我本身食咗14個月避孕藥，依家因為想打疫苗，擔心有副作用，所以自行停藥。
我只問過家計會姑娘，佢係建議我問醫生先，但我始終擔心會有意外，所以索性停一停先。
而我決定26號打針，所以已經喺9號食完最後一粒白色就無再食，依家接近原定排卵期（我一直有用app計），小腹有啲脹，下體有啲濕，仲開始爆瘡，想問係咪代表我個身體開始逐漸回復原來嘅身體狀況，準備排卵？
另外，我第二針將於17/7打，經期預計6/7或之後，如果我想食返藥（即係只停藥一個月），對身體會唔會有好大影響？同埋係咪都係嚟m第一日食？謝謝。
Hello
如果你之前已經連續服藥14個月嘅話，身體應該已經適應咗藥效，喺服藥期間冇分泌荷爾蒙。而家停藥，身體可能需要一段時間先可以恢復原本嘅荷爾蒙分泌系統，至於需要幾耐先可以恢復到，情況就會視乎你服藥嘅時間，同埋你本身嘅身體狀況。 
都想同你解釋返，避孕藥嘅人造荷爾蒙成份會抑制排卵，所以喺服藥期間並唔存在「排卵期」呢樣嘢。 
而你而家停咗藥，身體先會逐漸恢復，開始排卵。而如果喺冇藥物影響下，身體自己分泌荷爾蒙，可能因為飲食、作息、壓力、服藥等等因素導致荷爾蒙水平浮動，影響排卵同月經。所以排卵期其實係要靠月經出現之後推算返嘅，除非每日喺醫生指引之下用排卵試紙去測試，否則我地好難準確咁知道究竟幾時排卵嘅。尤其停藥初期可能荷爾蒙水平同之前唔同，所以排卵都會受到影響。再加上打疫苗之後身體嘅免疫系統會有反應，因此荷爾蒙分泌都會受到影響，更加難去估計幾時會排卵／月經出現，甚至令到月經／排卵嘅變化更加大。所以你都要有定心理準備，而家冇咗避孕藥影響，你嘅月經週期唔會好似食藥期間咁穩定，可能之後幾次月經會同平時相比遲好多先出現。
就算你有用APP去記錄，但個APP唔會計埋你食藥、停藥、打針等等身體變化嘅因素，所以並唔能夠靠APP預計嘅數字作準。APP嘅紀錄顯示你嘅排卵期只係靠你平時月經數據去推算，而你嘅月經都會喺避孕藥影響下變得比較穩定，所以更加難靠APP去估計你停藥之後嘅排卵／月經狀況係點。
至於下腹脹痛、有分泌物、生暗瘡呢啲現象同荷爾蒙水平改變同埋其他身體狀況都有關，好難單憑呢啲現象就估計到係咪排卵。
所以，建議你可以預約家計會診所見醫生，同醫生講番你之前食咩藥、食咗幾耐、你停咗幾耐等等，醫生都要睇下你嘅身體狀況係咪適合繼續食返之前嗰款藥，如果你嘅身體情況可以繼續食藥，醫生會教埋你點樣食（通常家計會建議經期第5日開始食第一粒）。你停藥之後再開始食藥，身體需要重新適應，可能都會出現副作用嘅。 
同埋建議你26號打針之前都要去睇下醫生，詳細咁檢查下你嘅身體係咪真係適合打針，記得要同醫生講清楚你之前食緊避孕藥，而家停咗藥。因為有機會你嘅身體情況、荷爾蒙水平等因素未必適合26號就打針，甚至有機會要考慮停藥一段時間之後再打針。因為我地唔會知道你嘅身體狀況，所以建議你盡快搵醫生咨詢下意見，了解下自己嘅身體狀況，都會對你嘅健康多一份保障。 
最後都要提返你，停藥之後身體已經冇咗避孕功效，如果要發生性行為嘅話，就一定要使用返安全套先可以有避孕功效。甚至如果你擔心自己嘅身體狀況，你都可以考慮喺呢段期間唔好發生性行為著，以免月經未出現之前你會多一個擔憂。