女友今個月M遲了10多天,有些擔心

你好
我跟女友上個月有3次愛愛,
每次都做足步驟戴安全套,如小心撕開包裝,邊按走儲精袋的空氣,再套到底。
完事後,會檢查安全套有沒有異樣,亦會㩒下儲精袋位置,再看,沒感覺有漏便打結丟掉。
我們一直用同一款的安全套超過5年了,因大家也滿意。

這個月女友月經還未來,到今天已50天。
以往最遲紀錄是40天,平均週期是35天左右。
女友的月經不算是很準時,工作壓力或許是原因之一。

不過上月女友因皮膚有腫及發炎,有看醫生及共吃了十天以上的消炎藥及西藥,不知道藥物對經期有沒有影響?

女友在第46天等月經來時買了驗孕棒測試,是一條線,雖是下午驗的,不知準確度可以嗎?

網上看到很多流言,說有帶套也會懷孕,令我和女友也會懷疑人生,想問我檢查安全套的方法是否正確?若套沒有穿爛,很微少的滴,漏出精子的可能性高嗎?雖然我每次完事後也有摸摸看儲精袋,都是乾的。

有很多問題,感謝解答!

可能我的問題較多,也希望糖不甩人員能解答!感激!

你好呀 @japguy :wave:t2:

暫時都唔洗擔心住嘅,你地係無懷孕嘅風險嘅。 :wink:

食藥的確係會對月經有影響嘅,特別係消炎藥或者抗生素呢一類藥物會令月經早到或者遲到,月經嘅狀態例如顏色同血量都會受到影響,加上你女朋友食咗10日以上嘅消炎藥,都係比較長時間嘅,好大部分嘅原因都係藥物影響嘅,所以暫時唔洗太擔心住嘅。 :relieved:

如果你驗孕嘅時候已經係距離上一次性行為11日後,其實結果已經好可信。因為因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。另外就算唔係用晨尿驗其實都好準確嘅,但點解啲人會話晨尿好啲呢?係因為有啲驗孕棒嘅說明書有機會建議你使用晨尿去檢驗,因為晨尿含有嘅hCG值濃度會係最高,亦會比較容易取得準確嘅驗孕結果。但如果說明書有寫明呢項步驟,就算唔使用晨尿,結果都會喺可信嘅~ :relaxed:

安全套喺一般使用(typical use)嘅情況下嘅避孕成功率係82%,喺完美使用(perfect use)嘅情況下嘅避孕成功率係98%。仲有2%係因為安全套係出廠嘅時候已經有損壞,以致係性行為嘅過程中破裂。通常安全套無破裂嘅話,都唔會有小孔俾精子穿過嘅。如果你真係好擔心嘅話,其實可以係完事後,加少少水入安全套裡面,睇下會唔會有漏嘅情況,又或者好似你咁,紮好安全套再按壓都得嘅。 :grin:

見你話女朋友月經都有唔準嘅情況,同埋都有避孕嘅需求,可以考慮下使用荷爾蒙嘅避孕方法,例如食事前避孕藥,一嚟可以調節月經,二嚟避孕功效都會比安全套高啲。當然如果你地有其他需求,例如想避免感染性病都可以兩個一齊用嘅。如果真係想食避孕藥就要係月經嚟緊嘅時候約家計會見醫生,醫生會幫你女朋友檢查身體,睇下邊一種避孕藥會比較適合嘅,有咩問題都可以搵返醫生檢查,唔洗擔心。 :hugs:

好欣賞你地每一個步驟都做到足,而且對於避孕嘅意識都好高,放心,你地已經好努力架啦,已經做得好好。 :+1:t2: :+1:t2:避孕嘅工具係我地可以選擇嘅,但身體嘅反應未必係我地可以控制到嘅,所以唔洗擔心架。 :relaxed:

1個讚

感謝糖不甩人員的回覆!很詳細及用心,謝謝。想問一下,女朋友吃的藥物應不是荷爾蒙類,為何也會對月經有影響?

雖然唔係每一隻消炎藥都會令月經遲嚟,但呢類型嘅藥物都係常見可以令月經延遲嘅。另一方面,當身體係需要服用消炎藥嘅時候,身體都係被病毒入侵緊。呢啲時候,身體都會集中喺免疫系統上去對抗病毒,內分泌系統亦因而有機會改變。因為身體內每一個部份同運作系統其實都係環環相扣。當一個身體部分出現問題嘅時候,都會連帶影響其他嘅身體部分。 :face_with_monocle:

而內分泌都係由身體唔同部分構成,所以由內分泌所控制嘅月經係好容易受到不同嘅外在同內在因素影響,例如荷爾蒙水平嘅變動、飲食、作息、壓力、藥物等等,呢啲因素都有機會導致月經週期嘅長度同月經日期發生變化。 :relaxed:

特別係你女朋友嘅情況,需要服食消炎藥嘅時間都比較長,可見都係病得比較嚴重。不論係從身體定藥物影響嘅角度去睇,都有機會影響到內分泌系統,而令月經有所延遲。呢啲都係好常見嘅情況,唔洗咁擔心架。 :relieved:

再加上你哋一直以來都有好認真地使用安全套作為安全措施,本身有機會導致懷孕嘅風險都係非常之低。即使月經比預期嘅遲,會係因為懷孕而導致嘅可能性都非常低,所以都唔需要太擔心。唯一可以科學地去確認伴侶有冇意外懷孕嘅方法喺係合適嘅日子使用驗孕棒去測試。而你哋都已經做咗,亦得到陰性嘅結果。要嘗試說服自己去相信結果啊:muscle:t2::muscle:t2:

一直以來女友嘅月經都唔係太準時的話,今次大病一場食咗10日藥對身體都會有一定嘅影響,月經亦有機會比預期嘅日子有更大差距。既然驗孕結果都反映咗係冇懷孕,就要好好相信結果,盡量放鬆心情等待月經嘅來臨啦! :smiling_face_with_three_hearts:

1個讚

感謝糖不甩人員的解答和陪伴, 女友大姨媽終於如以往, 忽然來臨了. :pray: (結果是58天, 新記錄)
今次經驗是生病, 吃藥, 壓力對經期真會有不少影響! 算是親身經驗了.
可能我們的性知識和經驗不足, 很多人也是做足了安全措施也會疑神疑鬼. 月經一日未來, 就怕得很.
我希望可以心態上有所改進 :pray: 不要常常懷疑安全套是否失效了 :disappointed_relieved:

1個讚

糖不甩工作人員你好

感謝你們上次的回答!

女友前一次的月經是58天, (6月27日來) 然後上一次稍早, 30天便來了 (7月27日來)
今次又再次遲了未到, (現在是55天等候中)

我們對上一次完整的性行為已是8月中左右, 也是如以往的全程戴安全套, 事後檢查,㩒下儲精袋位置,左右搖晃沒有滲漏,確認沒有問題便打結掉。

女友於上星期 (14日) 用了驗孕棒測試,是一條線。

都知道你們講解過, 影響月經的因素有許多,因上次有吃消炎藥及皮膚生病,可能是一重要原因。
想問一下,會否因一次推遲過很多而令往後推遲的機會增加呢? 因女友這兩個月沒有吃藥。

另外, 現在驗孕棒應該是頗準確對嗎? 有時看網絡很多流言, 說自己3至5個月後才驗出有懷孕什麼的,令人混亂。
在這時間又要麻煩你們解答了! 謝謝!

麻煩了!! 謝謝 @Kaleo_StickyRiceLove

Hello 你好呀!

首先關於月經呢樣嘢,正如你都有嘗試理解到我哋之前講嘅解釋,知道咗月經係由幾個繁複嘅身體系統互相配合而形成,所以好容易受到唔同身體因素影響,例如荷爾蒙分泌、飲食習慣、作息、壓力、藥物、生病等等。所以其實每人每次月經嘅情況(例如月經週期長度、流血量、流血日數、經血顏色/質地、經痛程度、經前不適情況等等)都有可能有所不同,即使月經週期長度相對穩定,可能其他情況都會有唔同(例如有啲人唔係次次月經都會經痛)。之前女朋友病咗有食消炎藥,所以令到月經受到影響。而今次會唔會女朋友休息得唔好,或者情緒比較緊張,呢啲因素都可能有影響嘅。可能你會奇怪點解壓力大到有影響,因為身體每個系統都係息息相關嘅,你試下諗,有時你壓力大或者瞓得差,你嘅胃口可能都有收到影響;同樣道理,呢啲身體情況都會影響到月經。而每個月經週期都係獨立嘅,即使月經週期平時比較穩定,都唔代表下次一定唔會提前/遲嚟;亦唔會話其中一次月經比較浮動,之後次次都一定會唔穩定。可能你見一啲教科書/網上資料係講月經週期大概為28-35日,其實呢個只係一個平均數值,唔係統一嘅標準,亦唔會話月經週期長度唔喺呢個範圍就係唔正常。我哋都有聽過一啲個案係因為壓力問題,2-3個月先嚟一次m;亦有人因為荷爾蒙分泌唔穩定,所以2-3個星期就會嚟m。 :grimacing:

可能女朋友有用app/日曆去計算同預測自己幾時會有月經,但係其實app嘅紀錄或者日曆推算並唔準確,因為app通常係以女朋友過往嘅月經週期pattern去估計,預算你幾時月經會嚟,但係app並唔會知道你成個週期/將來嘅身體狀況,例如有冇病過、有冇心情緊張等等。 :x:

不過有紀錄月經嘅習慣係好嘅,方便女朋友如果將來需要做一啲婦科檢查嘅時候可以清楚咁話俾醫護人員聽自己嘅月經情況;或者如果連續幾個月經週期嘅情況都有好大嘅轉變(尤其如果有嚴重經痛嘅情況),都可能值得我哋留意去搵醫生檢查下身體,睇下有冇一啲病理性嘅原因(例如荷爾蒙分泌問題,子宮/卵巢異常等等)導致呢個情況出現。如果好似你咁講,女朋友呢幾個月月經都比以往有比較明顯嘅唔同,都不妨去檢查下,了解下身體情況,令到你哋安心啲。你可以去家計會診所/母嬰健康院/部分專科診所或醫療機構,有需要就去預約啦。 :woman_health_worker:t2: :man_health_worker:t2:

而驗孕方面,現時市面上嘅驗孕棒都有好高嘅靈敏度(sensitivity)同特異性(specificity),所以驗孕結果都有好高嘅準確度。我哋之前都有解釋過驗孕嘅原理,只要有正確使用驗孕棒,而且距離對上一次性行為過咗11日,咁都會得到準確可靠嘅驗孕結果。有時網上流傳嘅講法好難去判斷真假,單憑文字講述我哋都唔能夠肯定「3至5個月後才驗出有懷孕」係因為佢之前冇正確咁使用驗孕棒,定係有其他原因。如果你哋8月中進行最後一次性行為,9月14號進行驗孕,而你哋有根據驗孕棒包裝/說明書指示正確咁去使用,咁呢個陰性結果係可靠嘅。如果你哋真係好擔心嘅,想驗孕多一次,你哋都可以考慮買電子驗孕棒進行驗孕,準確度可能會更加高啲。 :blush:

最後,關於避孕呢樣嘢,好欣賞你哋每次都有正確咁使用安全套。而如果整個性行為過程都有使用,安全套喺性行為期間冇穿冇漏,咁其實懷孕風險都係好低微嘅。如果你哋想再減低懷孕風險,你哋都可以考慮使用荷爾蒙避孕法,配合埋安全套一齊使用:避孕針或者避孕藥。避孕針要等醫生評估完女朋友嘅身體狀況適合使用之後注射;而避孕藥雖然好容易買到,但建議第一次食之前要睇下醫生,睇下女朋友嘅身體狀況係咪適合同埋適合邊款避孕藥,因為唔同款嘅避孕藥有唔同嘅人造荷爾蒙成份同劑量。如果有需要,可以去家計會診所/母嬰健康院/部分私家診所預約睇醫生。不過荷爾蒙避孕法只可以避孕,唔可以好似安全套咁,減低性病或者其他感染(例如尿道炎、念珠菌感染等等)嘅風險。同埋如果經期唔穩定呢樣嘢令到你哋好困擾,其實服用避孕藥一段時間之後都有調節經期令到月經變得規律嘅作用。所以你哋可以商議下,考慮兩種方法配合使用。 :relaxed:

關於避孕藥同避孕針更加多嘅資訊,可以參考:

正如你之前咁講,有時對於性/身體嘅知識不足夠,有啲咩事就會好緊張,呢個係好正常嘅。所以我哋都希望俾更加多人了解到正確正面嘅知識,咁樣遇到唔同情況嘅時候就可以做出適合自己嘅選擇。歡迎你有咩問題隨時再問我哋呀,我哋一定會盡力解答! :smiling_face_with_three_hearts:

1個讚

感謝你的回覆!! @Ching_StickyRiceLove

是的, 之前你們也有建議避孕藥呀,不過因女友之前有吃其他西藥,所以暫未考慮,只是希望安全套作為主要措施。我們也很小心使用, 所以也感謝你們的詳細解答!

因女友月經週期不穩定, 所以有時會想是否一向生活習慣有關係? 如很常飲凍飲, 吃甜食, 較少運動, 體重上升 :sweat_smile:…等等。另外她的工作的節奏一向較緊張。

想再問一下, 在網絡上看到的多囊性卵巢症候群, 是否很常見的症狀? 跟月經遲來, 有沒有關係呢? 若要知道自己是否有這症狀, 是否要到婦科醫生診症?

感謝你們!! :pray:

hello 你好啊 :smiling_face_with_three_hearts:
回應翻月經週期不穩定嘅疑問先,的確正如同你提到嘅幾個因素,例如生活習慣、飲食習慣、情緒波動、生活節奏其實都會有影響。都想你明白到月經由身體嘅荷爾蒙影響而形成嘅,而荷爾蒙由好多大大小小嘅因素影響,所以正如上面同事們嘅解釋,經期本身就有機會浮動同不穩定,28-35日週期喺科學數字,並唔代表套落每一位女性都啱用再者,就算以往嘅經期都喺準時,都啱代表將來嘅經期都喺準時,近期服用嘅藥物、生活習慣、壓力等等情緒因素都照樣會影響,所以都想你了解多少少經期嘅補充資訊,單靠經期呢一個症狀並唔足以判斷意外懷孕嘅結果最可靠、俾到肯定答案自己同伴侶嘅方法都喺使用驗孕棒。令自己更加安心同不再焦慮。

而多囊性卵巢症候群指:「女性的卵巢有過多不成熟的濾泡,且排卵稀少、男性荷爾蒙過高,導致經期不規則、不孕」。當中嘅症狀的確有包含:經期不穩定(太頻繁或減少,甚或喺停經)、毛髮嘅增生、卵巢增大、不孕、體重增加,以及其他皮膚問題。並非所有患上多囊性卵巢症候都會經歷以上症狀,多囊性卵巢症候群喺一種荷爾蒙失調嘅現象,醫生會透過抽血嚟檢驗血液中胰島素、荷爾蒙同葡萄糖含量,或者進行超聲波檢查卵巢。所以按照你分享嘅情況,月經比以往週期長,其實可以喺好多因素下影響嘅結果。如果你同伴侶真喺擔心同焦慮,建議你地1)可以驗孕:剔除意外懷孕嘅可能性,俾一個確實嘅答案自己,不再疑問同擔心;2)揾醫生做一個詳細嘅檢查,同醫生分享以往嘅經歷,同埋擔心伴侶患上多囊性卵巢症候群嘅可能性,由醫生判斷有冇需要再進一步抽血同進行超聲波檢查。希望能夠解答到你。 :smiley:

參考資料:

  1. AboutKidsHealth
  2. https://www.qhms.com/health-article/polycystic-ovarian-syndrome.aspx?lang=tc
1個讚

謝謝各位糖不甩工作人員詳細的解答!