食多咗避孕藥

同男朋友喺17號同26嘅都有sex, 內射咗
但我呢幾日食完藥五個鐘內都有輕微嘅嘔…
我總共補食咗兩粒
會唔會無咗避孕效果? 好驚有咗
我食yasmin

Hello
首先想了解多少少資料先。你食yasmin食咗幾耐?第一次食之前有冇睇過醫生? :face_with_monocle:

雖然避孕藥好容易買到,但係每一款避孕藥都有唔同嘅劑量同成份,所以建議第一次食避孕藥之前要睇下醫生,但醫生評估下你嘅身體狀況係咪適合同埋適合邊款避孕藥,有啲人有心臟/腎臟/肝功能/免疫系統問題,就未必可以服食避孕藥。同埋持續服用避孕藥嘅話,都建議每年去睇一次醫生,睇下自己仲適唔適合繼續服用同一款藥。如果你第一次食之前冇睇過醫生,都建議你盡快去預約家計會診所/母嬰健康院/部分私家診所去諮詢下醫生意見。

同埋都想了解返你5月17號同26號嘅性行為嘅時候係你服藥幾耐之後發生? :thinking:
如果呢個係你嘅第一排避孕藥,而你係喺月經週期嘅頭5日,建議喺開始食藥嘅頭7日如果發生性行為嘅話要配合埋安全套;而如果你係喺月經週期嘅5日之後先開始食第一粒藥,咁就建議喺開始食藥嘅頭14日如果發生性行為嘅話要配合埋安全套。因為身體需要時間建立避孕功效,配合安全套一齊使用可以降低懷孕風險。而如果嗰兩日性行為係喺我所講嘅7日/14日內發生,如果你擔心懷孕風險,你可以驗孕,喺發生性行為嘅7日後驗孕會得到初步結果,而11日後就會得到比較準確嘅結果。
而如果你而家已經服用咗藥物超過一個月,咁身體應該已經建立咗穩定嘅藥效,懷孕風險會好低。如果你性行為個日食完藥過咗5個鐘先嘔吐,原則上應該唔會影響藥物成份嘅吸收,其實係可以唔需要補食藥嘅,但既然你有補食返藥,咁懷孕風險都會好低嘅。

同埋都想了解下你嘔吐嘅原因係因為啱啱開始食出現嘅副作用?定係有其他唔舒服,例如腸胃炎?如果係因為副作用,其實都要睇下你身體對於呢隻藥嘅適應情況,睇下需唔需要轉食其他藥。而如果係因為身體其他狀況導致嘔吐,而你同時又有食其他藥嘅話,可能對於藥效都會有影響。再加上你補食咗兩次藥,呢一個服藥週期都有改變,所以都係建議你盡快去睇下醫生先呀。 :woman_health_worker:t2: :man_health_worker:t2: