係唔係食事後丸好啲?

做愛既時候去到中間有啲想射,咇左小小出黎就忍住左,見到個套前面個到係有幾滴,心諗應該無咩事就繼續。
不過完事既時候,拎返出嚟睇個環好似有啲精,唔知係咪抽插既時候倒流左出嚟,有啲擔心會入左小小去陰道。女朋友亦都感覺到有啲液體係陰道入面,事後發現陰道流出左啲白色既液體,好擔心係精液,不過個套無穿,上網查過又可能係陰道既分泌物。而女朋友又正值危險期,咁既情況係咪食事後丸比較安全?
同埋想問一問事後丸既副作用大唔大?會唔會好影響身體?女朋友好擔心。感謝:pray:

你好 @Hiiiiiii :wave:t2: :wave:t2:

如果你有全程使用安全套嘅話,就算射咗入安全套裏面,懷孕嘅風險都好低。而且你都有檢查過個安全套無穿到,都唔洗擔心嘅。同埋只要安全套嘅尺寸係緊貼陰莖嘅話,基本上都唔會係抽插過程鬆脫,同埋流出精液嘅。 :hugs:

除非你喺射完之後冇即刻抆出嚟,因為當射完精之後,陰莖會慢慢回復疲軟狀態,同安全套分離,導致裏面嘅精液流出,因而係過程當中,可能會唔小心掂到陰道口,甚至更入嘅位置,導致較高嘅懷孕風險。 :exclamation:

如果個安全套都無穿,基本上都可以排除係精液嘅情況。正常嚟講,陰道嘅分泌物都會係透明、類似蛋清狀態咁嘅,但係喺性行為嘅抽插過程中,可能都會因為摩擦導致分泌物變得濃稠啲,有時會呈現奶白色嘅情況,你見到嘅情況應該係陰道嘅分泌物。 :wink:

建議你可以先去買驗孕棒驗孕先,可以係性行為7日後驗孕得到初步結果,11後驗就會得到比較準確嘅結果架啦。

另外,知道有好多人都會用安全期或者危險期作為避孕措施,其實並唔有效。因為一個月經週期係計第一日嚟月經去到下一次嚟月經之前果一日,所以一日未嚟月經,我地都唔能夠知道你嘅月經週期有幾長,變相都唔可以話知道你嘅安全期或者危險期係幾時架。而且唔係每個人嘅週期日子都係好似啲app或者網上嘅計算器咁係28日,甚至未必每個月都一模一樣,所以計算安全期或者危險期並唔係一個科學嘅避孕方法。 :relaxed:

的確,食事後丸都會出現一啲副作用嘅,例如頭痛、噁心、頭暈、疲倦、經痛、腹痛、背痛及乳房脹痛等,同埋比較常見都會令下一次嘅經期出現一啲變動,例如日子或者血量上嘅改變。但係係一般情況下,呢啲副作用都唔會持續超過24至48小時。同埋有無出現副作用唔係一個代表藥物有無效嘅指標嚟嘅。 :wink:

不過由於事後丸係香港係處方藥物嚟,所以醫生都會根據你嘅情況開唔同嘅事後丸俾你,如果出現咗一啲副作用,都可以搵返醫生,所以都唔洗擔心嘅。 :smiling_face_with_three_hearts: