白明白,想問清楚關於家計會個度,因為我未過26
如果2/6 驗咗係positive , 我係咪冇得即日walkin 去青少年保健去睇?一定要預約? 如果預約係咪一定預約灣仔嗰間?
有冇話成個過程由睇第1次開始到最尾完晒(藥流/手術完) 要幾耐度?

hello 你好啊 :smiling_face_with_three_hearts:~ 因為唔肯定每日家計會診所嘅人流,為保險而見都可以先喺家計會網站預約:e服務預約。又或者可以電話預約,咁就更加直接 :raised_hands:。家計會有三間診所可以選擇,灣仔,旺角同葵芳,你都可以視乎交通去選擇邊間比較方便你~

至於家計會嘅終止懷孕嘅流程一般唔會超過10至12週。因為家計會規定求診嘅時候,求助者嘅胎齡唔能夠超過10週。喺第一次求診嘅時候,醫護人員會先進行基本嘅身體檢查同評估,包括驗孕、子宮頸細胞嘅檢驗等等。醫護人員都會了解求助者嘅病史、懷孕週數、講解繼續同終止懷孕嘅選擇,都會講埋避孕方法。同時第一次求診嘅時候都會有輔導員在場,令求助者更了解自己意願同選擇 :pleading_face:始終終止懷孕都喺比較重大嘅決定。

完成第一次求診之後,求助者都可以有時間考慮下醫生嘅建議同面對嘅選擇。 第二次到診,大約隔一個星期,就可以作出決定,繼續懷孕定喺終止懷孕。同時都會約埋手術日子,第三次到診就會正式做手術。進行手術嘅當下,求助者嘅胎齡唔能夠超過10週。所以相距第一次求診同埋最後做手術,整個過程都唔會相距太耐~ 希望可以幫到你啦 :raised_hands: :smiling_face_with_three_hearts:

唔該晒你! 我今日驗咗都係negative, 會唔會再等多1星期驗就可以100%confirm 係冇?

正如我地之前解釋咗,驗孕棒嘅準確度係好高嘅,今日已經距離你最後一次發生性行為(5月22日)過咗11日,你嘅驗孕結果都會係比較準確可靠嘅。但如果你依然都係好擔心嘅,你都可以再驗孕一次。但係要設立目標被自己,嚟緊呢次驗孕係最後一次,如果結果都係陰性,你就要嘗試相信呢個結果。話俾自己知「我冇懷孕」,然後耐心等待下一次月經出現。 :blush:

見到呢件事都對你都造成咗好多困擾同埋擔憂,都想提返你,下次再發生性行為嘅時候,記得使用安全套,既可以減低懷孕風險,又可以防止性病同埋其他感染(例如細菌感染、念珠菌等等)嘅機會。關於正確使用安全套嘅資訊,可以參考: :nerd_face:
https://www.instagram.com/p/B4EX0FVFLUf/?utm_source=ig_web_copy_link

或者你都可以同伴侶商議使用其他避孕措施,例如荷爾蒙避孕法:避孕藥同避孕針,而呢兩種方法就唔會阻隔到性病或者其他感染嘅傳播。避孕針要由醫生注射,而避孕藥都建議第一次服用之前要諮詢醫生意見,等醫生評估下你嘅身體狀況係咪適合同埋適合食邊款避孕藥。 :relaxed:

同埋你都有提及有出現非經期陰道出血嘅現象,建議你都可以多留意下之後有冇再出現呢個狀況,如果之後幾次月經週期內都出現非經期陰道出血,咁都建議你要去睇下醫生,睇下有冇一啲病理性嘅原因(例如荷爾蒙水平問題、子宮頸疾病)導致。 :persevere:

如果有需要,你可以預約家計會青少年保健中心/母嬰健康院/部分私家診所去睇醫生呀。 :woman_health_worker:t2: :man_health_worker:t2: