18/5 果晚發生左性行為 因為第一次所以沒有插到陰道好入 當時冇帶套 最後只係陰道口磨蹭 磨之前有我既口水 想請問我會唔會有左？今日28/5 中午買左三個牌子驗孕棒 都係陰性 我信唔信得過？
Hello
陰莖喺受到刺激嘅時候會分泌透明嘅尿道球腺液，當中有機會含有少量精子，所以就算只係喺陰道口摩擦或者只係插入陰道好少，或者即使係第一次插入，因為陰道前膜（俗稱處女膜）唔係完全封閉嘅，都依然有一定嘅風險。建議你地下次再發生性行為嘅時候，即使唔係發生陰道陰莖插入式嘅性行為，都可以考慮使用安全套，避免陰莖分泌物（尿道球腺液同精液）接觸到陰道口造成懷孕風險。關於正確使用安全套嘅資訊，可以參考：
https://www.instagram.com/p/B4EX0FVFLUf/?utm_source=ig_web_copy_link
而驗孕方面，喺發生性行為嘅7日後驗孕會得到初步結果，而11日後就會得到比較準確嘅結果。5月28號嘅驗孕結果可以初步確認你5月18號嘅性行為冇導致懷孕，如果你想得到更加準確嘅結果，你可以喺5月29號或之後再進行驗孕嘅。現時市面上嘅驗孕棒都有好高嘅靈敏度（sensitivity）同特異性（specificity），結果亦有好高準確性。所以如果你擔心嘅，你可以聽日進行最後一次驗孕，如果結果都係陰性，就要相信呢個結果。 