吾知系有左定有病

我上次經期系5/15-5/20,期中第一次食過第一次避孕藥,都係睇過醫生先食既。然後係5/25同6/2有性行為,系有用安全套。但系我係5/25之後一直都有作嘔同成日頭暈,食量都好少。我都有系6/11驗過一次,negative既。

然而,我6/21有無套性行為。但系一直到呢家食量又少左好多,不過又吾會無胃口,但系有時食飽會有頭暈作嘔,都會遲咗幾分鐘。我食既量系半個粥到就好飽。我就都上網search飯後作嘔頭暈,結果係話如果排除懷孕嘅可能,就有機會系慢性胃炎。我真系好驚。

都有念過會吾會係有左,但系我一直都未驗系因為我本身經期都吾太准,有時都會個半月一次,見到我經期既app都預計會系6/26-7/1,所以我就念住等下先,而且我呢個月壓力都有啲大同埋情緒唔太穩定,健康狀況唔太好,又有時失眠,我又驚系因為自己係咁念先會搞到經期一直都吾黎,我都有吾太去念,但系我呢家身體又咁,同埋預計既時間都到,所以我都好驚。

我之前都有睇健康院既醫生,因為個胃,我係4月頭同6/17都有睇,開左啲胃藥,食左都會好少少,但系一食完就會又繼續咁,但系健康院啲醫生見我係後生女,就唔太認真同我睇咁,好似係咁趕我走,真系睇吾到啲咩。但系我又冇咁多錢去睇醫生,我咁耐未黎經期又吾敢同屋企人講我呢家啲狀況。我真系吾知點算

吾好意思,補充返我個避孕丸係食左一日就冇再食,因為我食左就頭痛頭暈,同埋凌晨就嘔左兩次。

同埋我前日同今日,都有過一下m痛既感覺,但係都只系一下

Hello
如果你6月21號有發生過無套性行為,其實都會有一定嘅風險。即使你有食過一粒避孕藥,但係避孕藥要按照指示每日食先會有避孕功效,如果你只係食咗一粒,身體係唔會有避孕功效嘅。如果你擔心嘅話,可以考慮驗孕。喺性行為嘅7日後(6月28號)驗孕會得到初步結果,11日後(7月2號)驗孕會得到較為準確嘅結果。 :blush:

至於月經唔穩定呢樣嘢,都想同你解釋返,月經係由身體幾個繁複嘅系統互相配合而形成嘅,所以好容易受到其他因素影響,例如:荷爾蒙分泌、飲食、作息、壓力、生活習慣改變同埋藥物等等。而正係因為月經好容易被影響,所以每人每次月經嘅情況都可能唔同。所以一啲app嘅預計日子或者用日曆記錄估計嘅月經日期唔能夠好準確咁話俾我地知究竟邊日會有月經。你都有講你之前月經週期都比較唔穩定,都試過半個月一次,所以其實月經浮動係好常見嘅。 :wink:
而你都有講到,呢排情緒壓力好大、精神緊張、休息得唔好、你又食少咗嘢,加上你有食過胃藥,呢啲因素全部都會影響你嘅月經嘅。有時身體差咗,月經就會相比起平時遲咗出現,因為免疫系統都會影響月經㗎。 :confounded:

而你講嘅m痛嘅感覺,可能係經前症狀嚟嘅,但我地好難單憑呢啲症狀就好準確咁知道幾時會有月經。同埋下腹脹痛都有可能有其他原因造成,尤其你呢排腸胃唔舒服,可能都會有影響。

既然而家未能夠好確定你月經遲咗嘅原因,不如等到最後一次性行為之後嘅11日後(7月2號)進行咗驗孕先,至少可以知道21號嗰次嘅性行為有冇導致懷孕,可能知道結果之後你都會安心啲。 :relaxed:

如果你覺得月經唔穩定呢樣嘢好困擾,你都可以考慮去睇醫生,檢查下自己嘅身體狀況。母嬰健康院本身都有關於月經問題嘅診治服務,但如果你覺得健康院未必適合,你都可以考慮去家計會診所,如果你未夠26歲嘅話可以去佢哋嘅青少年保健中心。佢地嘅服務內容、收費、地點、預約方法全部都可以喺呢個網站搵到。有需要就盡快去預約啦。

腸胃唔舒服的確好影響我地嘅日常生活,甚至因為胃口唔好食得少嘢,營養未必足夠,更加對身體有負面影響。腸胃唔舒服可能係因為腸胃炎;但亦都可能係因為情緒太過緊張,所以成日會覺得腸胃唔妥;亦有可能因為休息得唔好,所以胃口受到影響。所以都建議你嘗試放鬆下先,觀察多幾日,如果情況依然冇好轉嘅話都要盡快睇醫生,檢查下身體。明白你擔心自己未嚟月經,所以唔敢同屋企人講,但係可能正正因為你嘅腸胃出現咗問題,所以你嘅月經都被影響。可能你等到驗孕結果之後,要盡快同屋企人講,睇下會唔會同你去睇下專科,詳細咁檢查下,例如做下胃鏡,因為有時健康院或者全科醫生見你後生,覺得你身體應該強壯啲、抵抗力會好啲,未必會俾到最啱你嘅治療。或者下次如果胃痛得比較嚴重,都可以去睇急症。 :woman_health_worker:t2: :man_health_worker:t2:盡早發現身體嘅狀況可以盡快治療,快啲好返,身體好咗,你嘅心情都會好啲㗎! :smiling_face_with_three_hearts:

而冇食慾呢樣嘢,可能都要諗下點樣可以令自己嘗試食多啲、營養豐富啲。如果長期都食得咁少,係會有機會營養不良㗎。身體營養唔夠唔單止會影響月經(甚至有可能出現閉經),仲會影響好多身體唔同嘅器官同系統。所以如果你之前睇咗醫生,確定唔係因為細菌/病毒感染導致腸胃唔舒服,咁都可以唔使一定要自己食白粥咁清淡。如果有啲嘢你係想食嘅、令你有胃口嘅,不妨去食下,睇下身體會唔會覺得好受啲。但係最緊要都係要快啲去睇醫生呀。

而避孕藥呢個問題,本身初初開始服用避孕藥可能會有一啲副作用,例如嘔吐、頭暈、頭痛等等,因為身體需要一啲時間去適應藥物。呢個適應時間因人而異,通常為1-3個月,但都有人需要更加長嘅時間嘅。
但係可能因為你嘅腸胃本身比較敏感,所以食完避孕藥會有相對比較強嘅副作用反應。你都可以考慮下會唔會想繼續服用,如果你都想再試下嘅話,都可以下次睇醫生攞避孕藥嘅時候同講返你腸胃嘅情況,睇下你嘅身體仲適唔適合食避孕藥,定係要調理好腸胃之後再開始食避孕藥。如果醫生認為你可以食,你都可以考慮下會唔會俾身體一啲時間去適應藥物同埋建立藥效。
而如果你考慮完都係唔想食避孕藥嘅話,你都可以考慮用其他安全措施嘅,例如安全套/避孕針。
下次再發生性行為嘅時候記得用返安全措施,咁就可以更加安心啦! :wink:

如果你之後有啲咩問題,或者你睇完醫生想同我地講返,歡迎你隨時再搵我地呀。無論點,我地都會喺度陪住你嘅! :sparkling_heart:

thankyou!不過我都仲系吾太安心:man_facepalming:t2: