食完事後食事前 月經流啡嚴重

5月7日同男朋友sex完(無套無內射但排卵期),同一日夜晚去咗家計會食事後藥,食完有少少頭痛、谷m,但冇擾亂m期
一直都想用更安全嘅方法避孕,所以5月17嚟m第一日開始食事前避孕藥,一直每日準時食到依家

17號開始嚟m嚟咗七日,比平時長三日,流量算正常,但問題在於流啡流咗六日,一直到今日仲有流:sob::sob:想知道係我子宮有問題,定係事前/ 事後避孕藥的副作用?如果食完事後 之後嘅果次m期再食事前會唔會有問題?:sob::pray:t2:求幫忙

hello請問有冇人可以答一答:sob::sob::pray:t2:情況真係有啲急 同埋好驚:sob::sob:

Hello @Happypooh :blush: :wave:t2: 首先好欣賞你發生唔安全嘅性行為後,有即時去家計會食事後藥,希望可以及時做好補救嘅措施 :relaxed: :+1:t2:

都想了解一下在家計會攞事後丸嘅時候,有無同醫生提起過有打算來經後開始服用避孕藥?而醫生係點樣答覆你 :grinning:? 又或者服用避孕藥之前,有無再去過家計會 / 其他婦科診所諮詢醫生嘅意見? :relaxed:

因為每個牌子/款式嘅避孕藥內含有嘅荷爾蒙類型同埋劑量都會有唔同,有機會某部分避孕藥唔適合你嘅體質,係有機會引致嚴重嘅副作用。而且避孕藥亦並非每個人都適合服用,一般常見唔適合食藥嘅情況,例如有心血管疾病、不規律陰道出血、體重過高等。所以一般都會建議服用避孕藥之前,必須諮詢醫生嘅意見,等醫生評估你嘅體質/生活習慣,係咪適合服用避孕藥,或者適合服用邊一個牌子/款式嘅避孕藥 :blush:

所以,一般如果服用避孕藥之前,未諮詢過醫生意見的話,其實都會建議搵醫生諮詢一下先,咁樣之後繼續服用都會比較放心 :relaxed: :wink: 而睇醫生嘅時候,都可以同醫生講你宜家服用緊邊一款避孕藥,睇睇醫生覺得係咪適合繼續服用,或者有其他牌子/款式嘅避孕藥比較適合你 :blush:

而流啡方面,於服用避孕藥初期(持續約3-6個月),出現不規則陰道出血 / 流啡,係服用避孕藥適應期期間,好常見嘅副作用 :blush: 流啡情況幾時會消失亦好視乎個人體質。當然未能確認今次流啡是否完全與之前服用嘅事後丸無關,或者有無加強到避孕藥嘅副作用效果,不過都想講番即使之前無服用過事後丸,都係會有機會出現流啡呢個副作用,所以今次嘅情況無需太擔心啊~

如果你覺得呢個副作用(流啡)較難接受,或者令到你覺得好唔舒服的話,建議可以致電番家計會預約個期睇睇醫生,表示最近開始左服用避孕藥,不過覺得個副作用比較強 / 好唔舒服,想做番個檢查,睇下有無需要換過第二隻藥 :grinning:。服用較低劑量荷爾蒙嘅避孕藥,通常副作用都會較少,不過對於調節經期方面就會相對無咁有效。所以都視乎你本身服用避孕藥嘅需要係D咩,如果只係為左避孕嘅用途,都可以同醫生討論一下會否轉服較低劑量荷爾蒙嘅避孕藥啊,相對副作用一般都會較少。

多謝你回覆:pray:t2::cry:我食事後丸之後冇同姑娘講想食事前,係朋友推介食美意避 算最低劑量嘅一隻事前:cry:

雖然避孕藥好容易買到,但係都建議第一次服藥之前要見下醫生,等醫生檢查下你嘅身體狀況,睇下你適唔適合食避孕藥、同埋適合食邊一款藥。每一款避孕藥都有唔同人造荷爾蒙劑量同種類,可能你嘅朋友適合食美意避呢一款藥,但唔代表一定啱你。同埋雖然低劑量嘅避孕藥會產生相對比較少嘅副作用,但係每個人對藥物嘅反應都會有所不同,即使用咗低劑量嘅藥物,都唔代表一定唔會有流啡呢啲副作用現象。 :persevere:

正如Sze所解釋,流啡係服用避孕藥初期一種比較常見嘅副作用。不過因為你服藥之前未見過醫生,所以建議你盡快預約家計會診所睇醫生先 :woman_health_worker:t2: :man_health_worker:t2:,記得要同醫生講清楚你服用咗邊款藥、服用咗幾耐、同埋除咗流啡之外有冇其他副作用,等醫生評估下你係咪適合繼續食避孕藥、同埋你需唔需要轉藥。無論需唔需要轉藥,都想提返你,人體需要一段時間去適應避孕藥,呢個適應嘅時間長度因人而異,通常為1-3個月,但亦都有人可能需要長啲時間,不過理論上唔會超過6個月。甚至有啲人會需要試幾款唔同嘅藥先搵到最適合自己嘅藥物。所以可能你都要有定心理準備,即使醫生幫你轉咗藥,你都係有可能因為身體適應緊藥物所以出現一啲避孕藥常見副作用(例如都係有機會會流啡),而如果副作用唔係太嚴重嘅話呢樣嘢係唔需要太擔心嘅,只要俾啲時間身體去適應。同埋如果醫生認為你可以繼續服藥,而你都決定要長期服藥嘅話,都要記得每年去見一次醫生,睇下自己係咪適合繼續服藥呀!~ :wink:

唔該曬你哋覆我呀:sob::pray:t2:我安心咗好多知道流啡係正常副作用 第七日已經開始冇流啡 擔心少咗:pleading_face:
另外想問,上次經期第三日嘅時候(亦係第一次食事前避孕丸的第三日)有同男朋友sex,之後先知道原來第七日食避孕藥先有效,咁我果次月經時候sex懷孕嘅機會大唔大㗎?:sob:好擔心啊

hello 你好啊~ :smiling_face_with_three_hearts: 因為服用避孕藥嘅頭七日,身體未適應藥效,藥效未完全發揮,所以進行性行為嘅時候需要使用安全套。如果冇使用嘅話,都會有一定程度上嘅懷孕嘅風險 :pleading_face:,如果你依家真喺好擔心自己懷孕嘅話,都可以嘗試買驗孕棒檢驗。可以跟足說明書上嘅指示嚟檢驗。發行性行為7日後,可以獲取初步如果;性行為11日後,可以得出比較準確嘅結果。建議買嘅時候可以買兩枝,如果兩枝都顯示negative 嘅話,就代表結果喺冇懷孕~ 希望可以幫到你啦~ :raised_hands:

我明白:sob:但因為係經期間進行性行為,加上我依家一直有流啡,可唔可以代表排除懷孕㗎?

:sob::sob::sob:

即使喺月經期間發生性行為,本身會有一定嘅懷孕風險,因為精子可以喺體內生存幾日,而如果咁啱嗰個週期較短,排卵期距離月經第一日好近,咁都係會有風險嘅。
但如果你所講嘅性行為係喺經期第三日發生,而你又係由經期第一日已經開始服藥,咁原則上懷孕風險係好低嘅。但如果你都係好擔心嘅,你都可以進行驗孕。喺性行為發生完嘅7日後驗孕可以得到初步結果,而11日後驗孕就會得到比較準確嘅結果,距離你嗰次性行為已經過咗11日,如果你想驗孕嘅話,結果會係準確可靠嘅。 :wink:

建議你可以盡快預約家計會診所睇醫生,可能了解完你嘅身體情況,你會更加安心,同埋諮詢完醫生意見你都應該會更加清楚你仲適唔適合繼續服用呢隻藥,睇下你需要俾身體啲時間適應,定係要嘗試一款新藥。 :blush: