對上一次黎m係26/4，到宜家5/6都仲未黎，19/5下面有小小啡色既野，20/5無用套入左一陣，跟住戴番套，預26/5會黎m但係無黎到，4/6用過驗孕棒驗過得一條線，今日下面又有啲啡色既野，想問下係有左定係之前啲血未清定無著床出血呀⋯
Hello @smy 
一般受精卵著床需要6-9日，所以性行為7日後驗孕，已經可以得到初步結果。而性行為11日後驗孕，驗孕結果就會較準確及可靠。所以如果最後一次性行為係20/5發生，其實31/5（性行為11日後）或之後進行嘅驗孕，結果已經會係準確及可靠。如果4/6進行驗孕時，如果整個過程都有依足說明書指示，都無驗到懷孕，已經可以排除懷孕嘅可能性啦 
，無需太擔心。
而月經方面，都想了解一下過往月經週期大概係幾多日 
？有無試過好似今次咁大概40日未黎？月經來遲嘅原因都有好多，例如最近有無生病服過藥（特別係抗生素）、情緒有起伏、壓力過大、生活作息唔定時、飲食唔均衡等。都可以睇睇最近身體有無經歷過以上嘅情況，有機會令月經來遲 。
著床性出血方面，一般血量會較少，顏色較淺，可能會少至只有一滴血，部分人可能血量會多少少 。血量係護墊可以承載嘅血量 ，通常只會一日內一瞬間流完 ，並唔會似月經咁持續黎4-5日。著床性出血時亦唔會好似黎月經咁身體有劇烈感覺（例如肚痛、頭暈等）。所以從經血量、持續日子、身體感覺上，著床性出血同一般月經都有好大分別 
，不難分辨。所以擔心的話，都可以觀察一下之後幾日分泌物／陰道出血嘅狀況，睇下係咪都似著床性出血，還是比較似經前徵兆／來經啊。
出現啡色分泌物嘅狀況，唔一定係懷孕所引起 經前症狀會因為每個人嘅身體嘅情況而有所唔同，唔係每一個女性，亦唔係每一次月經都會經歷經前症狀。所以咖啡色嘅分泌物，今次都有機會係來經前嘅徵兆，可以睇多幾日先
不過最後都提醒番陰莖性興奮嘅時候，會分泌出透明嘅尿道球腺液，內含少量精子，係有機會導致懷孕。所以下次發生性行為時，建議整個過程都戴好安全套，一方面可以減低懷孕風險，另一方面都可以避免性病傳播嘅機會啊 。