好驚有咗😭!

男朋友射完之後,手上面沾有少少精液,
用紙巾抹過之後幫我手交,用手指插入咗陰道,但無用過生殖器官插入,唔知咁樣會唔會有咗?
自從上次,近幾日就有少少胃痛、肚痛,唔知關唔關吞咗精液事?

Hello
你地呢次性接觸嘅懷孕風險係好低微嘅。因為精子離開咗體外之後暴露喺空氣中其實好快就會死亡,因為精子需要尿道球腺液(陰莖喺收到刺激嘅時候會分泌嘅透明色嘅液體,當中有機會含有少量精子)同精液中嘅液體作為媒介提供養份先生存到,喺空氣當中呢啲液體會揮發,再加上男朋友有抹乾手上嘅精液先接觸你嘅陰道,精子會生存唔到而唔會進入你嘅陰道游向子宮,所以係唔會導致懷孕嘅。 :blush:

至於胃痛肚痛,如果已經距離上次性行為一段時間,原則上應該唔關「吞咗精液」事。因為精液嘅主要成份有水份同蛋白質,所以原則上導致腸胃不適嘅機會係比較低嘅,除非男朋友有一啲感染/發炎嘅情況。胃痛肚痛有好多其他因素影響,例如食錯嘢或者消化系統問題,甚至如果你係第一次食到精液,你會因為唔知對身體有咩影響而擔心,有或者你呢幾日都擔憂緊自己會唔會懷孕,呢啲緊張嘅情緒都可能導致你腸胃唔舒服。而如果你本身腸胃比較敏感,可能精液真係會造成影響,如果你之後再嘗試完都係會覺得唔舒服嘅,就要避免食啦。如果腸胃唔舒服情況持續嘅話都建議要盡快睇醫生呀。 :relaxed:

建議你地下次可以考慮使用口交膜/口交套/指套呢啲安全措施,或者即使唔係進行陰莖陰道插入式嘅性行為,都可以考慮使用安全套;如果接觸完陰莖分泌物之後要洗手/抹走分泌物之後先接觸陰道;咁樣就可以避免陰莖分泌物同陰道接觸,更加安心啦。 :wink: