點樣調整性需要同對伴侶的期望

同男朋友最近發生咗第一次性行為,男朋友需求好大,雖然佢唔會迫我,但當我第一次好明確拒絕佢時,我feel到佢失望,佢有講我想唔想都好重要,但接近1日時間都對我冷淡咗…我就開始內疚同自責,覺得自己應該要滿足對方嘅需要,甚至會諗係咪我應承佢,大家就唔會咁唔開心呢。因為feel到佢失望,我亦變得好焦慮,怕佢嬲/唔要我,我仲想佢繼續好溫柔對待我。我亦諗返好多以前ex點樣因為我拒絕佢而黑面/對我差嘅片段。結果成晚都瞓得唔好,明明想早啲休息仲搞到咁……

今次拒絕本來係照顧自己先嘅決定,想休息下,同埋內心總係怕對方係為咗搞野而同我一齊。對方似乎都唔太處理到呢種對自己同對我嘅失望,有D唔想理。佢有話怕之後會越黎越忙而無時間,呢啲想法都係後尾再傾先知。我都有坦白同男朋友講,我只係拒絕佢呢一次,唔係拒絕佢呢個人,我仲係好想同佢一齊。其實我都想同佢做啊,只係無佢咁密,咁有需要,亦怕成日做會好似搞上癮咁,如果次次見都做,就好似會無曬其他正常交往嘅行程咁,不過呢啲我無特別同男友傾。佢最後自己搵方法抒發咗情緒就無野了,咁我都放心左啲…

究竟點樣調整大家對性嘅需要呢?係咪當一方提出要求,另一個拒絕,都會咁失望架?我係咪都唔應該expect對方係我拒絕佢個時仲會溫柔對我呢?拍拖好似都會成日面對呢啲失望嘅時候,可以點面對呢…

Hello~ 首先多謝你信任我地,同我地分享你嘅煩惱:thought_balloon: 的確每個人嘅性需要都唔一樣,而處於仼何關係之中,我地都有權按我地自己嘅意願同意/拒絕發生性行為,所以都好欣賞你有同男朋友表達你嘅諗法:+1:t2:

無錯其實即使係性以外嘅事情,當一方提出請求而被拒絕嘅時候,都難免會感到失望,依個相信你都好理解,但我覺得你講得好好嘅一點係,你並唔係拒絕男朋友本人,只係拒絕性行為依件事,咁樣可以讓男朋友理解你拒絕佢並唔係因為唔愛佢,覺得佢做得唔好。

至於點樣解決性方面兩個人嘅期望落差,建議可以男朋友喺有性需要而因為各種原因未能發生性行為嘅時候,透過自慰嘅方式去解決性需要。明白自慰同性行為嘅感覺始終唔一樣,但係男朋友都可以嘗試下利用唔同嘅性玩具去滿足佢對性刺激嘅需求,而且宜家仲有啲性玩具可以用電話app遙距控制,咁就可以喺自慰嘅時間拉近相方嘅距離:revolving_hearts:

而喺其他方面嘅期望落差上,其實最重要都係溝通,例如當一方對於一件事有期望嘅話,可以直接同對方講,了解下對方嘅諗法,咁就可以減少其中一個人單方面期待,而到事情發生嘅時候先發現對方唔係咁諗而更加失望啦~