想問下陰道感染係咪可以去家計會睇醫生？睇完仲會有藥？
同埋有無啲價錢ok嘅私家婦科診所推薦，驚家計會要等好耐。。。但我又仲係學生，太貴嘅私家負擔唔起🥲
首先都想問返你知唔知自己嘅發炎情況，係念珠菌感染？定係其他唔舒服？例如分泌物異常／痕癢／痛／出血？ 
如果係念珠菌感染嘅話，其實普通私家診所都會有抗生素藥物可以開俾你嘅。
而如果你唔係好清楚你陰道發炎嘅情況，我地建議都係睇返專科醫生會好啲，醫生會睇你嘅身體情況決定需唔需要進行種菌檢查。而通常服用完一個療程嘅藥物就會痊癒，所以你盡快去睇醫生檢查醫治就會好快好返嘅，唔使太擔心。而如果你真係比較趕急，你想盡快有得睇，其實都可以去普通私家診所嘅，不過有機會療程會相對耐啲。
如果你未夠26歲，你可以去家計會嘅青少年保健中心睇醫生攞藥，你可以去呢個網站 青少年保健 - 香港家庭計劃指導會 睇到佢地嘅收費同埋預約方式。如果你驚輪候時間長，你可以試下打去3間唔同位置嘅青少年保健中心睇下邊間可以最快去睇到醫生；不過有時可能要打幾次先打得通電話，或者你都可以喺網站填咗網上預約登記表先，等職員聯絡返你同你確認預約時間。而通常電話確認預約嘅時候都會同你講大概需要收費幾多嘅。
不過通常如果你有表明你嘅陰道已經受緊感染，家計會都會盡快安排俾你（可能即日或者第二日，不過實際情況都要睇返本身間診所嘅預約人數情況）睇醫生嘅。亦有可能會幫你安排，叫你即日去家計會，不過可能要能一段時間先睇到醫生。 
如果你想搵比較容易負擔嘅診所，你都可以嘗試預約母嬰健康院，不過要睇清楚佢地嘅開放日期同時間，同埋新症登記時間，有需要你都可以打電話去詢問咗佢地先。
https://www.fhs.gov.hk/tc_chi/centre_det/maternal/maternal.html
而你每日做好個人清潔同護理都係好重要嘅。記得每次去完廁所後係有尿道口向肛門方向抹，同埋輕輕印乾會比較好。每日用清水溫柔溫和地清潔陰部，但記得唔好灌洗陰道，以免破壞陰道嘅酸鹼平衡。盡量穿著棉質嘅底褲同鬆身嘅下身衣物。尤其呢段期間，更加要好好護理啊！ 
唔該你呀
我預約到家計會啦，佢話到時候會幫我做陰道檢查再決定比唔比藥我
但係如果我個陣咁啱黎咗月經點算
咁我係咪要再約
如果你個日月經嚟嘅話，你可以問返家計會需唔需要改期嘅。 
因為個情況都可能係因人而異嘅，例如如果你係念珠菌感染，醫生可以通過問診了解你出現咗嘅症狀就已經可以俾藥你，咁月經就未必會影響嘅。但如果係需要做分泌物化驗或者種菌呢啲可能就要睇下需唔需要改期啦。