也許看了不少IIA IIB 電影，常聽到故事中都有「一晚造愛XX次」的對白，使我好奇一問，射精後不久陰莖再度硬起，再度抽插（和陰道或肛門），在生理上是正常不過的事？我估點樣計造一次愛應該不是用射精次數衡量吧。請指教。
Hello~ 其實好多時成人影片為左吸引觀眾，而編排誇張嘅標題同拍攝手法，演員亦都係經過特別挑選，所以好多性愛嘅情節都係唔合乎現實嘅。例如你提到影片中嘅男演員喺短時間內多次射精，有機會係分左幾次拍攝再剪輯埋一齊，又或者係特登挑選持久力較高嘅男演員。所以並唔代表所有男性都係咁，亦都唔需要以此作評估性能力嘅標準
明白你意思，謝謝。我主要想問一個正常男士射精後，通常幾時（20、30分鐘？）可以再次勃起（可以繼續抽插）？例如射精後受到性興奮性刺激等。
Hello
其實射精之後幾耐可以再勃起然後進行插入式嘅性行為，呢個時間嘅長度係因人而異嘅，甚至每人每次所需嘅時間都會有所唔同。射精之後陰莖會需要一段時間恢復對於刺激嘅條件反射反應，所以喺恢復期間唔能夠因為受到刺激而夠勃起，可能你會聽過有啲人話呢段時間係「不應期」或者「聖人模式」。而你所講嘅20－30分鐘只係大概嘅平均時間，未必代表個個都要係咁，有啲人需要長啲時間（可能一個鐘左右）去俾陰莖休息，而有啲人需要嘅時間相對短，可能15分鐘內陰莖已經可以再次充血勃起。而影響呢個時間長短嘅因素有年齡、當日嘅身體狀況、環境、壓力、刺激感、休息夠唔夠、夠唔夠放鬆等等。而只要能夠正常勃起，無論呢段休息嘅時間有幾長，都唔關勃起功能事嘅，唔需要擔心如果「不應期」相對比較長係咪唔正常或者陰莖功能有問題。
見你都會好奇影視作品入面點解男演員可以連續射精，正如Ana所解釋，嗰啲始終係戲，會經過剪接編輯，唔一定反映真實嘅情形，所以我地唔需要以呢啲影視作品作為標準嘅。 
令人愉悅嘅性行為未必係取決於射精嘅次數，反而更加緊要嘅係同伴侶嘅溝通，睇下點樣可以令大家都覺得舒服同埋享受。「不應期」期間雖然唔能夠進行插入式性行為住，但係唔少人會用呢段時間傾下計，進行親吻或者愛撫，或者純粹攬住休息，都不失情趣同埋親密感㗎。 