避孕藥問題一問~

我已經食左 21 粒裝避孕丸 9個月,第一個月係經期第1日食既,之後每月固定係經期第5日食。

  1. 想請教一下,假設我今日係第10個月既第一日食藥,而聽日想發生性行為的話,是否已有避孕效果? 因為我見資料寫初次服用避孕丸,第一個星期都需要用condom等額外避孕保護,但我搞唔清新一個食藥cycle開始既第一個星期,係咪同樣都需要。

  2. 另外都想請問食左咁多個月,如果喺個7日既停藥期係咪都會有避孕效果。

唔該晒!!

Hello~

關於第一個問題,一般嚟講,如果係首次服食避孕藥,係月經期間開始食的話,連續食7日已經可以穩定建立到避孕功效;而如果唔係月經期間開始食,就要食足14日先可以確保避孕功效。而係頭7/14日內因為都未肯定到身體對藥物嘅適應性,所以都會建議如果要發生性行為都要使用返安全套。但呢個「首次」係指第一次食藥,或者如果曾經試過停藥再食返藥。而好似你嘅情況,有連續食藥,係唔需要每開一包新藥都係頭7日使用安全套去額外保護嘅!另一個需要係之後7日額外使用安全套嘅情況係如果漏食藥,又冇喺指定補食時間內食返,或者食完藥3小時之內嘔吐,咁就有需要預留時間俾身體去適應返藥物啦~

而第2個問題,其實係你首次食藥,連續食咗7/14日之後,體內已經會建立避孕功效,只要有持續每日都食藥,即使係停藥個7日之內,避孕功效都會持續嘅!但如果停藥7日後無開新一包藥繼續食,令身體繼續吸收人造荷爾蒙,咁避孕功效就會失去,身體亦會開始返自然嘅荷爾蒙分泌,就會有懷孕嘅可能性~所以如果想令避孕功效持續,咁就要持之以恆咁每日都準時食藥,亦要記錄好停藥嘅日子,避免遲咗開新藥!