四月尾開始同男朋友有性行為，每次都係出面磨下磨下冇插到入去。我未有性行為之前，經期都係大概三十五日，但係之後嘅經期都唔準。最上次嘅性行為係六月十六日。
五月遲左黎m，成42日先有，但係黎經個陣時d血比之前稀，量都少左d。我唔知係咪因為個一排食左白鳳丸，新食所以影響左。但係我上網見到有假經血，搞到我好擔心上次係咪唔係正常黎m。
今次47日都未有m，所以我第43日個陣時就買左懷孕棒黎驗，用朝頭早嘅尿黎驗，結果係得一條線。好似有假陰性呢樣野，所以真係搞到我勁驚同緊張。
Hello~ 男性性興奮嘅時候，通常會自動分泌尿道球腺液，當中都含有少量精子嘅，所以即使係體外磨擦，如果無使用安全措施，都係有機會懷孕嘅。不過見你提到近日有進行驗孕，而結果係陰性，因為驗孕棒最早可以喺性行為嘅7日後驗出初步結果，而喺性行為嘅11日或以後驗孕嘅結果會更準確，照你所講，對上一次性行為係16/6，距離驗孕嘅日子已經超過11日，所以結果係好準確嘅，陰性就代表應該係無懷孕啦
至於月經遲嚟方面，其實月經本身就係可以被不同外在同內在因素影響嘅事，例如病過、食過藥、情緒有起伏、有壓力、生活作息有明顯改變等等，都係可以導致荷爾蒙水平有變動，從而影響到月經周期嘅原因。有時即使冇發生過一啲明顯嘅變化，月經周期都係可以有變動嘅！唔係話每一個人每一個月嘅月經周期都會一模一樣，亦好少係每個月都同一日嚟月經。所以即使月經日子同預期嘅有差距都唔需要太擔心
如果有好似平常咁嚟M的話，基本上都可以排除懷孕嘅可能性。坊間好多時所講嘅「假M」其實係指緊「着床性出血」。
著床出血係指當受精卵着床喺子宮壁嘅時候有機會造成嘅少量出血，通常只會有幾滴或者最多一塊護墊可以承載到嘅血量，而且係一次性，唔會持續地出血幾日，血嘅顏色亦會同月經嘅唔一樣。一般由受精到着床大概係性行為後6至9日就會發生。而着床性出血並唔係一個常見嘅現象，即使真係因為懷孕都係只有少部分女性會出現嘅情況。
所以如果你出血嘅日子距離你發生性行為已經超過9日，又有持續地出血，顏色亦同平日月經差不多，咁基本上都可以排除係着床性出血嘅可能性
希望可以解答到你對驗孕同月經嘅疑問 如果真係好擔心嘅話，可以去睇醫生返身體狀況
好，唔該晒你