椰菜花嗰啲病毒既潛伏期係 大概7-14日 還是1-8個月？ 網上有不同的資訊。同埋想知道椰菜花病毒傳播途徑，需要透過血液傳播 還是普通接觸都已經可以傳染？
「椰菜花」係性病疣嘅俗稱，佢係由人類乳頭瘤病毒（HPV）嘅其中部分型號嘅病毒（主要為HPV-6或HPV-11）所引起嘅，呢個係性病嘅其中一種。當高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）；或者性器官、黏膜組織或開放性傷口接觸到患者生嘅疣（尤其當疣有破損／發炎流膿嘅時候）先會有比較大機會可以造成傳播。所以「普通接觸」，例如握手／共用工具呢啲行為係唔會傳染嘅。 
而潛伏期方面，通常為1－8個月不等，平均為3個月（參考資料：性傳染疾病 - 香港家庭計劃指導會 ）；情況可能因人而異，有啲人會比較快出現病徵，亦都有個案嘅潛伏期係1年。潛伏期其實係講緊感染咗病毒幾耐之後會出現病徵，因為個個身體狀況唔同，所以未必感染咗就會好快喺身體見到症狀。 
如果發生過高危接觸，懷疑有感染嘅話，可以進行性病測試，盡早發現有可以盡快控制病情。社會衛生科或者一啲醫療機構都有呢個服務，不過如果想測試HPV感染情況，要特意講明，因為未必每個性病測試組合都會包括HPV感染。而可能你見到嘅7－14日呢個數字係講緊「空窗期」，即係如果進行性病測試嘅話，要喺性接觸之後等待幾耐，身體先會產生足夠嘅病毒抗體／抗原量，從而可以得到較為準確嘅測試結果。而空窗期嘅長度視乎測試方法，有啲私家診所可以提供需要較短空窗期（最短可以為7－10日）嘅測試服務，但係價錢就會較貴。
謝謝 你的回覆。
另外，想問如果手或者口都係無傷口，但係接觸到受感染的部位。傳染機會高嗎？
又或者 受感染既口腔接觸無傷口的生殖器官 會受感染嗎
請問是什麼醫療機構可以做測試
性病疣（俗稱椰菜花）嘅傳播途徑，除左性接觸之外，亦可透過皮膚接觸傳播。正如 @Ching_StickyRiceLove 提及過咁，可以透過黏膜（例如 肛門、直腸、口腔、陰道等）或者皮膚傷口，同患者生殖器上的疹接觸，都可以傳播得到。特別係因為黏膜組織都比較薄／脆弱，容易在磨擦情況下造成傷口， 一旦淌血情況下傷口直接接觸到患者生嘅疣，就有機會傳播得到。
所以如果當時手部、口部、生殖器官都無傷口，即使接觸到受感染嘅部位，傳染嘅機會係好低。不過就要留意有機會口腔及生殖器官黏膜組織比較脆弱，有機會摩擦期間，黏膜組織有微細嘅地方受損，自己未必容易察覺得到，而呢類傷口在淌血嘅情況下，可以受到感染嘅機會就較大啦 。
無論咩時候，其實我地係好難完全掌握伴侶／對方嘅過往性歷史及性病情況。都提醒番，每一次有性接觸／發生性行為，都建議做好安全措施 （例如戴安全套），咁就可以減低性病傳播嘅風險啦。
性病疣（俗稱椰菜花）檢查方面，可以考慮以下機構：
政府社會衛生科服務診所：各類型性病檢查（較全面
如果現時已經有病徵，醫生可以即時處方藥物
）
提供性病測試的私家醫療服務中心（可以了解一下咩嘅檢測計劃係包含HPV檢查）
未來都可以考慮接種HPV疫苗，咁樣就會更加多一份保護，能夠預防感染HPV病毒嘅機會 
（不過要注意嘅係注射HPV疫苗之後，並唔可以防禦所有嘅性病或其他感染）。如果你想更加安全，就仍然需要使用安全套。疫苗相關資料可以參考：https://www.hpv.com.hk/