Condom穿咗但女友唔想食事後丸

女友6月26號嚟M, 今日性行為之後發現condom穿咗,雖然已經過咗危險期(知道唔係百分百準確),依家好驚會出事,想叫女朋友去食事後丸,但係佢好抗拒,而家好擔心出事但又唔知點可以點做。
雖然明白事後丸有副作用,但感覺總好過出咗事先食藥,同埋想知懷孕嘅機率係咪真係好高,因為我哋係做完先發現穿咗,但係冇內射到
而家個心真係好亂

你好呀 :wave:t2:

雖然無射精,但係安全套有破裂,加上興奮狀態嘅陰莖會分泌尿道球腺液,裡面含有少量嘅精子,我地都唔能夠確定安全套係幾時破裂嘅,都會有懷孕嘅風險嘅。同時因為好多嘢都會有影響,所以都好難答到你會有幾大機率,都要視乎當時雙方嘅身體狀況、精子卵子嘅健康情況、陰道嘅狀態等等,的確即使係體內射精,都唔會次次都懷孕嘅,但係就係好難預計邊一次會有懷孕嘅風險,所以暫時未有懷孕嘅計劃嘅話,喺每次性行為嘅時候都要考慮使用安全措施,例如戴安全套。

都想了解下女朋友抗拒避孕藥個原因呀?係擔心藥物個副作用?定係因為擔心醫生講咩說話俾你聽呀?

如果係擔心藥物嘅副作用,其實食咗事後丸後可能會出現噁心或頭暈嘅副作用,通常會係24-48小時內消散,但係都要睇返個人嘅身體情況,比較長遠啲嘅影響就會係喺未來一個月經週期都可能會有不規則嘅陰道出血,同埋下次月經有可能提早或者推遲,不過通常呢啲影響都唔會超過一個月經週期嘅。只要事後丸只係緊急咁用一次嘅話,都唔會有一啲長遠嘅影響嘅。同埋喺香港要食事後丸嘅話,都要經由醫生嘅處方先可以服用,醫生會幫你檢查下你身體適合食先會俾你食嘅,所以都唔洗太擔心嘅。

如果擔心醫生嘅說話難聽,你都可以去搵番睇開嘅家庭醫生,無嘅話都可以選擇家計會嘅。家計會嘅青少年保健中心本身都做緊一啲青少年服務嘅,同一時間主力都係做青少年嘅性與生殖健康嘅服務,因此醫生都唔會覺得點解你會食呢啲藥呀又或者有歧視嘅情況出現嘅。但係要留意嘅係因為依家依然係疫情期間,因此係無陪診嘅,但係都可以喺外面等女朋友嘅。如果你有預約好時間見醫生,其實你預15-30分鐘就已經完成架啦。除咗事後丸之外,其實都可以用子宮環避孕。你可以喺性行為發生後嘅72小時或120小時內進行緊急避孕(緊急避孕藥或者子宮環),呢兩種方法都要由醫生處方/置入體內嘅。

26歲或以下可以去家計會嘅青少年保健中心,不過就必須打電話或係網上預約咗先。如果26歲以上就無需事先預約。喺辦公時間直接上去佢哋有提供婦女節育指導服務嘅診所就可以啦~

呢個係家計會青少年保健中心嘅網址,入邊有寫明收費、地址、開放時間同埋預約方法。
一般如果係緊急避孕服務的話(例如處方事後丸),原則上係唔需要預約嘅。不過因為家計會嘅診所經常都爆滿,我哋都會建議你打去想去嗰間診所,講咗你哋嘅情況,睇吓今日仲有冇位先。以免上到診所真係冇位,就要趕去另一間。如果好擔心嘅話,都可以係性行為後7日驗孕得到初步結果,11日後驗孕就會有比較準確嘅結果嘅。

另外,即使你平時嘅月經週期都好規律,但排卵同月經係好容易受其他因素影響嘅,例如飲食、作息、壓力、藥物,所以唔建議用所謂嘅「安全期/危險期」作為一種有效嘅避孕方法。即使上個月嘅月經週期係28日,都唔代表下一個都必然係28日。而且要等月經出現先可以計算到過往呢個月週期嘅數字係幾長,再去大概估算幾時係排卵日,從而去估計所謂「安全期」或者「危險期」嘅日子。即使我哋知道週期係幾長,其實都唔可以單憑日子去準確判斷確定到底係邊一日排咗卵。而且有啲人甚至會係月經期間就已經排卵,所以即使係月經期間都唔代表係完全無懷孕嘅風險。另一方面,坊間常講嘅安全期(呢個計算方法係假設每個月週期都係一定28日,而且都一定係第14日排卵嘅時候先適用)都係指月經前7日同月經開始起計7日(所謂嘅前7後7),但係精子進入體外之後喺適宜嘅環境下可以生存2至3日,如果呢段時間內排卵嘅話,就會有機會懷孕。

佢係擔心副作用同埋覺得睇醫生大壓力,我都好明白,但係我唔想去到中招先去做手術,因為咁樣傷害仲大:disappointed:。我唔知點樣說服佢好

hello 你好啊 :smiling_face_with_three_hearts:,首先好感謝你信任我地分享你嘅煩惱。首先事後丸嘅副作用都喺因人而異,正如@ Kaleo_StickyRiceLove 所講,女性服用完事後丸之後,機會感受到「出現噁心或頭暈嘅副作用,通常會係24-48小時內消散」;另一邊廂都有女性服用完事後丸之後,喺冇感受到任何副作用嘅 :face_with_monocle:。至於睇醫生大壓力嘅問題,你都可以同伴侶再溝通下,令對方明白關係當中嘅發生性行為喺好平常嘅事,發生咗預想唔到嘅意外需要解決,咁就更能保障雙方~ 或者你都可以試試下家計會嘅服務睇下會唔會幫更為適合你同伴侶。 都想了解一下你地平時使用安全套嘅習慣喺點樣?我地之前都有出過關於安全套嘅使用方法10個令安全套失效嘅原因,你同伴侶都可以參考一下~ :muscle:

另外,都想提一提你地,服用事後丸需要喺性行為後72小時內、或120小時內服用,所以都需要留意翻呢一點~如果將來你同伴侶都有機會進行性行為,都可以嘗試用其他避孕方法,例如荷爾蒙避孕方法,例如避孕針或子宮環等等。你都可以同伴侶分析下每種避孕措施嘅利弊,睇下邊一種方法比較適合你~ :muscle: :muscle: