好擔心中招⋯

我21號同男友發生性行為
中間我地有做好安全措施
由開始到結尾都全程戴套
佢係感覺到差唔多要射嘅時候都係拎出黎
抆走個套射 冇係身體裡面射

理論上應該冇事的⋯
我本身預計呢幾日會m到
雖然都真係有出血 但d血量好少好少
而且好稀薄 粉粉地好似溝左水咁
同埋feel到個肚漲漲地小小痛
我係網上見到人地話粉紅色嘅分泌物係懷孕嘅前兆
同經期差唔多黎嘅症狀好似
我宜家真係好驚好擔心⋯個腦好亂

Hello
如果你地嘅性行為整個過程都有正確使用安全套(關於正確使用安全套嘅方式,可以參考:https://www.instagram.com/p/B4EX0FVFLUf/?utm_source=ig_web_copy_link ),過程中安全套冇穿冇漏,其實懷孕風險係好低嘅。不過都想提返你地,使用安全套嘅情況下係唔需要抽出陰莖進行射精嘅,因為有時要控制臨射精前抽出陰莖,反而有機會造成安全套脫落或者破損。 :confounded:

都想同你解釋返,月經同埋排卵係由身體幾個繁複嘅系統互相配合而形成嘅,所以好容易受到其他因素影響,例如:荷爾蒙分泌、飲食、作息、壓力、生活習慣改變同埋藥物等等。而正係因為月經好容易被影響,所以每人每次月經嘅情況都可能唔同。所以一啲app嘅預計日子或者用日曆記錄估計嘅月經日期唔能夠好準確咁話俾我地知究竟邊日會有月經。 :persevere:

如果你流血嘅情況又持續同埋血量又增加,咁就應該係月經,有時月經頭幾日血量都會相對比較少,係正常嘅;不過有帶血嘅分泌物、腹部脹痛都有機會係經前症狀,會隨著月經出現慢慢消退。建議你再觀察幾日身體嘅情況先。 :blush:

同埋就算今次你嘅流血量、經血顏色、經期不適/經前不適嘅情況都同平時嘅月經狀況唔一樣,都唔代表係唔正常。可能只係身體狀況出現咗變動,例如休息得唔好、食嘢營養唔夠或者壓力比較大,所以有影響。但如果持續幾個週期月經嘅情況,例如週期長度、流血日數、流血量、經痛情況等等,都有比較明顯嘅浮動,咁都可以去睇下醫生,檢查下有冇一啲病理嘅原因(例如荷爾蒙水平問題/子宮或者卵巢問題)導致呢啲情況出現。家計會診所/母嬰健康院/專科診所會有呢個服務嘅。 :woman_health_worker:t2: :man_health_worker:t2:

懷孕徵兆其實同好多經前不適症狀都好類似,但係呢啲症狀亦有機會由其他原因造成,所以我地好難單憑呢啲症狀去判斷自己係咪懷孕。

既然你咁擔心咁困擾,與其估估下覺得好驚,不如進行驗孕。發生性行為嘅7日後驗孕可以得到初步結果,而11日後驗孕就會得到較為準確嘅結果。你上一次發生性行為係6月21號,你聽日去驗孕已經可以得到可靠嘅結果。可能親眼見到驗孕結果,你都會安心啲嘅! :blush: