事前避孕藥的問題

你好,請問我每天都有食事前避孕藥,但沒有用任何其他安全措施,仍會有bb嗎?

另外想請問輕微肚屙會令避孕功能失效嗎?謝謝

Hello
都想了解返多啲資料先。你服用咗避孕藥幾耐?第一次服用之前有冇睇過醫生?你肚屙嘅情況距離服藥後幾耐?有冇因為肚屙問題食其他藥?肚屙係因為服用避孕藥嘅副作用定係其他原因導致? :face_with_monocle:

雖然避孕藥好容易買到,但係每一款避孕藥都有唔同嘅人造荷爾蒙劑量同成份,所以建議第一次食避孕藥之前要睇下醫生,等醫生評估下你嘅身體狀況係咪適合食避孕藥同埋適合邊款避孕藥,有啲人有心臟/腎臟/肝功能/免疫系統問題,就未必可以服食避孕藥。同埋如果持續服用避孕藥嘅話,都建議每年去睇一次醫生,睇下自己仲適唔適合繼續服用同一款藥。如果你第一次食之前冇睇過醫生,都建議你盡快去預約家計會診所/母嬰健康院/部分私家診所去諮詢下醫生意見。 :woman_health_worker:t2: :man_health_worker:t2:

如果呢個係你嘅第一排避孕藥,而你係喺月經週期嘅頭5日內開始食第一粒藥,喺開始食藥嘅頭7日如果發生性行為嘅話建議要配合埋安全套;而如果你係喺月經週期嘅5日之後先開始食第一粒藥,咁就建議喺開始食藥嘅頭14日內如果發生性行為嘅話要配合埋安全套。因為身體需要時間建立避孕功效,配合安全套一齊使用可以降低懷孕風險。而如果你喺我所講嘅7日/14日內發生過性行為,而你擔心懷孕風險嘅,你可以考慮自行驗孕,喺發生性行為嘅7日後驗孕會得到初步結果,而11日後就會得到比較準確嘅結果。 :blush:

而如果你而家已經服用咗藥物一段時間,咁身體應該已經建立咗穩定嘅藥效,懷孕風險會好低。口服避孕藥有好高嘅避孕成功率,如果每日按時服藥,冇漏食/食完短時間内嘔吐/嚴重肚瀉嘅話,避孕成功率有99.7%,所以唔配合其他安全措施一齊用,懷孕風險都係好低嘅。但係都想提返你,避孕藥唔可以防止性病傳播或者其他感染(例如念珠菌等細菌感染),如果你想更加安全嘅話,你都可以配合安全套一齊使用。 :relaxed:

如果你肚屙嘅情況距離服藥有一段時間同埋情況較為輕微,咁理論上粒藥有足夠嘅時間被消化吸收,應該唔會影響藥效嘅;但如果肚瀉情況都比較嚴重,咁就可能要問返醫生需唔需要補食,同時都建議發生性行為嘅時候使用安全套,以防藥效受影響導致相對較高懷孕風險。同埋如果你係因為服藥副作用而肚屙,甚至係因為食避孕藥導致你腸胃更加敏感,可能都要再睇下身體對於呢款藥嘅適應情況,或者諮詢下醫生睇下需唔需要轉藥。如果你係因為腸胃炎所以肚屙,而你有食消炎藥/抗生素嘅話,係有機會影響避孕藥嘅,建議兩隻藥嘅服用時間要錯開至少2小時。 :grimacing:

我已經食咗避孕藥差唔多半年啦,食之前都有去家計會問過姑娘醫生嘅意見先食嘅:relaxed:

好多謝你詳細嘅回答呀,我明白多咗好多,都令到我無咁擔心:heart: