你好
我今日同女朋友做愛，戴咗安全套做，戴嗰陣已經拉到最底部，然後戴套射精，射完見到個環比戴嗰陣高咗少少，即刻用手禁實，完全離開陰部後先拔安全套出來，檢查過安全套無漏先掉
之後我女朋友過幾個鐘後去廁所，聞到底褲同私處有陣精液味，怕安全套係過程中有破損，依家我哋好不安，咁點算好
都想了解返多少少先，你地性行為之後清潔嘅時候有冇留意到陰道口有精液？定係幾個鐘之後先發現？ 
因為其實都相對比較難去判斷女朋友見到嘅分泌物／聞到嘅味道係咪真係精液。因為原則上如果性行為後有清潔、而且安全套冇穿冇漏嘅話，幾個鐘之後嘅陰道分泌物唔會係精液。可能只係女朋友分泌物／汗液／安全套潤滑劑嘅味道，甚至可能係因為擔心所以有心理作用而覺得有精液嘅味。
如果你地擔心嘅話，你地可以盡快預約睇醫生進行緊急避孕（要喺性行為後5日內），醫生會根據女朋友嘅身體情況睇下佢適唔適合服用緊急避孕藥（即係事後丸），或者需唔需要使用子宮環進行緊急避孕。你地可以去家計會診所／母嬰健康院／部分私家診所睇醫生。 
而如果你地衡量完風險，覺得可以唔進行緊急避孕，你地都可以考慮自行驗孕，喺性行為嘅7日後驗孕會得到初步結果，而11日之後驗孕會得到較為準確嘅結果。
而你講嘅「個環比戴嗰陣高咗少少」呢個情況，你都可以睇下係因為安全套尺寸問題、體位問題、定係性行為過程太過激烈？下次可以留意下，咁就可以避免呢個情況發生。但如果陰莖同陰道有安全套隔著，安全套冇破損嘅話，風險都係相對低嘅。 