請問我是否懷孕?好驚!

我食避孕藥差不多大半年 最初食Yaz(因不斷出現流啡) 後尾轉做Yasmin已經食左幾個月 食藥期間有時候會忘記食藥 第二日有補回 4月之中 最後一次性行為係27/4(有全程戴安全套) ,過往經血量正常偏多,但停藥後8/5開始至10/5只出現幾滴少量啡色分泌物 同以往來經期好唔同 從來都無試過咁 唔確定係咪來m定著床性出血 用clear blue驗孕棒先後已驗孕數次 均顯示無懷孕 最後一次驗孕係30/5 都驗唔到有孕 係咪已經可以排除懷孕可能性? 加上呢排比起以往尿頻 半夜成日醒左要去洗手間 (聽聞呢個都係懷孕症狀之一)今日5/6(已經係Yasmin停藥既第3日) 早兩日有好似谷m咁既不適 但宜家完全無左呢個感覺 又完全無m到 我唔想有bb 但我好彷徨 我係咪應該去私人診所驗血?定繼續係來緊10/5繼續開新一盒yasmin食(就算都係無m到)?我有無機會係懷孕?麻煩請你地答下我 唔該曬!

Hello @wsdfxn :relaxed: :wave:t2: 一般受精卵著床需要6-9日,所以性行為7日後驗孕,已經可以得到初步結果。而性行為11日後驗孕,驗孕結果就會較準確及可靠。所以如果最後一次性行為係27/4發生,其實8/5(性行為11日後)或之後進行嘅驗孕,結果已經會係準確及可靠。30/5進行驗孕時,如果整個過程都有依足說明書指示,都無驗到懷孕,已經可以排除懷孕嘅可能性啦 :blush:,無需太擔心。

另外,加上你已經有持續服用避孕藥大半年,雖然間中會忘記食藥,不過如果每次都於指定補食時限內補食番,咁都唔會太影響到避孕藥嘅藥效,懷孕風險係好微 :blush: 當持續服用避孕藥一段時間,藥效已經係身體建立左,你嘅身體會因為避孕藥藥效嘅緣故,而抑制左排卵同埋令精子難以同卵子結合及著床 ,所以懷孕嘅機會係好微,亦唔會出現著床性出血,可以放心啊。

最近停藥期間,只有出現少量啡色分泌物,甚至無月經出現,都係正常嘅情況。一般越使用得耐荷爾蒙避孕措施(例如避孕藥、避孕針),月經嘅血量會變得越來越少。有時視乎每個人嘅體質,經血量嘅情況都會有所唔同,部分人如果身體適應得快D,經血量可能都真係會變到只有幾滴分泌物。原因係因為子宮內膜嘅增厚情況會受到避孕藥嘅藥效影響,而變得越來越薄,相對經血量都會變少左 :wink: 依家避孕藥係服用左幾多個月?因為服用適應初期(約頭3-6個月)月經情況嘅變化可能會比較大,不過之後就會慢慢變得穩定,無需太擔心 :smiling_face_with_three_hearts:

另外,服用避孕藥期間,出現非經期嘅少量流啡、點狀出血,都係常見嘅副作用,係屬正常嘅情況~

不過如果今個月完全無月經出現嘅情況,都令你有D擔心或憂慮嘅時候,都可以考慮去家計會診所 / 婦科診所檢查一下,了解身體嘅情況,都有助令你安心一D :blush:

而尿頻方面,雖然尿頻都係一個常見嘅懷孕徵兆,不過始終尿頻都有好多情況引起 (例如最近飲水過多、泌尿系統出現狀況等)。依家已經能夠撇除左懷孕嘅因素,所以如果當尿頻嘅情況持續,而你都覺得唔舒服感到困擾的話,咁到時可能就建議睇睇醫生,了解一下最近尿頻嘅原因啦。

同埋都想了解一下你服用避孕藥 / 轉服Yasmin之前,有無諮詢過醫生嘅意見?

一般我地都會建議第一次服用避孕藥前,先接受醫生嘅評估及進行身體檢查 :relaxed:。因為每一個牌子、每一款避孕藥,內含嘅荷爾蒙劑量都唔同 ,未必適合每一位女性服用,隨便服用的話,有機會導致身體出現嚴重嘅副作用。加上亦唔係每一位女性,都適合透過服用荷爾蒙避孕藥去進行避孕 。因此,第一次服用嘅時候,醫生一般會因應你嘅體質,去建議比較合適嘅避孕藥牌子及款式。而睇家計會醫生的話,服用一個月之後,醫生應該都會叫你覆診一次,了解避孕藥對你身體出現嘅影響及副作用,睇睇有無需要轉用其他避孕藥,或者需要停藥 :blush: 如果之前係無睇過醫生,亦建議趁今次嘅機會睇睇醫生,了解一下身體狀況係咪適合服用避孕藥先。

最後,因為Yasmin係需要自行停藥7日再開始下一排藥物嘅設計,建議你可以使用一D專為提醒服食避孕藥嘅手機Apps,去提醒自己每日按時服用同過渡停藥期,避免唔記得服藥 :relaxed:。或者都可以考慮使用其他荷爾蒙避孕避孕方式,例如避孕針,去達致避孕同調節月經嘅功效(不過相比之下,避孕藥係調節月經方面,效果就會好過避孕針)。