Flashbacks

幾年前,係我16歲既時候我識左我第一個認真既男朋友,一開始我覺得佢好好,好錫我,亦都好開心咁過左3個月。之後有一日,我地放學之後佢話不如上去屋企同佢隻狗玩。一開始我都覺得唔係咁好,始終我唔想隨便咁上佢屋企,但係佢不停咁叫我上,tum下tum下咁我就上左去。

一上到佢屋企,我以為都係係客廳玩下狗仔,點知佢就已經拖左我入房,話唔想俾佢屋企人見到我,所以入房好啲。之後佢就開始逼我除衫,摸我個胸,錫我。成個過程我好唔舒服,喊住咁樣不停咁樣嗌唔好,推開佢。到我終於推開到佢,我即刻離開佢屋企,好想同佢分手。點知佢發番我脾氣,講好多晦氣說話,又用死威脅我,當時好蠢既我就咁繼續同佢一齊。

之後我盡量都避開唔想再上佢屋企,但係有時佢半推半逼,話只係去睇下劇溫下書,但係次次都會係重複同一件事。後來,佢甚至會逼我幫佢同埋指交,我地有時放左學會去公眾地方做功課,而佢成日都冇啦啦拉我入殘廁,亦都試過係K房,我去完廁所之後佢就入黎。 每一次我都係好驚,喊住咁叫佢停。每一次我都同自己講唔可以再一齊,但我永遠都冇辦法走出哩段關係。

直到兩年後,我終於都走出左。但係同佢分手之後,我單身左一段時間,哩啲回憶我都慢慢冇再諗起。直到學校有一個男仔鍾意我,我地一齊左。每次佢一同我close 啲既時候,我就會開始有哩啲flashback,係一啲我比佢逼埋牆喊住咁叫唔好既畫面。試過有一次,一大班同學去玩,唔夠床,大家都覺得我地一齊訓應該冇問題,點知我突然好驚,好肯定咁話我唔可以同佢一齊訓。哩個男仔我只係同左佢一次兩個月,唔係唔鍾意,只係我會好驚好唔舒服。

我一直都冇為意,但係之後每當我對住鍾意既男仔,每一次距離開始親近,有機會開始既時候我都會有哩啲flashbacks,會即刻縮沙。就算一齊左之後我亦都想像唔到點樣可以再同男朋友有sex,就算平時親密少少,我都開始覺得唔自在。我覺得自己好蠢,以前好冇用搞到自己而家咁樣。每一個男仔都會想有個正正常常既女朋友,我只係覺得我比唔到男朋友佢值得既野比佢。

我好想以後唔再有哩啲flashbacks, 好想好似個正常女仔咁樣享受拍拖,好想忘記以前既野

你好呀 @2058 :wave:t2:多謝你願意將呢件埋藏喺你心裏面嘅事話俾我哋聽~ :smiling_face_with_three_hearts:

對於別人嘅接近,你暫時都無辦法接受,一次又一次差唔多嘅場景,都會令你諗起果啲俾人強迫嘅時刻,即使你知道面前呢個人無逼你,突然腦海就會Flashback以前嘅畫面,將當時嘅緊張、驚慌失措、無助、厭惡等等嘅情緒一下子帶到依家呢一刻,於是你無辦法再接受其他人嘅接近。 :pleading_face:

我見到你會話自己蠢,好無用,但係你要記住,錯嘅人唔係你!唔需要自責!你只係當時好想好想維持一段關係,只係當時嘅你未懂得點樣做,用咗一個比較被動嘅方法,就係迎合對方。 :face_with_monocle:

呢件事需要慢慢嚟,唔洗逼自己,因為係需要時間去處理嘅。我哋有時面對一個問題,都係想逃避,或者切斷佢,希望可以一刀斷尾。但係承認自己,I am not OK,可能就係解開呢個結嘅第一步。 :wink:

送首歌俾你,係台灣一個小眾歌手演唱,叫求救訊號 I’m Not OK

「小小的那個我 不太懂訴說

老躲在泡泡中 靜靜看世界日升花落」

就好似當時被強迫但唔識開口嘅你咁,係內心世界不斷拒絕,但現實好似無辦法改變咁,似乎仲好似理所當然係咁:「男女朋友理所當然要做愛架啦,有咩問題呀?唔做愛拍拖嚟做咩?做朋友唔好?」 :interrobang:

並唔係架,戀愛除咗性之外,仲有互相支持同理解,伸出信任嘅手,握住對方。記住,一段關係裡面,並唔係所有嘢都係理所當然嘅。 :x:

:bangbang: :bangbang: :bangbang:即使係一段關係裡面,無共識無同意,任何嘅親密接觸或者性接觸都係一個性暴力嚟,都係一件唔啱嘅事嚟架。 :bangbang: :bangbang: :bangbang:

「噩夢又來過 害怕梗在喉頭

誰來接住我 否則我將無止盡墜落」

當每次flashback嘅時候,就好似每次發惡夢咁,「太近啦我唔得」又會諗起以前嘅佢點樣對你,但對住啱啱開始嘅佢,你都好難講出口,變成只有自己去承受。 :pleading_face:

與其自己承受,不如試下同對方講,等對方都知道你嘅想法,你並唔係唔想同佢咁close,只係唔太鍾意俾人接近嘅感覺。亦都可以試下,你做主動果個,試下去擁抱佢,當唔再處於被動,情況就唔一樣,你可以控制幾時、幾近、用咩方式,甚至接觸幾耐,當所有嘢都能夠控制嘅時候,當時果種被動、無助、驚慌失措,話唔定都唔再出現呢。 :relaxed:

「擁抱我 告訴我 我沒有錯

我值得佔有 你的愛 你的痛」

係呀,你真係需要一個人去擁抱你,不過唔係其他人,而係你自己。呢段經歷,可能會好似小學學1+1=2咁,你已經唔記得點解會學得識,但係當出現1+1=?題目嘅時候,你好自然咁就會知道係等於2。佢會存在係你心裡面,可能揮之不去,可能係你心裡面塵埃落定,不妨將呢件事變成成長嘅養分,去發現,原來係關係中妥協並唔會令關係更好,原來遷就退讓唔係維持關係嘅好方法。好好擁抱以往嘅自己,話俾自己聽,「我無錯」。 :relieved:

「請你愛我」

大膽啲,表達自己喜歡嘅相處方式,同對方傾下雙方都愛得舒服嘅模式。呢件事,只要開咗口,就無你想像中咁難架啦。 :grin:

糖不甩依然會係度陪住你,唔洗怕,一步一個腳印慢慢嚟。 :smiling_face_with_three_hearts: