驚出事,唔知會唔會有咗

我同女朋友兩個都係第一次做,我哋係6月15號發生過2次性行為都沒帶套 兩次都係自己打咗5分鐘飛機先射得出 嗰日女朋友咁啱白帶黎 係咪應該去家計會攞事後藥 同埋想問關於攞事後藥詳情

你好呀 @William6755 :wave:t2: :wave:t2:

都知道你會好擔心,但係都想知道多少少先。見到你都有講到有發生過性行為都無用安全套嘅情況,但都有提及透過自慰射精嘅。想瞭解多少少,你嘅意思係你地有發生過「陰道插入式」嘅性行為,但係無係體內射精? :face_with_monocle:

只有性器官,即係陰莖同陰道之間係無用安全套嘅情況底下有接觸到,都會有懷孕嘅風險嘅,因為陰莖係性興奮狀態之下分泌出嚟嘅透明液體,亦即係尿道球腺液,裏面可能會含有少量嘅精子。 :relieved:

如果真係有接觸過,都建議你女朋友可以去食事後丸,但係要留意返事後丸係香港係需要醫生處方嘅藥物,因為唔係每個人嘅身體同情況都適合透過事後丸做緊急避孕,而且亦有分不同種類(72小時vs120小時內要服用、一粒裝vs兩粒裝等),所以都建議女朋友食之前要見咗醫生先。 :relaxed:

一般私家診所嘅醫生都會有呢種藥物,其次可以考慮去家計會嘅診所度見醫生睇下適唔適合食事後丸。 :grin:

26歲或以下可以去家計會嘅青少年保健中心,不過就必須打電話或係網上預約咗先。如果26歲以上就無需事先預約。喺辦公時間直接上去佢哋有提供婦女節育指導服務嘅診所就可以啦~

呢個係家計會青少年保健中心嘅網址,入邊有寫明收費、地址、開放時間同埋預約方法。
一般如果係緊急避孕服務的話(例如處方事後丸),原則上係唔需要預約嘅。不過因為家計會嘅診所經常都爆滿,我哋都會建議女朋友打去想去嗰間診所,講咗你哋嘅情況,睇吓今日仲有冇位先。以免上到診所真係冇位,就要趕去另一間。 :pleading_face:

陰道插入式 ,體外射精

多謝你咁夜都覆我

佢依加食緊中藥係唔係唔可以食事後藥?

Hello
正如我地之前所講,就算係第一次發生性行為,只要陰莖同陰道有接觸,咁都會有一定嘅風險嘅,因為陰莖受到刺激嘅時候會分泌透明嘅尿道球腺液,而當中有機會有少量精子。所以你地嗰次嘅性行為都係會有一定嘅懷孕風險嘅。你地可以考慮下需唔需要進行緊急避孕。 :blush:

如果你地決定要進行緊急避孕,你地就要盡快去預約緊急避孕服務,例如預約家計會嘅服務。而食中藥期間可唔可以食避孕藥都好視乎女朋友係食緊咩成份/功效嘅中藥,所以要記得同醫生講返平時嘅服藥情況,等醫生評估下佢嘅身體狀況係咪適合用緊急避孕藥。而就算唔適合食事後藥,其實喺發生性行為嘅120小時內都可以選用子宮環作為緊急避孕嘅方法。 :relaxed:

如果你地衡量完風險,覺得唔需要進行緊急避孕嘅,而你地又擔心嘅,你地都可以考慮自行驗孕。喺性行為嘅7日後驗孕會得到初步結果,而11日後驗孕就會得到比較準確嘅結果。 :wink:

最後都想提返你地,下次再發生性行為嘅時候記得全程正確使用安全套,咁就可以更加安心啦!關於安全套嘅使用方法,可以參考:https://www.instagram.com/p/B4EX0FVFLUf/?utm_source=ig_web_copy_link

或者你地都可以考慮使用荷爾蒙避孕法:避孕針或者避孕藥。避孕針要等醫生評估完女朋友嘅身體狀況適合使用之後注射;而避孕藥雖然好容易買到,但建議第一次食之前要睇下醫生,睇下身體狀況係咪適合同埋適合邊款避孕藥。如果有需要,可以去家計會診所/母嬰健康院/部分私家診所預約睇醫生。不過荷爾蒙避孕法只可以避孕,唔可以好似安全套咁,減低性病或者其他感染(例如尿道炎、念珠菌感染等等)嘅風險。

你地可以商議下,搵到最適合你哋嘅安全措施。 :smiling_face_with_three_hearts: