你好呀！
我一直食開Marvelon事前避孕藥（21粒），9個月前喺家計會開既，一直都準時食同埋準時嚟m，我係嚟經後第五日開新藥。
但係我上次嚟m遲咗一日（可能因為時差，啱啱喺外國返嚟），我應該係要星期三晚開新藥，但我到星期四晚先記得，雖然依然係嚟經後第五日，但我係停藥後第八日先食，星期四記得時食咗兩粒，請問咁樣會唔會影響藥效？之後性行為時都有用避孕套，但口交有意外滴咗幾滴落陰毛到，後尾有即刻沖涼，請問咁會唔會有懷孕機會？
謝謝你的解答！！
你好 @Sweets 
你懷孕嘅風險係非常之低嘅，因為你本身已經食咗9個月，藥效已經係身體建立咗，而你只係遲咗一日食，身體依然都有藥效，所以都唔洗擔心住。如果你真係好擔心，都可以係未來7日要發生性行為嘅時候使用安全套，咁就唔洗擔心啦。
因為你有使用安全套，即使口交嘅時候有滴左啲精液落去陰毛度，但你都即刻沖咗涼，精子係非常脆弱嘅，掂到其他物質包括水或者沖涼液， 好快就會死，所以懷孕嘅風險真係好低㗎。
如果真係擔心嘅，都可以選擇一個比較科學啲嘅方法，就係用驗孕棒驗孕啦。你可以喺性行為7日去驗孕得到初步結果，11日後就可以得到更加準確同可信嘅結果。
建議你調整一下記食藥嘅方法，你原本係用嚟月經嘅日子去計算幾時開始食藥嘅，月經週期嘅長短受到好多因素嘅影響，例如會唔會最近食緊藥、病咗、會唔會壓力好大、情緒會唔會好波動、有好擔心嘅情緒等等，即使有食避孕藥比較穩定都有可能好似今次咁遲咗嚟月經到令你記錯咗，可能下次可以係停藥果日開始計7日就食藥，可能就可以避免到今次嘅意外發生。
市面上其實有啲app幫你計幾時食藥嘅，你可以揀自己食緊咩類型嘅藥，佢會自動幫你計好時間，定時提醒你食藥嘅，咁就唔洗擔心食漏藥啦。
多謝你地咁詳細同細心既答覆！
1個讚
你好！
我到今日開始有乳房變大同胸部兩側有少少痛既現象，開始又擔心返係咪懷孕
我大約仲有一個禮拜就會嚟經期，唔知係經前徵兆定懷孕徵兆因為上文講到有精液滴落陰毛後即刻沖涼，但上網睇有其他人話沖涼反而會送咗啲精液入陰道，而我當時沖涼又真係有由上而下咁洗陰部，亦有洗陰道外面，唔知呢個說法係咪真？但我當日完全冇分泌物，即使真係有精液入咗陰道，精子係咪都好快死同唔會游到去子宮？精子活動能力係咪同女性分泌物有關？
謝謝你的解答
Hello
首先想同你解釋返，精子離開咗體外之後暴露喺空氣中其實好快就會死亡，因為精子需要尿道球腺液（陰莖喺收到刺激嘅時候會分泌嘅透明色嘅液體，當中有機會含有少量精子）同精液中嘅液體作為媒介提供養份先生存到；當精液或者尿道球腺液接觸到陰毛，佢地會揮發所以精子就生存唔到。所以喺你所講嘅情況中，如果精液唔係接觸到陰道口嘅話，精子係唔會進入陰道並游向子宮嘅。而喺沖涼嘅時候有水將精液沖走，正常情況下啲沖涼水都唔會進入陰道，亦都唔會因此導致精液進入陰道内 
。而日常清潔其實係清洗大小陰唇之間同埋外陰，唔需要洗陰道入邊嘅，灌洗陰道反而會破壞陰道健康嘅酸鹼平衡。 
再加上你已經持續服用避孕藥9個月，雖然今次開新嘅一包藥你遲咗一日食，但因為你嘅身體已經建立咗穩定嘅避孕功效，所以遲咗一日開始一個新嘅服藥週期對於避孕功效嘅影響會好低。
所以總括而言，你上一次嘅性行為係唔會導致懷孕嘅。 
而你所講嘅胸部脹痛嘅現象，有機會係因為服用避孕藥嘅荷爾蒙導致，同埋我地係唔能夠單憑胸部脹痛呢個現象去判斷有無懷孕嘅。見你都好擔心，建議你不妨驗孕，喺性行為7日後驗孕會得到初步結果，而11日之後驗孕會得到較為準確嘅結果，可能你親眼見到個驗孕結果就會安心啲。 
至於女性分泌物同埋精子活性嘅關係，分泌物嘅粘稠度同埋分泌物多少等等因素都有機會影響精子嘅活性同存活率，但唔代表冇女性分泌物嘅情況下精子就唔能夠進入子宮（而且有時你感覺冇分秘物可能只係啲分泌物未流出嚟）。而令到精子存活同移動嘅最重要嘅嘢都係精液。而你有服食避孕藥一段時間，避孕藥其中一個功效係改變子宮頸分泌物嘅黏稠性，令到精子相對難以穿過分泌物進入子宮。
最後想提返你，服用避孕藥一年之後都建議去家計會見下醫生，睇下你嘅身體狀況仲適唔適合繼續服用呢一款避孕藥，遲啲記得預約返家計會診所呀！ 
多謝你咁詳盡既答覆！！我已經預備去複診架啦，多謝提醒