好擔心第一次就中🥲

我地係26/5進行過一次性行為 (我地兩個都係第一次)期間無成功插入,全程有戴套。之後都檢查過無穿,裡面既液體無漏出黎。

但戴套既時候我掂到男朋友下面,唔肯定有無精液係手,之後我地有拖過手之後佢再用拖過手既手掂個套既出面。但佢話我隻手當時係乾既

另外我 around 25/5 左右開始胸脹痛 但到依家都一直未黎m,呢個禮拜開始比較多胃氣(唔知關唔關事)

平時m期都唔準,中間有時會有不規則出血,之前照過超聲波(上年) 醫生話無野,屬於功能性月經失調,但情況未嚴重到要食藥,醫生都有講過話如果中間有出血會令月經遲黎,我上一次月經係26/4,而11/5有出現過中間出血

琴日(2/6)發現有少量出血 (真係得一兩點咁)顏色偏暗,比平時不規則出血都仲要少

今朝(3/6)用過驗孕棒驗晨尿係negative 但我地都仲係好擔心:sob:

想請問下咁樣係咪即係無事?

你好 @ho_ganggang :wave:t2: :wave:t2: :wave:t2:

唔使擔心㗎,懷孕嘅風險係極低嘅。 雖然陰莖喺受到刺激嘅時候會分泌嘅透明液體,當中有機會含有少量精子,果啲叫尿道球腺液,但係精子離開咗身體暴露喺空氣中其實好快會死亡,因為精子需要媒介提供養份先生存到,而呢啲媒介就係精液同尿道球腺液,喺空氣中/接觸咗衣物之後呢啲液體會好快揮發乾咗,就好似你伴侶話你隻手都係乾嘅咁,精子唔會生存到,再加上你地都無成功插入到,懷孕嘅風險真係好低。 :relaxed:

嚟月經之前都有啲人會有胸漲嘅情況,都唔洗特別擔心嘅,因為懷孕未必一定會有胸漲嘅,所以我地都唔可以單憑一個症狀去判斷有無懷孕嘅。至於胃氣,應該就係真係有胃氣出現,就算唔懷孕都會有胃氣出現嘅,如果真係好難受,都可以搵醫生檢查,睇下佢會唔會開啲化胃氣藥俾你,令你無咁辛苦嘅。 :wink:

欣賞你好留意自己身體嘅狀況,見到你發現自己身體有異常嘅時候會去睇醫生檢查,醫生都診斷咗係功能性月經失調,所以月經可能會比較唔穩定。另外係同一個月經週期嘅非經期期間有異常嘅出血都有好多原因嘅,例如一啲荷爾蒙嘅分泌失調或者排卵,而你嘅情況好大可能係荷爾蒙失調嘅情況導致有出血同埋月經嘅延遲,都唔洗擔心嘅。可以觀察多一陣,如果真係好擔心,都可以再搵返醫生檢查嘅。 :hugs:

見到你都成日會有月經唔穩定嘅情況,建議你可以去家計會搵醫生檢查下,睇下會唔會適合食事前避孕藥。因為事前避孕藥都係一個好常見用嚟調經嘅方法,食咗之後月經會變得比較穩定啲,而且見你地都開始有性接觸,避孕藥防止意外懷孕嘅成功率比起用安全套更高。但要留意避孕藥唔可以防止性病嘅傳染,如果擔心就可以兩個都一齊使用。你如果相信中醫嘅話,都可以去見中醫師,睇下會唔會透過中醫嘅方法改善功能性月經失調嘅情況嘅。 :laughing:

你係3/6有驗孕,結果係無懷孕,如果想準確啲,都可以係6/6再驗多一次,呢個係性行為後11日,個結果已經非常準確同可信架啦。 :relaxed: